ފީފާ ވޯލްޑް ކަޕް 2026 ގެ ފައިނަލުގައި ރޭ ނިއު ޖާޒީގެ މެޓްލައިފް ސްޓޭޑިއަމުގައި ކުޅުނު މެޗުގައި ސްޕެއިނުން 1-0 އިން އާޖެންޓީނާ ބަލިކޮށް ދެ ވަނަ ފަހަރަށް ވޯލްޑް ކަޕް އުފުލައިލައިފިއެވެ.

ނުވަދިހަ މިނެޓުގެ ކުޅުން ނިމުނީ ދެ ޓީމު 0-0 އިން އެއްވަރުވެގެންނެވެ. މުޅި މެޗުގައި ސްޕެއިނުން ވަނީ ބޯޅައިގެ 68 އިންސައްތަ ކޮންޓްރޯލް ކޮށް، 20 ހަމަލާ ފޮނުވައިލައިފައެވެ. އާޖެންޓީނާ އަށް 90 މިނެޓުގެ ތެރޭގައި އެންމެ ހަމަލާއެއް ވެސް ފޮނުވައިލެވިފައެއް ނުވެއެވެ. މިއީ ވޯލްޑް ކަޕް ފައިނަލެއްގެ ތާރީޚުގައި ޓީމަކަށް އެއްވެސް ޝޮޓެއް ނުޖެހި 90 މިނެޓު ހަމަވި ފުރަތަމަ ފަހަރެވެ.

Advertisement

މެޗުގެ 82 ވަނަ މިނެޓުގައި އާޖެންޓީނާގެ އެންޒޯ ފެނާންޑޭޒް އަށް ރީނދޫ ކާޑެއް ދެއްކުމަށް ފަހު، އިތުރު ވަގުތުގެ ދެ ވަނަ މިނެޓުގައި ސްޕެއިނުގެ ޕައު ކުބާސީ އަށް ކުރި ފައުލަކާ ގުޅިގެން ދެ ވަނަ ރީނދޫ ކާޑާ އެކު ރަތް ކާޑް ދައްކައި ދަނޑުން ފޮނުވައިލިއެވެ. އެއާ އެކު އާޖެންޓީނާ އެކްސްޓެންޝަނަށް ނުކުންނަން ޖެހުނީ 10 ކުޅުންތެރީންނާ އެކުގައެވެ.

އެކްސްޓެންޝަން ޓައިމުގެ 106 ވަނަ މިނެޓުގައި ސްޕެއިނުގެ ނީކޯ ވިލިއަމްސް ހެޑަރަކުން ބޯޅަ ދެމެހެއްޓުމާ އެކު ފެރާން ޓޮރެސް ވަނީ ގޯލްކީޕަރު އެމީލިއާނޯ މާޓިނޭޒް ކައިރިން ބޯޅަ ގޯލަށް ވައްދައިލައިފައެވެ. މިއީ ޓޮރެސް ވޯލްޑް ކަޕުގައި ޖެހި ފުރަތަމަ ލަނޑެވެ.

ފައިނަލުގައި ލަމީން ޔަމާލް އިސްކޮށް ހުރެ ސްޕެއިނުން ދެއްކީ ފެންވަރު ރަނގަޅު ކުޅުމެކެވެ. އާޖެންޓީނާގެ ކެޕްޓަން ލިއޮނެލް މެސީ އަށް މެޗުގައި މާ ބޮޑު ނުފޫޒެއް ފޯރުވައިލެވޭ ގޮތެއް ނުވިއެވެ. މިއީ 39 އަހަރުގެ މެސީގެ ފަހު ވޯލްޑް ކަޕް ކަމަށް ބެލެވެއެވެ. ސްޕެއިނުން ކުރިން ވޯލްޑް ކަޕް ކާމިޔާބުކުރީ 2010 ވަނަ އަހަރު ސައުތު އެފްރިކާގައެވެ. އާޖެންޓީނާ ޖެހިޖެހިގެން ދެ ވަނަ ފަހަރަށް ވޯލްޑް ކަޕް ކާމިޔާބުކުރުމުގެ ހުވަފެން ވަނީ ފެނަށް ވެގެން ގޮސްފައެވެ.