ރާއްޖެ ސަރަހައްދުން އަތުލައިގަތް ސޫތުކުޅީ މަސް ބޯޓުތައް ޖޫރިމަނާކޮށް ޖޫރިމަނާ ނޯޓިސް ފޮނުވައިފި

ހުއްދައެއް ނެތި ރާއްޖޭގެ ކަނޑުގެ ސަރަހައްދަށް ވަދެ މަސްވެރިކަން ކުރި ކަމުގެ ތުހުމަތުގައި އިންޑިއާގެ ސޫތުކުޅި ސަރަހައްދަށް ނިސްބަތްވާ ދެ މަސް ބޯޓެއްގެ ވެރީންނަށް ޖުމްލަ 5.2 މިލިއަން ދިވެހި ރުފިޔާއިން ރާއްޖެއިން ޖޫރިމަނާ ކޮށްފިއެވެ.

މި މައްސަލައިގައި ހިމެނޭ 26 މަސްވެރީން ތަރުވައިކުލަމް ސަރަހައްދުގެ ތިން ރައްވެހީން ކަމަށްވާ ސުދަރްޝަން، ޝަންކަރް އަދި ސޫސައި ބާކްޔަމްގެ ތިން އިންޖީނު ބޯޓެއްގައި ކަނޑުމައްޗަށް ނިކުތީ އޮކްޓޫބަރު އެއް ވަނަ ދުވަހުއެވެ. ދިހަ ދުވަސް ފަހުން އޮކްޓޫބަރު 12 ގައި ރާއްޖޭގެ ކޯސްޓް ގާޑުން އެ ބޯޓުތައް ހުއްޓުވީ ރާއްޖޭގެ ކަނޑުގެ ސަރަހައްދު ތެރެއިންނެވެ. ހުއްދައެއް ނެތި ރާއްޖޭގެ ކަނޑުގެ ސަރަހައްދަށް ވަނުމާއި ލައިސެންސެއް ނެތި މަސްވެރިކަން ކުރުމުގެ ތުހުމަތުގައި އެ ބޯޓުތައް ރާއްޖޭގެ ބަނދަރަކަށް ގެނެސް، އޮކްޓޫބަރު 14 ގައި ފުލުހުންނާ ހަވާލުކޮށްފައިވާ ކަމަށް ޖޫރިމަނާ ނޯޓިސްގައި ބަޔާންކޮށްފައިވެއެވެ.

ފިޝަރީޒް މިނިސްޓްރީން އޮކްޓޫބަރު 27 ގައި ނެރުނު ނޯޓިސްތަކުގައި ނަން ގެނެސްފައި ވަނީ އެޑްވިން އަދި އެރޮން ނަމަކަށް ކިޔާ ދެ ބޯޓުގެ ވެރީންގެ ނަމެވެ. ކޮންމެ ފަރާތެއް 2.6 މިލިއަން ދިވެހި ރުފިޔާ — ގާތްގަނޑަކަށް 1.6 ކްރޯޑު އިންޑިއާ ރުޕީސް — އިން ޖޫރިމަނާކޮށް، 30 ދުވަހުގެ ތެރޭގައި ފައިސާ ދެއްކުމަށް އަންގާފައިވެއެވެ. ތިންވަނަ ބޯޓުގެ ވެރިޔާއަށް ވެސް ހަމަ އެ އަދަދުން ޖޫރިމަނާ ނޯޓިސް ލިބުން އެކަށީގެންވާކަމަށް އިންޑިއާ މީޑިއާއިން ރިޕޯޓްކޮށްފައިވެއެވެ. މިނިސްޓްރީން ފާހަގަކުރި ތިން ކުށަކީ ހުއްދައެއް ނެތި ރާއްޖޭގެ ކަނޑުގެ ސަރަހައްދަށް ވެނުމާއި، ލައިސެންސެއް ނެތި މަސްވެރިކަން ކުރުމާއި، މަނާ ގިއަރު ބޭނުންކޮށްގެން މަސްވެރިކަން ކުރުމެވެ.

އިދާރީ އަޑުއެހުންތަކުގައި ބޯޓުތަކުގެ ކެޕްޓަނުން ރާއްޖޭގެ ކަމާ ބެހޭ ފަރާތްތަކަށް ބުނެފައި ވަނީ އިންޑިއާގެ ހާއްސަ އިގުތިސާދީ ސަރަހައްދުގައި މަސްވެރިކަން ކުރަމުން ދަނިކޮށް މޫސުން ގޯސްވެ ރާއްޖޭގެ ސަރަހައްދަށް ބެހުނީ ކަމަށެވެ. ނަމަވެސް މިނިސްޓްރީން ނޯޓިސްގައި ބުނެފައި ވަނީ މަސްވެރިކަމުގެ ލޮގް ފޮތާއި ޖީޕީއެސް ރެކޯޑުތައް ނެތުމުން އެ ވާހަކަ ސާބިތުކުރެވޭ ވަރުގެ ހެކި ނެތް ކަމަށެވެ.

ޖޫރިމަނާ ނުދައްކައިފި ނަމަ ބޯޓުތައް ދޫނުކޮށް ބޭއްވުމުގެ އިތުރުން، 30 ދުވަހުގެ މުހުލަތުގައި ފައިސާ ނުދައްކައިފި ނަމަ ކޯޓު މެދުވެރިކޮށް ފައިސާ ހޯދައި ބޯޓުތަކާއި ސާމާނު ދައުލަތަށް ނެގުމަށް މަސައްކަތް ކޮށްފާނެ ކަމަށް ނޯޓިސްގައި ބުނެފައިވެއެވެ. ތަރުވައިކުލަމް ސަރަހައްދުގެ މަސްވެރީންގެ ޖަމިއްޔާތަކާއި ރައްޔިތުން ވަނީ އެ މަސްވެރީންނާއި ބޯޓުތައް ދޫކުރުވުމަށް އިންޑިއާގެ ސްޓޭޓް ސަރުކާރާއި މައި ސަރުކާރުން ތެދުވެ މެދުވެރިވެދިނުމަށް ގޮވާލައިފައެވެ.