އިނގިރޭސި ޕްރިންސް ހެރީ އާއި މޭގަން އެނބުރި ގައުމަށް ބަދަލުވާން ނިންމައިފި!

ޑިއުކް އެންޑް ޑަޗެސް އޮފް ސަސެކްސް ޕްރިންސް ހެރީ އާއި މޭގަން މި މަހުގެ ފަހުކޮޅު އެމެރިކާ ދޫކޮށް އިނގިރޭސިވިލާތަށް ދިރިއުޅުން ބަދަލުކުރުމަށް ރާވަމުންދާ ކަމަށް ރިޕޯޓުތައް ބުނެފި އެވެ.

ދެމަފިރިން އިނގިރޭސިވިލާތުގައި ދިރިއުޅުމަށް ހަމަޖެހިފައި ވަނީ ލަންޑަނުން ބޭރުގައި ހުންނަ ޝާހީ ގަނޑުވަރު ނޫން އަމިއްލަ ގެއެއްގައި ކަމަށްވެ އެވެ. ރިޕޯޓުތައް ބުނާގޮތުގައި ދިރިއުޅުން ބަދަލު ކުރާކަން ޔަގީންވީ އެ ދެމަފިރިންގެ ދެ ދަރިކަލުން ކަމަށްވާ ހަތް އަހަރުގެ ޕްރިންސް އާޗީ އާއި ފަސް އަހަރުގެ ޕްރިންސެސް ލިލިބެޓް ސެޕްޓެމްބަރުގައި އިނގިރޭސިވިލާތުގެ ސްކޫލެއްގައި ކިޔެވުން ފެށުމަށް ވަނީ ރެޖިސްޓްރީ ކުރުމުންނެވެ.

ގައުމަށް ބަދަލުވި ނަމަވެސް ޝާހީ ޢާއިލާގެ ބައެއްގެ ގޮތުގައި ރަސްމީ މަސައްކަތްތަކަށް އެނބުރި ދިޔުމުގެ އެއްވެސް ވިސްނުމެއް މި ވަގުތު ނެތް ކަމަށް ވެސް ރިޕޯޓުތައް ބުނެއެވެ.

ރަސްގެފާނު ޗާލްސް އަށް މި ނިންމުން އެންގީ އާދީއްތަ ދުވަހު ކަމަށާއި މީގެ ކުރިން ރަސްގެފާނަށް މިކަން އެނގިވަޑައިނުގަންނަވާ ކަމަށް ބީބީސީން ރިޕޯޓުކޮށްފައިވެ އެވެ.

ނަމަވެސް ސަސެކްސް ޢާއިލާ ގާތުން ފެނުމުގެ ފުރުސަތަށް ރަސްގެފާނު މަރުޙަބާ ވިދާޅުވާ ކަމަށް ވެސް ޚަބަރުތައް ބުނެއެވެ. ޕްރިންސް އެންޑް ޕްރިންސެސް އޮފް ވޭލްސް އަށް ވެސް މި ޕްލޭންގެ މަޢުލޫމާތު ދީފައިވެއެވެ. ހެރީ އާއި މޭގަން 2020 ގެ ކުރީކޮޅު ޝާހީ ވާޖިބުތަކުން ދުރުވެ އެ އަހަރުގެ މާރިޗު މަހު ކެލިފޯނިއާގައި ދިރިއުޅެން ފެށީއެވެ.

އޭގެ ފަހުން ޢާއިލީ ގުޅުންތައް ވަނީ ވަރަށް ބޮޑަށް ހީނަރުވެފައެވެ. މި އަހަރު ޖުލައި މަހު ރަސްގެފާނުގެ ހައިގްރޯވް ގެކޮޅަށް ކުރެއްވި ޒިޔާރަތް ވެގެންދިޔައީ ގުޅުން ބަދަހިކުރުމަށް ލިބުނު މުހިންމު ފިޔަވަޅަކަށެވެ. ރަސްގެފާނަށް ހަތަރު އަހަރަށް ވުރެ ގިނަ ދުވަހަށް ފަހު ކާފަ ދަރިކަލުން ހަމަލޮލުން ފެނުނީ އެދުވަހު ކަމަށް ރިޕޯޓުތައް ބުނެ އެވެ.

ޕްރިންސް ހެރީ ވަނީ ރައްކާތެރިކަމާ މެދު ހުރި ކަންބޮޑުވުންތަކުގެ ސަބަބުން އަނބިކަނބަލުންނާއި ދަރިކަލުން ގޮވައިގެން އިނގިރޭސިވިލާތަށް ވަޑައިގަތުމަށް ހުރަސް އެޅިފައިވާ ކަމަށް ކުރިން ބުނެފައެވެ. މިދިޔަ އަހަރު ޕޮލިސް ޕްރޮޓެކްޝަން ހޯދުމަށް ޕްރިންސް ހެރީ ކޯޓަށް ހުށަހެޅުއްވި މައްސަލަ ނާކާމިޔާބުވެފައިވެއެވެ. ބަދަލުވުމުގެ ޚަބަރާ ގުޅިގެން ހޯމް އޮފީހުގެ ތަރުޖަމާނެއް ބުނީ ޝާހީ ޢާއިލާގެ ސެކިއުރިޓީއާ ގުޅޭ ނިންމުންތައް ނިންމަނީ ރޯޔަލް ޕްރޮޓެކްޝަން ކޮމިޓީ (ރެވެކް) އިން ކަމަށާއި ސެކިއުރިޓީ ނިޒާމު "ހަރުދަނާ އަދި އެކަށީގެންވާ" ކަމަށެވެ.

އިންވިކްޓަސް ގޭމްސް ފައުންޑޭޝަންގެ ޗީފް ޕްރޮގްރާމްސް އެންޑް ސްޓްރެޓެޖީ އޮފިސަރު ޑޭވިޑް ވައިޒްމަން ބީބީސީ އަށް ބުނީ އަންނަ އަހަރު ބާމިންހަމްގައި ބާއްވާ އިންވިކްޓަސް ގޭމްސް އަށް ޕްރިންސް ހެރީ އެނބުރި ވަޑައިގަތުމަކީ "ވަރަށް ރަނގަޅު ޚަބަރެއް" ކަމަށެވެ.

ޕްރިންސް ހެރީ ޖުލައި މަހު ކުރެއްވި ޒިޔާރަތާ ދިމާކޮށް ހައިކޯޓުގައި އެސޯސިއޭޓެޑް ނިއުސްޕޭޕާޒް އާ ދެކޮޅަށް ހުށަހެޅުއްވި ޕްރައިވެސީ މައްސަލައެއް ވެސް ނާކާމިޔާބުވެ ޒިޔާރަތުގެ ސަމާލުކަން ކުޑަވެފައިވެއެވެ. ޑެއިލީ މެއިލް އާއި މެއިލް އޮން ސަންޑޭ ނެރޭ ކުންފުނިން ޣައިރު ޤާނޫނީ ގޮތްގޮތުން މަޢުލޫމާތު ހޯދި ކަމަށް ތުހުމަތުކޮށް ހެރީ އާއި އިތުރު ބައެއް މަޝްހޫރު ފަރާތްތައް ދަޢުވާ ކުރި ނަމަވެސް އެ ކުންފުނިން ވަނީ އެ ތުހުމަތުތައް ދޮގުކޮށްފައެވެ.