އޮކްޓޯބަރު 1 ވަނަ ދުވަހުން ފެށިގެން އަމަލުކުރަން ފެށި ޗައިނާގެ ޤައުމީ ދިފާޢީ މޮބިލައިޒޭޝަން ޤާނޫނަކީ 2010 ވަނަ އަހަރަށް ފަހު އެ ޤާނޫނަށް ގެނެވުނު އެންމެ ބޮޑު އަދި އެންމެ ތާރީޚީ އިޞްލާޙެވެ.

14 ބާބާއި 82 މާއްދާގެ މައްޗަށް އެކުލެވިގެންވާ މި އިޞްލާޙުގެ މައިގަނޑު މަޤްޞަދަކީ، ޞުލްޙައިގެ ޙާލަތުން ހަނގުރާމައިގެ ޙާލަތަށް ޤައުމު ބަދަލުވާ ވަގުތު، މަދަނީ އިންފްރާސްޓްރަކްޗަރާއި އިޤްތިޞާދީ ވަސީލަތްތައް ސީދާ އަސްކަރީ ބޭނުންތަކަށް ވަގުތުން މޮބިލައިޒްކުރުމުގެ ފުރިހަމަ ޤާނޫނީ ބާރު ދައުލަތަށް ދިނުމެވެ.

Advertisement

މި އިޞްލާޙުގެ ސަބަބުން "މޮބިލައިޒޭޝަން" ނުވަތަ ދިފާޢީ ބޭނުންތަކަށް ޤައުމުގެ ވަސީލަތްތައް އެއްކުރެވޭނެ ދާއިރާތަކުގެ އިޚްތިޞާޞް ވަނީ އިންތިހާއަށް ފުޅާވެގެން ގޮސްފައެވެ.

މި ޤާނޫނު ދަށުން ދިފާޢީ ޚިދުމަތް ދިނުމަށް ލާޒިމުކޮށްފައިވާ ދާއިރާތަކުގެ ތެރޭގައި އެއްގަމާއި، ކަނޑާއި، ވައިގެ ދަތުރުފަތުރާއި ލޮޖިސްޓިކްސްގެ ނިޒާމުތަކުގެ އިތުރުން މުވާޞަލާތާއި ސައިބަރ ސެކިއުރިޓީ އިންފްރާސްޓްރަކްޗަރ ހިމެނެއެވެ.

މީގެ އިތުރުން ހޮސްޕިޓަލްތަކާއި، ބޭސްފަރުވާއާއި، ކާބޯތަކެތި އުފައްދައި ފޯރުކޮށްދޭ ވިއުގަތަކާއި، ކަރަންޓާއި، ތެލާއި، ކެމިކަލް އަދި ސިވިލް ނިއުކްލިއަރ ވަސީލަތްތަކުގެ އިތުރުން ޚަބަރު ފަތުރާ ވަސީލަތްތަކާއި ސިޓީ މުނިސިޕަލް އިންފްރާސްޓްރަކްޗަރ ފަދަ އާންމު 13 ދާއިރާއެއް ވަނީ ސީދާ ދިފާޢީ މޮބިލައިޒޭޝަންގެ ދާއިރާގެ ތެރެއަށް ޤާނޫނީ ގޮތުން ވައްދައިގަނެފައެވެ.

މި އައު އިޞްލާޙާއެކު، ޗައިނާގެ މިލިޓަރީ-ސިވިލް ފިއުޝަން ސިޔާސަތު ވަނީ ސީދާ ޤާނޫނަކަށް ބަދަލުވެފައެވެ. ޤާނޫނުގެ 29 ވަނަ މާއްދާގައިވާ ގޮތުން، ނޭޝަނަލް ޑިވެލޮޕްމަންޓް އެންޑް ރިފޯމް ކޮމިޝަނާއި ސެންޓްރަލް މިލިޓަރީ ކޮމިޝަން ގުޅިގެން އެކުލަވައިލާ ކެޓަލޮގްގައި ހިމެނޭ ކޮންމެ އުމްރާނީ މަޝްރޫޢެއް ނުވަތަ އުފެއްދުމެއްގެ ޑިޒައިނާއި އުފެއްދުމުގެ މަރުޙަލާގައި އަސްކަރީ ބޭނުންތަކަށް ބޭނުންކުރެވޭނެ ފީޗަރތައް ހިމެނުން ލާޒިމުކުރެއެވެ.

މީގެ އިތުރުން، ޤައުމީ ކުއްލި ޙާލަތެއްގައި ސިވިލް މުދަލާއި، އުޅަނދުފަހަރާއި، އިމާރާތްތައް ދައުލަތަށް ނެގުމުގެ ބާރު ސްޓޭޓް ކައުންސިލާއި މިލިޓަރީ ކޮމިޝަނަށް ލިބިގެންވެއެވެ. މިއީ ދުނިޔޭގެ މަސްރަހުގެ ނުތަނަވަސްކަން ބޮޑުވެ، ޓައިވާނާއި ދެކުނު ޗައިނާ ކަނޑުގެ މައްސަލަތަކުގައި ދިގުދެމިގެންދާ ފަދަ ހަނގުރާމައަކަށް ޗައިނާގެ އެތެރޭގެ އިޤްތިޞާދީ ނިޒާމު ތައްޔާރުކުރުމަށް އެޅި މުހިންމު ފިޔަވަޅެކެވެ.