ކޮސޯވޯއާ ސާބިއާ ވަކިވުމުގެ ހަނގުރާމައިގައި ހިންގި ހަތަރު ހަނގުރާމައިގެ ޖަރީމާއެއް ސާބިތުވެ ކޮސޯވޯގެ ކުރީގެ ރައީސް ހާޝިމް ތާޗީ 25 އަހަރަށް ޖަލަށް ލުމަށް ނެދެލެންޑްސްގެ ދަ ހޭގްގައި ހުންނަ ކޮސޯވޯ ސްޕެޝަލިސްޓް ޗެމްބާޒް (ކޭއެސްސީ) އިން ހުކުމް ކޮށްފި އެވެ.

އުމުރުން 58 އަހަރުގެ ތާޗީގެ މައްޗަށް ސާބިތުވީ 1990ގެ އަހަރުތަކުގައި ސާބިއާއާ ދެކޮޅަށް ކުރި ހަނގުރާމައިގެ ތެރޭގައި ކޮސޯވޯ ލިބެރޭޝަން އާމީ (ކޭއެލްއޭ)ގެ އެންމެ އިސް ކޮމާންޑަރެއްގެ ގޮތުގައި ހުރެ މީހުން މެރުމާއި އަނިޔާކުރުމާއި ޣައިރު ޤާނޫނީ ބަންދުކުރުމުގެ ކުށެވެ. އެ ޓްރައިބިއުނަލުން ބުނީ ކޭއެލްއޭ އިން ސިޔާސީ ޚިޔާލު ތަފާތު 96 މީހަކާއި ސާބިއާގެ ސަލާމަތީ ބާރުތަކާ ގުޅުން އޮތް ކަމަށް ބެލެވޭ ފަރާތްތައް މެރި ކަމަށް ސާބިތުވާ ކަމަށެވެ.

Advertisement

ހުކުމް އިއްވި ވަގުތު ތާޗީ ކޯޓުގައި ސޫޓެއް ލައިގެން ބަހެއް ނުބުނެ ހިމޭނުން ހުއްޓެވެ.

ތާޗީގެ އިތުރުން ކޭއެލްއޭގެ ތިން ކޮމާންޑަރެއްގެ މައްޗަށް ވެސް ހުކުމްކޮށްފައިވެއެވެ. އޭގެ ތެރެއިން ޔާކޫބް ކްރާސްނިޤީ 25 އަހަރަށް، ކަދްރީ ވެސެލީ 18 އަހަރަށް އަދި ރެޖެޕް ސެލީމީ 13 އަހަރަށް ޖަލަށް ލުމަށް ހުކުމް އިއްވި އިރު ވެސެލީ އާއި ސެލީމީގެ ހުކުމް ގުނާނީ ބަންދުގައި ހޭދަކުރި މުއްދަތު ހިމެނޭ ގޮތަށެވެ.

ހަތަރު މީހުންނަށް ވެސް އިސްތިޢުނާފުކުރުމުގެ ޙައްޤު ލިބިގެންވާ ކަމަށް ހުކުމުގައި ބަޔާންކޮށްފައިވެއެވެ. 

މި ހުކުމާއި ގުޅިގެން ސާބިއާ ސަރުކާރުން ވަނީ ފަޅުގައި ހިތްހަމަނުޖެހޭ ކަމާއި ހުކުމް ގަބޫލު ނުކުރާ ކަމަށް ބުނެފައި އެވެ. އެ ގައުމުން ސިފަ ކުރި ގޮތުގައި އެއީ ގެއްލުން ހުރި ބިރުވެރި ހުކުމެކެވެ. އަދި މި ހުކުމް ބުރަވެފައިވަނީ ސާބިއާއަށް ފައިދާ ވާގޮތަށް ކަމަށާއި އެމީހުން މެރި 10،000 އަށްވިރެ ގިނަ ކޮސޯވޯ ރައްޔިތުންގެ ހައްގު ކޮބައިތޯ ސުވާލުކޮށްފައިވެ އެވެ.

ހާޝިމް އާ ދެކޮޅަށް ކޯޓުން ހުކުމް ކުރަމުން ދިޔަ އިރު ކޮސޯވޯގެ ވެރިރަށް ޕްރިސްޓީނާގައި އެތައް ހާސް ބަޔަކު ބޮޑު ސްކްރީނަކުން ލައިވްކޮށް ބެލި އިރު ބައެއް މީހުން ކޭއެލްއޭ އާއި ތާޗީއަށް ތާއީދުކޮށް ޝިޢާރުތައް ގޮވަމުން ދިޔަ ކަމަށް ރިޕޯޓުތައް ބުނެ އެވެ.

ކޭއެލްއޭ 1990ގެ މެދު ތެރޭ އުފެދި 1997-98 ގައި ހަތިޔާރު ހިފައިގެން ހަނގުރާމަ ވަރުގަދަ ކުރުމާ ގުޅިގެން ސާބިއާ ސިފައިން ބޮޑެތި ޢަސްކަރީ ޢޮޕަރޭޝަންތައް ހިންގައި 1999 ގައި ފުރިހަމަ ހަނގުރާމައެއް ފެށި ގާތްގަނޑަކަށް 13,000 މީހުން މަރުވެ އެތައް ލައްކަ ބަޔަކު ގެދޮރު ދޫކޮށް ދާން ޖެހުނެވެ. ހަނގުރާމައަށް ފަހު ތާޗީ ކޮސޯވޯގެ ބޮޑުވަޒީރު ކަމާއި ޚާރިޖީ ވަޒީރުކަން ކޮށް 2016 އިން 2020 އަށް ރައީސްކަން ކޮށްފައިވެއެވެ.

ތާޗީ ރައީސް ކަމުން އިސްތިޢުފާ ދިނީ 2020 ގެ ނޮވެމްބަރުގައި ޓްރައިބިއުނަލުން ދައުވާ އުފުލުމާ ގުޅިގެންނެވެ. އެ ހަތަރު ކޮމާންޑަރުން ދަ ހޭގް އަށް ބަދަލުކުރީ ވެސް ހަމަ އެ މަހުއެވެ. މި ހުކުމާ ގުޅިގެން ކޮސޯވޯގެ ސިޔާސީ ހަމަޖެހުމަށާއި ޔޫރަޕިއަން ޔޫނިއަނާ ގާތް ގުޅުމެއް އުފެއްދުމުގެ މަސައްކަތަށް އިތުރު ގޮންޖެހުންތައް ކުރިމަތިވާނެ ކަމަށް ބެލެވެއެވެ.