އިސްލާމިކް ޔުނިވާސިޓީ އޮފް އިސްލާމްއާބާދުން ރައީސް މުއިއްޒަށް އޮނަރަރީ ޑޮކްޓަރޭޓެއް

ޕާކިސްތާނަށް ކުރައްވަމުން ގެންދަވާ ދަތުރުފުޅުގެ ތެރެއިން، ސިޔާސީ އަދި ޚާރިޖީ ދާއިރާއިން ކޮށްދެއްވާފައިވާ ޚިދުމަތްތަކުގެ އަގުވަޒަންކުރުމުގެ ގޮތުން، އިންޓަނޭޝަނަލް އިސްލާމިކް ޔުނިވާސިޓީ އޮފް އިސްލާމްއާބާދުން ރައީސް ޑރ. މުޙައްމަދު މުއިއްޒަށް މިއަދު އޮނަރަރީ ޑޮކްޓަރޭޓެއް އަރުވައިފިއެވެ.

ރައީސަށް އެ ޝަރަފު އެރުވީ މިއަދު މެންދުރު އޮތް ރަސްމިއްޔާތެއްގައެވެ. އެ ޔުނިވާސިޓީން ބުނީ، ރައީސް ރާއްޖޭގެ ކުރިއެރުމަށް ކުރައްވާފައިވާ ޚިދުމަތްތަކުގެ އިތުރުން، އިސްލާމްދީނުގެ ދިފާޢުގައި ކުރައްވާފައިވާ މަސައްކަތްޕުޅުގެ އަގުވަޒަންކުރުމަކީ ވެސް މި ޝަރަފުގެ މަޤްޞަދެއް ކަމަށެވެ.

އޮނަރަރީ ޑޮކްޓަރޭޓާ ހަވާލުވެވަޑައިގަތުމަށްފަހު ދެއްވި ތަޤްރީރުގައި ރައީސް ވިދާޅުވީ، ސިޔާސީ އަދި ޚާރިޖީ ގުޅުންތަކުގެ ދާއިރާއިން އަރުވާފައިވާ މި ޑިގްރީއަކީ މުޅިން ތަފާތު އެހެން ކަމަކަށްޓަކާ ވެސް ވަރަށް މާނަހުރި އެއްޗެއް ކަމަށެވެ.

"މީގެ މުހިންމުކަން ބޮޑީ، މި ޝަރަފު އަޅުގަނޑަށް އެރުވުނު ކަމުގައި ވިޔަސް، މިއީ ދިވެހި ރައްޔިތުން ހޯދި ކާމިޔާބީއަކަށް ވާތީ. އަދި މި ޝަރަފު އަރުވާފައި ވަނީ ތިޔަބޭފުޅުންގެ މަތިވެރި ގައުމުގެ ގާތް ރަހުމަތްތެރިކަމުގެ ސަބަބުން،" ރައީސް ވިދާޅުވިއެވެ.

ރައީސް ވިދާޅުވި ގޮތުގައި، އެ ޝަރަފު ގަބޫލުކުރައްވަނީ ރާއްޖެއާއި ޕާކިސްތާނާ ދެމެދުގައި އޮތް ގާތް ގުޅުމަށް ޕާކިސްތާނުން ވަރަށް ޙުރުމަތްތެރިކޮށް ހިތާކަމުގެ ރަމްޒެއް ކަމުގައި ވާތީއެވެ.

މިއީ މިދިޔަ 10 އަހަރުގެ ތެރޭގައި ރާއްޖޭގެ ރައީސަކު ޕާކިސްތާނަށް ކުރައްވާ ފުރަތަމަ ދަތުރުފުޅެވެ. އެންމެ ފަހުން ޕާކިސްތާނަށް ދަތުރުފުޅެއް ކުރެއްވީ 2015 ވަނަ އަހަރު ރައީސް ޢަބްދުﷲ ޔާމީނެވެ. ރައީސް އޮފީހުން ފާހަގަކުރާ ގޮތުގައި، މި ދަތުރުފުޅު ދިމާވެފައިވަނީ ޖުލައި 26، 1966 ގައި ދެ ޤައުމުގެ ދެމެދު ޚާރިޖީ ގުޅުން ޤާއިމުކުރިތާ 60 އަހަރު ފުރޭ މުނާސަބާއާއެވެ.