އެމެރިކާއާ އެކު ހިނގަމުންދާ ހަނގުރާމައިގެ ތެރޭގައި ދިފާޢީ ބާރު ވަރުގަދަކުރުމުގެ ގޮތުން، ޗައިނާގައި އުފައްދާފައިވާ 400 އާ ހަމައަށް ކޮނޑަށް އުފުލާ ވައިގެ ދިފާޢީ މިސައިލް ލޯންޗަރުގެ ފުރަތަމަ ޝިޕްމެންޓް ހަފުތާތަކެއް ތެރޭގައި އީރާނަށް ލިބޭނެ ކަމަށް، އެ އެއްބަސްވުމުގެ މަޢުލޫމާތު އެނގޭ ތިން މަސްދަރަކާ ހަވާލާދީ ރޮއިޓާސް އިން ރިޕޯޓުކޮށްފިއެވެ.

މި މުޢާމަލާތުގެ އަގު 60 މިލިއަނާއި 70 މިލިއަން އެމެރިކާ ޑޮލަރާ ދެމެދުގެ ޢަދަދަކަށް އަރާ ކަމަށް ރިޕޯޓުތައް ބުނެއެވެ. އެމެރިކާ އަދި އިސްތިއުމާރީ އިޒްރޭލާއި އީރާނާ ދެމެދު ފެށުނު ހަނގުރާމައިގައި، އީރާނުގެ އަސްކަރީ މަރުކަޒުތަކާއި ސްޓްރެޓެޖިކް ވަސީލަތްތައް ހިމާޔަތްކުރުމުގެ ޤާބިލުކަމުގައި ހުރި ބާގަނޑުތައް ހާމަވެފައިވާ ދަނޑިވަޅެއްގައި، ކުރު ރާސްތާ ވައިގެ ދިފާޢީ ނިޒާމު ވަރުގަދަކުރުމަށް އީރާނުން ކުރި އެންމެ ބޮޑު އެއް މަސައްކަތަކީ މިއީ ކަމަށް ރޮއިޓާސް އިން ރިޕޯޓުކޮށްފައިވެއެވެ. މި ކޮންޓްރެކްޓުގެ ދަށުން 300 އާއި 400 އާ ދެމެދުގެ ޢަދަދަކަށް ޗައިނާގައި އުފައްދާ ކިއުޑަބްލިއު-12 އަދި އެފްއެން-16 މިސައިލް ހިމެނޭ ގޮތަށް، މީހުން އުފުލައިގެން ބޭނުންކުރާ ވައިގެ ދިފާޢީ ނިޒާމުތައް ހޯދުމަށް އެއްބަސްވެފައިވެއެވެ. މި އެއްބަސްވުން ސޮއިކޮށްފައިވަނީ ހޮންގކޮންގގައި ހުންނަ ޖޮންގޗިން ބާއޮޝާން އިންޓަނޭޝަނަލް އިންވެސްޓްމެންޓާ އެކު ކަމަށާއި، އެ ކުންފުންޏަކީ އީރާނާއި ޗައިނާގެ ސަޕްލައިކުރާ ފަރާތާ ދެމެދު މެދުވެރިއެއްގެ ރޯލު އަދާކުރި ފަރާތެއް ކަމަށް އެ މަސްދަރުތަކާ ހަވާލާދީ ރޮއިޓާސް އިން ބުނެފައިވެއެވެ.

Advertisement

ޗައިނާގެ ޚާރިޖީ ވުޒާރާއިން ބުނީ "އެ ރިޕޯޓުތަކަކީ އެއްވެސް އަސާސެއް ނެތް ވާހަކަތަކެއް" ކަމަށާއި، "ޗައިނާއިން އަބަދުވެސް ޞުލްޙަ ޤާއިމުކުރުމާއި ހަމަނުޖެހުން ނިމުމަކަށް ގެނައުމުގެ ރޯލު އަދާކުރަމުން ގެންދާ" ކަމަށެވެ. ޕާކިސްތާނުގެ އަސްކަރީ ތަރުޖަމާނު އައިއެސްޕީއާރުން ބުނީ "ޗައިނާއިން އީރާނަށް ވައިގެ ދިފާޢީ ހަތިޔާރު ފޯރުކޮށްދިނުމުގައި ޕާކިސްތާނު ޝާމިލުވާ ކަމުގެ ވާހަކަތަކަކީ މުޅިން ހަދައިގެން ދައްކާ ދޮގު ވާހަކަތަކެއް" ކަމަށެވެ.

މި މަސްދަރުތަކުން ބުނީ، ފުރަތަމަ ފޮނުވާ ޝިޕްމެންޓުތައް ހުޅަނގު ޗައިނާގެ އުރުމްޗީން ވައިގެ މަގުން ޕާކިސްތާނު ހުރަސްކޮށް އީރާނަށް ފޮނުވާ ގޮތަށް ރާވާފައިވާ ކަމަށެވެ. ނަމަވެސް، އެއްބަސްވުމުގައި ސޮއިކޮށްފައިވީ ނަމަވެސް، ޑެލިވަރީގެ ތާވަލާއި ޢަދަދުތަކާއި އެހެނިހެން ތަފްސީލުތައް އަދި ބަދަލުވެދާނެ ކަމަށް އެ މަސްދަރުތަކުން ފާހަގަކޮށްފައިވެއެވެ. ޔޫރަޕުގެ ސެކިއުރިޓީ މަސްދަރަކުން ބުނީ، ކިއުޑަބްލިއު ސީރީޒްގެ ބައެއް ވައްތަރުތައް ކަމަށްވާ ކިއުޑަބްލިއު-12 އާއި ކިއުޑަބްލިއު-18 އަދި ކިއުޑަބްލިއު-19 އީރާނަށް ވިއްކުމާ ގުޅޭ ގޮތުން ބައެއް ކޮންޓްރެކްޓުތައް މަޝްވަރާ ކުރެވެމުންދާކަން އެނގޭ ކަމަށެވެ. އީރާނުން ވަނީ ޗައިނާގެ އަސްކަރީ ސާމާނާއި ދެ ބޭނުމެއް ކުރެވޭ ބައިތައް ވީހާ ވެސް ރައްކާތެރިކޮށް ގެންދިއުމަށް އެއްގަމު މަގުތައް ބޭނުންކުރުން ވެސް ބަލައިފައި ކަމަށް، ދެ ހުޅަނގުގެ ޖާސޫސީ މަސްދަރަކާއި އީރާނުގެ އޮފިޝަލަކާ ހަވާލާދީ ރޮއިޓާސް އިން ރިޕޯޓުކޮށްފައިވެއެވެ.