ޒިންމާދާރު އިންވެސްޓްމަންޓުތަކަށް ރާއްޖެ އޮތީ ހުޅުވިފައި: ރައީސް

ޒިންމާދާރު އިންވެސްޓްމަންޓަށް ރާއްޖެ ހުޅުވިފައި އޮތް ކަމަށާއި އެ އިންވެސްޓްމަންޓު ކާމިޔާބު ކުރުމަށް ސަރުކާރު ތައްޔާރަށް ތިބި ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ މޯލްޑިވްސް އެކްސްޕޯ 2026 އާ ގުޅިގެން ބޭއްވި ޗައިނާ-ރާއްޖެ އިންވެސްޓްމަންޓް ކޯޕަރޭޝަން ފޯރަމުގައި ވާހަކަފުޅު ދައްކަވަމުންނެވެ. މި ފޯރަމުގައި ރައީސް ވިދާޅުވީ، މި ބައްދަލުވުމަކީ ހަމައެކަނި އިންވެސްޓްމަންޓާ ބެހޭ ގޮތުން މަޝްވަރާ ކުރުމުގެ ބަދަލުގައި، ދެ ޤައުމުގެ ރައްޔިތުންނަށް ފައިދާ ކޮށްފައިވާ ގުޅުމުގެ އައު ބާބެއް ބައްޓަން ކުރުމުގެ ފޯރަމެއް ކަމަށެވެ.

ރާއްޖެއާއި ޗައިނާއަކީ ޒަމާންވީ ކަނޑުގެ ވިޔަފާރިއާއި އިންސާނީ ގުޅުންތަކުން ގުޅިފައިވާ ދެ ޤައުމު ކަމަށާއި، މިހާރު އެ ގުޅުން ފުޅާ ސްޓްރެޓީޖިކް ޕާޓްނާޝިޕަކަށް ބަދަލުވެފައިވާ ކަމަށް ރައީސް ފާހަގަކުރެއްވިއެވެ.

2025 ވަނަ އަހަރުގެ ޖެނުއަރީ އެއް ވަނަ ދުވަހު ޢަމަލުކުރަން ފެށި ޗައިނާ-ރާއްޖެ މިނިވަން ވިޔަފާރީގެ އެއްބަސްވުމާ ގުޅޭ ގޮތުން ރައީސް ވިދާޅުވީ، 2025 ވަނަ އަހަރުގެ ޖެނުއަރީން 2026 ވަނަ އަހަރުގެ އޮގަސްޓާ ދެމެދު ރާއްޖެއިން ޗައިނާއިން ގާތްގަނޑަކަށް 440 މިލިއަން ޑޮލަރުގެ މުދާ އެތެރެކޮށްފައިވާ ކަމަށެވެ. އޭގެ ތެރެއިން ގާތްގަނޑަކަށް 124 މިލިއަން ޑޮލަރު — ހަތަރުބައިކުޅަ އެއްބައެއްހައި މިންވަރު — އެތެރެވެފައި ވަނީ އެ އެއްބަސްވުމުގެ ދަށުން ކަމަށް ރައީސް ވިދާޅުވިއެވެ.

ވިޔަފާރީގެ ހަމައެކަނި ޢަދަދުތައް އިތުރު ކުރުމުގެ ބަދަލުގައި، އިތުރު ފެންވަރެއް ދިނުމާއި ވިޔަފާރީގެ ގުޅުންތައް ހަރުދަނާ ކުރުމުގެ މުހިންމުކަން ރައީސް ފާހަގަކުރެއްވިއެވެ. ދިވެހި މަސްވެރިކަމުގެ ޕްރީމިއަމް އުފެއްދުންތަކާއި ދިވެހި އަތްތެރި މަސައްކަތާއި ޚިދުމަތްތަކަށް ޗައިނާގެ ބާޒާރުގައި ފުރުޞަތު އެބައޮތް ކަމަށް ވިދާޅުވެ، ޒަމާނީ ޕްރޮސެސިން އާއި ސަޕްލައި ޗެއިން އާއި ބާޒާރަށް ވާޞިލުވުމުގައި ޗައިނާ ކުންފުނިތަކުން ދިވެހި ވިޔަފާރިތަކާ ގުޅިގެން މަސައްކަތް ކުރުމަށް ރައީސް ދަޢުވަތު ދެއްވިއެވެ.

