ތޫފާން އަރްނަބް އިންޑިއާގެ ދެ ސްޓޭޓަކަށް އަރައިފި

ބަންގާޅު ކަނޑުގައި އުފެދިފައިވާ ބާރުގަދަ ތޫފާން އަރްނަބް މިއަދު ހެނދުނު އިންޑިއާގެ ދެ ސްޓޭޓް ކަމަށްވާ އަންދަރް ޕްރަދޭޝް އާއި އޮޑިޝާއަށް އަރަން ފަށައިފި އެވެ.

އެ ދެ ސްޓޭޓްގެ އައްސޭރި ފަށުން އެއްގަމަށް ތޫފާނު އަރާނެ ކަމަށް ލަފާކޮށްފައި އޮތީ މިއަދު އެވެ. ރިޕޯޓުތައް ބުނާގޮތުގައި ތޫފާނުގެ އަސަރު ސީދާކޮށް ކުރުމުގެ ކުރިން ހަ ގަޑިއިރެއްހާއިރު ވަންދެން ގަދަ ވަޔާއެކު ބޯކޮށް ވާރޭވެހިފައި އެވެ.

އިންޑިއާ މީޓިއޮރޮލޮޖިކަލް ޑިޕާޓްމަންޓް (އައިއެމްޑީ) އިން ހެނދުނު 9:50 ގައި ނެރުނު ބުލެޓިންގައި ބުނެފައިވާ ގޮތުން، ތޫފާން އައްސޭރިފަށް ހުރަސްކުރީ އައިއެމްޑީގެ މިންގަނޑުން ތިންވަނައަށް އެންމެ ބާރުގަދަ ދަރަޖަ ކަމުގައިވާ "ވެރީ ސީވިއާ" ސައިކްލޮނިކް ސްޓޯމެއްގެ ގޮތުގައެވެ. ވައި ޖެހުނީ ގަޑިއަކު 125 އާއި 135 ކިލޯމީޓަރާ ދެމެދުގެ ބާރުމިނުގައި ކަމަށާއި، ވައިގެ ބާރުމިން 150 ކިލޯމީޓަރަށް މަތިވި ކަމަށް ވެސް އެ ބުނެފައިވެ އެވެ.

ތޫފާން އެރުމުގެ ކުރިން އާންދްރާ ޕްރަދޭޝް އާއި އޮޑިޝާ އިން 180,000 އަށް ވުރެ ގިނަ މީހުން ރައްކާތެރި ހިސާބުތަކަށް ބަދަލުކޮށްފައިވެއެވެ.

ދެ ސްޓޭޓުން ވެސް މީހަކު މަރުވި ކަމުގެ ރިޕޯޓެއް ލިބިފައި ނުވި ނަމަވެސް، ކަރަންޓު ކެނޑި ގަސްތައް ވެއްޓިފައިވެއެވެ. ބައެއް ސްކޫލްތައް ބަންދުކޮށް، އަންދަރް ޕްރަދޭޝްގެ ސިޓީތަކަށް ދަތުރު ކުރާ ބައެއް އެއާލައިންތަކުގެ ފްލައިޓުތައް ކެންސަލްކޮށް، ރެއިލް ޚިދުމަތްތައް ވެސް ހުއްޓައިލާފައިވެއެވެ. ތޫފާނުގެ ސަބަބުން ބުދަ އަދި ބުރާސްފަތި ދެ ދުވަހު ވެސް ބޯކޮށް ވާރޭ ވެހޭނެ ކަމަށް ލަފާކޮށްފައިވެއެވެ.

"އަރްނަބް" ނަމަކީ ބަންގްލަދޭޝް އިން ހުށަހެޅި ނަމެކެވެ. މި ނަން ހިމެނެނީ 2020 ވަނަ އަހަރު ވޯލްޑް މީޓިއޮރޮލޮޖިކަލް އޯގަނައިޒޭޝަން (ޑަބްލިއުއެމްއޯ) އާއި އެސްކެޕް ޕެނެލް އިން ފާސްކުރި ނަންތަކުގެ ރަސްމީ ލިސްޓުގައި ކަމަށާއި، ބެންގާލީ ބަހުން މި ބަހުގެ މާނައަކީ ކަނޑު ނުވަތަ ކަނޑުގެ ބޮޑު ސަރަޙައްދެވެ. ބަންގާޅު ކަނޑު ހިމެނޭ ގޮތަށް އުތުރު އިންޑިއާ ކަނޑުގައި ހެދޭ ތޫފާންތަކަށް ނަން ދެމުން ގެންދަނީ ރާއްޖެ ހިމެނޭ 13 ޤައުމަކުން ހުށަހެޅި ޖުމްލަ 169 ނަމުގެ ލިސްޓެއް ބޭނުންކޮށެވެ.