ފޮޓޯ: އެމްއެންޔޫ
ޑިޕްލޮމަސީ ވީކް 2026 ގެ ހަރަކާތްތަކުގެ ތެރެއިން، ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އާއި ފޮރިން ސާވިސް އިންސްޓިޓިއުޓް އޮފް މޯލްޑިވްސް (ފޮސިމް) އަދި ފޮރިން މިނިސްޓްރީ ގުޅިގެން "މަލްޓިލެޓެރަލް ޑިޕްލޮމަސީ އެންޑް މޯލްޑިވްސް އެންގޭޖްމަންޓް" ގެ ނަމުގައި ޔުނިވަރސިޓީ ދަރިވަރުންނަށް ޚާއްޞަ ސެޝަނެއް މިއަދު ބާއްވައިފިއެވެ.
މި ސެޝަންގައި ޔުނިވަރސިޓީ ދަރިވަރުންނާއި ލެކްޗަރާއިންގެ އިތުރުން ފޮރިން ސާވިސްގެ މަންދޫބުން ބައިވެރިވެފައިވެއެވެ. ކުދި ޖަޒީރާ ޤައުމުތަކުން ބައިނަލްއަޤުވާމީ މައިދާނުގައި ޙަރަކާތްތެރިވާ ގޮތާއި ޤައުމީ މަޞްލަޙަތު ކުރިއެރުވުމުގެ މައްޗަށް އެ ސެޝަންގައި އަލިއެޅުވި ކަމަށް އެމްއެންޔޫއިން ބުނެފައިވެއެވެ.
ޚާރިޖީ މިނިސްޓަރު މި ސެޝަންގައި ވާހަކަފުޅު ދައްކަވަމުން ވިދާޅުވީ ރާއްޖެ ފަދަ ކުޑަ ޖަޒީރާ ޤައުމަކަށް ޑިޕްލޮމަސީއަކީ ދިފާޢުގެ ފުރަތަމަ ރޮނގު ކަމަށާއި، ބައިނަލްއަޤުވާމީ މައިދާނުގައި އެންމެ ވަރުގަދަ އަޑު ކަމަށެވެ. އެމްއެންޔޫގެ ޒުވާން ދަރިވަރުންނާ ސީދާ ގޮތުން ގުޅުން ބޭއްވުމަކީ ރާއްޖޭގެ ޚާރިޖީ ސިޔާސަތު ޢަމަލީ ގޮތުން ހިނގާ ގޮތް ސާފުކޮށްދިނުމަށާއި، ރާއްޖޭގެ މަޞްލަޙަތު ކުރިއަށް ގެންދާނެ ޖީލެއް ބިނާކުރުމަށް ކޮންމެހެން ބޭނުންތެރި ކަމެއް ކަމަށް ވެސް މިނިސްޓަރު ވިދާޅުވިއެވެ.
މޫސުމީ ބަދަލުތަކާ ގުޅޭ ވަކާލާތުކުރުމާއި ބައިނަލްއަޤުވާމީ އެއްބާރުލުން ފަދަ ދާއިރާތަކުން ރާއްޖެ މަލްޓިލެޓެރަލް މުއައްސަސާތަކުގައި އަދާކުރާ ދައުރާ ގުޅޭ ގޮތުން ބައިވެރިންނަށް ސީދާ ތަޖުރިބާކާރުންގެ ވިސްނުން މި ސެޝަނުން ލިބުނެވެ. ސެޝަންގެ ތެރެއިން ސުވާލާއި ޖަވާބުގެ ބައެއް ވެސް ކުރިއަށް ގެންގޮސް، ދަރިވަރުންނަށް ޑިޕްލޮމެޓުންނާ ސީދާ މުޢާމަލާތުކުރުމުގެ ފުރުޞަތު ހުޅުވާލެވުނެވެ.
ޚާރިޖީ ވުޒާރާއިން އިސްނަގައިގެން ކުރިއަށް ގެންދާ ޑިޕްލޮމަސީ ވީކް 2026 އަކީ ރާއްޖޭގެ ޚާރިޖީ ސިޔާސަތާއި ފޮރިން ސާވިސްގެ ޚިދުމަތްތަކާ ބެހޭ ގޮތުން ޢާންމުންގެ ހޭލުންތެރިކަން އިތުރުކުރުމަށް ހަފުތާއެއްގެ މުއްދަތަށް ހިންގާ ހަރަކާތްތަކެކެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް