ހޮހޮޅައިގެ ތެރެއިން ނެގި ފުރަތަމަ ފޮޓޯތައް ޢާންމުކޮށްފި

ވ. އަތޮޅު ދެކުނު ކަނޑު (ތިންވަނަ ކަނޑު) ހޮހޮޅައިގެ ތެރެއިން ފީނައިގެން ނެގި ފުރަތަމަ ފޮޓޯތައް ޑައިވިންގ ރިސާޗް ޖަމާޢަތެއް ކަމަށްވާ ޑޭން ޔޫރަޕުން ޢާންމުކޮށްފިއެވެ.

މި ފޮޓޯތައް ނެގީ ހަށިގަނޑު ނެގުމުގެ މިޝަންގައި ބައިވެރިވި ފިންލެންޑް ރެސްކިއު ޑައިވަރު ސާމީ ޕާކަރިނެން، އެ މިޝަންގެ އެންމެ ފަހު ޑައިވްގައެވެ. ފޮޓޯތަކުން ފެންނަނީ ހޮހޮޅައިގެ ފުރަތަމަ ބައި, ދޮރުން ޤުދުރަތީ އައްޔެއް ފޯރާ ހިސާބުގައި ރެސްކިއު ޓީމް ޙަރަކާތްތެރިވާ މަންޒަރެވެ. މި ހިސާބުން ކުރިއަށް ދާ ވަރަކަށް ހޮހޮޅައިގެ ތެރެ އަނދިރިވެއެވެ.

ފޮޓޯތައް ޙިއްޞާކުރަމުން ޑޭން ޔޫރަޕުން ބުނީ ރެސްކިއު ޓީމަށް ޝަރަފާއި ޝުކުރު ޙައްޤު ކަމަށާއި، މި ހާދިސާގައި މަރުވި ފަރާތްތަކާއި އެ ފަރާތްތަކުގެ ޢާއިލާތަކަށް ހެޔޮ ދުޢާ ކުރާ ކަމަށެވެ. އަދި މި މައްސަލައިގެ ތަހުގީގު ކުރިއަށްދާ އިރު ކަމާ ބެހޭ އިދާރާތަކަށް އެއްބާރުލުން ދެމުންދާ ކަމަށް ވެސް ބުންޏެވެ.

މި ހޮހޮޅައިގެ ތެރެއިން އިޓަލީ ޑައިވަރުން މަރުވެފައި ތިއްބައި ފެނިފައިވާ އިރު، ހޮހޮޅައިގެ ތެރެ މީގެ ކުރިން ދުވަހަކު ވެސް މެޕް ކޮށްފައެއް ނުވެއެވެ. ޑޭން ޔޫރަޕުން ޢާންމުކުރި ފޮޓޯތަކަކީ މި ހޮހޮޅައިގެ ތެރެ ފެންނަ ފުރަތަމަ ތަސްވީރުތަކެވެ.