ރާއްޖެ މިހާރު ޤައުމީ ތަރައްޤީގެ މުހިންމު މަރުޙަލާއެއްގައި އޮތް ކަމަށާއި، ވިޝަން 2040 ގެ ލަނޑުދަނޑިއަކީ 2040 ވަނަ އަހަރުގެ ނިޔަލަށް ފުރިހަމައަށް ތަރައްޤީވެފައިވާ ޤައުމަކަށް ވުން ކަމުގައި ރައީސް ވިދާޅުވިއެވެ. އެ ލަނޑުދަނޑި ޙާޞިލު ކުރުމަށް އިޤްތިޞާދު ފުޅާ ކުރުމާއި އީޖާދީ ހައްލުތައް ހޯދުމާއި ކުރިމަގަށް ޔަޤީންކަން އޮތް އިންވެސްޓަރުންނާ ގުޅެންޖެހޭ ކަމަށް ވިދާޅުވިއެވެ. ހަތަރު ދަހައަށް ވުރެ ގިނަ އަހަރު ވަންދެން ޢަމަލުކުރި ޤާނޫނުގެ ބަދަލުގައި އައު ފޮރިން އިންވެސްޓްމަންޓް ޤާނޫނެއް ގެންނެވީ ސިޔާސަތުގެ ޔަޤީންކަމާއި ހާމަކަން އިތުރު ކުރުމަށް ކަމަށް ރައީސް ފާހަގަކުރެއްވިއެވެ.

އިޢާދަކުރެވެނިވި ހަކަތައާއި ކާނާގެ ރައްކާތެރިކަމާއި ލޮޖިސްޓިކްސް އާއި ޒަމާނީ މަސްވެރިކަމުގެ ޕްރޮސެސިން އާއި ޑިޖިޓަލް ޓެކްނޮލޮޖީ އާއި އާޓިފިޝަލް އިންޓެލިޖެންސް އާއި ޞިއްޙީ ޚިދުމަތާއި މާލީ ޚިދުމަތާއި ސްމާޓް އިންފްރާސްޓްރަކްޗާ އާއި ދެމެހެއްޓެނިވި ޢުމްރާނީ ތަރައްޤީ ފަދަ ދާއިރާތަކުން ފުރުޞަތު ހުޅުވިފައިވާ ކަމަށް ވިދާޅުވިއެވެ.

އިންވެސްޓްމަންޓުން ރާއްޖެއަށް ބޭނުންވަނީ ހަމައެކަނި ކެޕިޓަލް ނޫން ކަމަށާއި، އެއީ ޞިނާޢަތްތައް އުފެއްދުމާއި ހުނަރު ތަރައްޤީ ކުރުމާއި ވަޒީފާ އުފެއްދުމާއި ރައްޔިތުންނަށް ފުރުޞަތު ހުޅުވައިދިނުން ކަމަށް ރައީސް ވިދާޅުވިއެވެ. ފޯރަމް ނިންމަވައިލައްވަމުން ރައީސް ވިދާޅުވީ، ހުރިހާ އިންވެސްޓަރުންނާއި ވިޔަފާރި ވެރީން ރާއްޖެ ހުށަހަޅާ ފުރުޞަތުތައް ދިރާސާ ކުރެއްވުމަށާއި ދިވެހި ވިޔަފާރިތަކާ ގުޅުން ބިނާ ކުރެއްވުމަށާއި ތަޖުރިބާއާއި އީޖާދީ ވިސްނުން ހިއްސާ ކުރެއްވުމަށް ދަޢުވަތު ދެއްވާ ކަމަށެވެ.

މި ފޯރަމުގައި ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ކޮންގް ޝިއެންހުއާ އާއި މިނިސްޓަރ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް މުޙައްމަދު ސަޢީދު އާއި ކެބިނެޓް މިނިސްޓަރުންނާއި ސަރުކާރުގެ އިސް ބޭފުޅުން ބައިވެރިވެވަޑައިގެންނެވިއެވެ.