ގައުމީ ޔުނިވާސިޓީން ބައިނަލްއަގުވާމީ ހަތަރު ތަމްރީނު ޕްރޮގްރާމެއް ނިންމައި ރަސްމިއްޔާތެއް ބާއްވައިފި

ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އިން ބޭރުގެ އެކި މުއައްސަސާތަކާ ގުޅިގެން ހިންގި ހަތަރު ޕްރޮފެޝަނަލް ޑިވެލޮޕްމަންޓް ޕްރޮގްރާމެއް ފުރިހަމަކުރި ކާމިޔާބީ ފާހަގަކުރުމުގެ ހާއްސަ ރަސްމިއްޔާތެއް މިއަދު ބާއްވައިފިއެވެ.

އެ ރަސްމިއްޔާތުގައި ޝަރަފުވެރި މެހެމާނުންގެ ގޮތުގައި ބައިވެރިވެވަޑައިގެންނެވީ ޖަޕާނުން ރާއްޖެއަށް ކަނޑައަޅުއްވާފައިވާ ސަފީރު އިޝިގާމީ ރޫމިކޯ އާއި އޮސްޓްރޭލިއާއިން ރާއްޖެއަށް ކަނޑައަޅުއްވާފައިވާ ހައި ކޮމިޝަނާ ޑޭވިޑް ޖެސަޕެވެ.

ފާހަގަކުރެވުނު ޕްރޮގްރާމްތަކުގެ ތެރޭގައި ޖަޕާން ފައުންޑޭޝަނާ ގުޅިގެން ކަސްޓަމްސް އޮފިސަރުންނަށް 2026 ވަނަ އަހަރުގެ އޮގަސްޓް 10 އިން ސެޕްޓެމްބަރު 21 އަށް ހިންގި 30 ގަޑިއިރުގެ ޖަޕާނު ބަހުގެ ކޯހެއް ހިމެނެއެވެ. ފަތުރުވެރިކަމުގެ ދާއިރާއާ ޖަޕާނާ ދެމެދު އޮތް ގާތް ގުޅުމުގެ ސަބަބުން މި ކޯހުން ބަހުގެ ހުނަރާއި ފަންނީ އިލްމު ތަރައްގީކުރުމުގެ ފުރުސަތު ލިބިފައިވާ ކަމަށް އެމްއެންޔޫއިން ފާހަގަކޮށްފައިވެއެވެ. ދެވަނަ ޕްރޮގްރާމެއްގެ ގޮތުގައި މެލޭޝިއާގެ ޔުނިވާސިޓީ ސައިންސް އިސްލާމް މެލޭޝިއާ (ޔޫއެސްއައިއެމް) އާ ގުޅިގެން ސެޕްޓެމްބަރު ހައެއް އިން ނުވައެއްގެ ނިޔަލަށް އެމްއެންޔޫގެ އަރަބި ބަހުގެ ޑިޕާޓްމަންޓުގެ ލެކްޗަރާއިންނަށް ދިރާސާ މުގައްރަރު ތައްޔާރުކުރުމާއި ށަގާފީ ބައްދަލުވުންތައް ހިމެނޭ ޕްރޮގްރާމެއް ހިންގާފައިވެއެވެ. ތިންވަނައަށް އޮސްޓްރޭލިއާގެ ކާޓިން ޔުނިވާސިޓީއާ ގުޅިގެން ފެކަލްޓީ އޮފް އާޓްސްގެ މުވައްޒަފުންނަށް ޕާތުގައި ފެކަލްޓީ ޑިވެލޮޕްމަންޓް ޕްރޮގްރާމެއް ބާއްވާފައިވާ އިރު ހަތަރުވަނައަށް މޯލްޑިވްސް ލައިބްރަރީ އެސޯސިއޭޝަނާއި ކާޓިން ޔުނިވާސިޓީ ގުޅިގެން ސެޕްޓެމްބަރު ނުވައެއް އިން 19 އަށް ލައިބްރަރީ އެންޑް އިންފޮމޭޝަން ސާވިސަސްއާ ބެހޭ ވޯކްޝޮޕެއް ޕާތުގައި ކުރިއަށް ގެންގޮސްފައިވެއެވެ.

ފެކަލްޓީ އޮފް އާޓްސްގެ ޑީން ޑރ. އާމިނަތު ރިޔާޒް ވިދާޅުވީ "ޕްރޮފެޝަނަލް ޑިވެލޮޕްމަންޓަކީ ހަމައެކަނި ސެޓްފިކެޓް ހާސިލުކުރުމަށް ވުރެ މާ ފުޅާ ދާއިރާއެއް" ކަމަށާއި އާ ނަޒަރިއްޔާތައް ދެނެގަނެ އަމަލީ ހުނަރު ތަރައްގީކޮށް އެ ހިޔާލުތައް މުޖުތަމައާއި ފަންނީ ދާއިރާތަކަށް ގެނެސްދިނުމުގެ ފުރުސަތު އެކަމުން ފަހިވާ ކަމަށެވެ.

މި ހަތަރު ޕްރޮގްރާމް ކާމިޔާބުކަމާ އެކު ހިންގުމުގައި ކާޓިން ޔުނިވާސިޓީ އޮސްޓްރޭލިއާގެ ހައި ކޮމިޝަން ޖަޕާން ފައުންޑޭޝަން ޖަޕާން އެމްބަސީ ޔޫއެސްއައިއެމް މޯލްޑިވްސް ލައިބްރަރީ އެސޯސިއޭޝަން އަދި ބައިވެރިވި ހުރިހާ މުވައްޒަފުންގެ އެއްބާރުލުން ލިބިފައިވާ ކަމަށް އެ ޔުނިވާސިޓީން ފާހަގަކޮށްފައިވެއެވެ.