ވޯލްޑް ކަޕް 2026 ގައި ޗެމްޕިއަންކަން ދިފާޢުކުރަމުން ދަނިކޮށް، އާޖެންޓީނާ ފުޓުބޯޅަ ފެޑެރޭޝަން (އޭއެފްއޭ) ގެ މާލީ މުޢާމަލާތްތައް އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަން (އެފްބީއައި) އިން ތަހުގީގު ކުރަމުންދާ ކަމަށް ރިޕޯޓުތައް ބުނެފިއެވެ.

އާޖެންޓީނާގެ ނޫސް "ލާ ނެސިއޯން" އިން އެންމެ ފުރަތަމަ ރިޕޯޓުކުރި މި ޚަބަރާ ގުޅިގެން، އެފްބީއައި އާއި އެމެރިކާގެ ޑިޕާޓްމަންޓް އޮފް ޖަސްޓިސް އިން ބަލަމުން ދަނީ އޭއެފްއޭއާ ގުޅުން ހުރި 300 މިލިއަން ޑޮލަރަށް ވުރެ ގިނަ ފައިސާ އެމެރިކާގެ ބޭންކް ސިސްޓަމް ތެރެއިން ދައުރުކުރި ގޮތާ މެދުގައެވެ. މި ތަހުގީގުގައި މަނީ ލޯންޑަރިން، ބޭންކް ފްރޯޑް އަދި ޓެކްސް ކުށުގެ ތުހުމަތުތައް ހިމެނެއެވެ.

Advertisement

މި މައްސަލައިގެ މެދުގައި ވަނީ 2021 ވަނަ އަހަރު ފްލޮރިޑާގައި ރެޖިސްޓްރީ ކޮށްފައިވާ "ޓުއާޕްރޮޑެންޓާ" ކިޔާ ކުންފުންޏެކެވެ. އެ ކުންފުނި ހިންގަނީ ތިއެޓާ ޕްރޮޑިއުސަރު އަދި ބުއެނޮސް އައިރެސްގެ ކުރީގެ ޤާނޫނު ހަދާ މެންބަރު ހަވިއޭ ފެރޯނީ އާއި އޭނާގެ އަންހެނުން އެރިކާ ޖިލެޓެވެ. ލާ ނެސިއޯން އިން ރިޕޯޓުކޮށްފައިވާ ގޮތުގައި، އެ ކުންފުނި މެދުވެރިކޮށް 260 މިލިއަން ޑޮލަރު ފަސް ބޭންކެއްގެ އެކައުންޓުތައް ތެރެއިން ދައުރުކޮށްފައިވެއެވެ. އޭގެ ތެރެއިން 57 މިލިއަން ޑޮލަރު ފޮނުވާފައި ވަނީ ވިޔަފާރީގެ އެއްވެސް ބޭނުމެއް ފާހަގަނުވާ ތަފާތު ކުންފުނިތަކަށާއި ފަރާތްތަކަށެވެ.

މި ތަހުގީގާ ވަކިން، އާޖެންޓީނާގެ ކޯޓުތަކުގައި ވެސް އޭއެފްއޭއާ ދެކޮޅަށް މައްސަލައެއް ކުރިއަށް އެބަ ދެއެވެ. މި އަހަރުގެ ޖޫން 26 ވަނަ ދުވަހު، އާޖެންޓީނާގެ އިސްތިއުނާފު ކޯޓުން ވަނީ ފެޑެރޭޝަނުގެ ރައީސް ކްލައުޑިއޯ ޓާޕިއާ އާއި ޓްރެޝަރާ ޕާބްލޯ ޓޯވީނޯ އާ ދެކޮޅަށް، މުވައްޒަފުންގެ ޕެންޝަން ފައިސާ ނުދެއްކި ކަމުގެ ދައުވާ ދެމެހެއްޓައިފައެވެ. އެ މައްސަލައިގައި ހިމެނެނީ ގާތްގަނޑަކަށް 13 މިލިއަން ޑޮލަރެވެ.

އޭއެފްއޭ އިން ވަނީ މި ހުރިހާ ތުހުމަތުތައް ދޮގުކޮށް، ޓުއާޕްރޮޑެންޓާއާ އެކު ހެދި އެއްބަސްވުމަކީ ޤާނޫނީ އިމުގެ ތެރެއިން ކުރެވުނު ކަމެއް ކަމަށް ބުނެފައެވެ. އެފްބީއައި އިން ވެސް މި ތަހުގީގާ ބެހޭ ގޮތުން ރަސްމީ ބަހެއް ބުނެފައެއް ނުވެއެވެ. މިހާތަނަށް އެއްވެސް ފަރާތަކާ ދެކޮޅަށް ރަސްމީ ދައުވާއެއް އުފުލައިފައެއް ނުވެއެވެ.

ދަނޑުމަތީގައި އާޖެންޓީނާގެ ޓީމަށް މި ތަހުގީގުގެ އެއްވެސް އަސަރެއް ނުކުރެއެވެ. ރައުންޑް އޮފް 16 ގައި މިޞްރު ބަލިކޮށް ކުއާޓާ ފައިނަލުގައި ސްވިޒަލެންޑާ ދެކޮޅަށް ކުޅޭނެއެވެ.