ސައުދީ އަރަބިއްޔާގެ ގިނަ ސަރަހައްދުތަކަށް ބުރާސްފަތިއާއެކު ގުގުރާ ވިއްސާރަ އަރުވާނެކަމަށް ލަފާކުރާތީ، ސަލާމަތީ ތަންތާނގައި ތިބުމަށާއި ސަމާލުވުމަށް އެ ގައުމުގެ ސިވިލް ޑިފެންސްއިން ރައްޔިތުންނަށް އިލްތިމާސްކޮށްފިއެވެ.
ސައުދީގެ ޖެނެރަލް ޑައިރެކްޓަރޭޓް އޮފް ސިވިލް ޑިފެންސްއިން ބުނީ މި މޫސުން ބުރާސްފަތީގެ ހާލަތު ބުދަ ދުވަހާ ހަމައަށް ދެމިހުރުމަށް ލަފާކުރާ ކަމަށެވެ. ވާދީތަކާއި ފެންބޮޑުވުމުގެ ނުރައްކަލެއް އޮތް ސަރަހައްދުތަކުން ދުރުހެލިވުމަށާއި، އެ ތަންތާނގައި ފެތުމުން ބަސްވުމަށް އެ އިދާރާއިން އެދިފައިވެއެވެ. އަދި މީޑިއާއާއި ސޯޝަލް މީޑިއާގެ ޒަރީއާއިން ދޫކުރާ އިރުޝާދުތަކަށް ތަބާވުމަށްވެސް ގޮވާލާފައިވެއެވެ.
ނޭޝަނަލް ސެންޓަރ ފޯ މީޓިއޮރޮލޮޖީ (އެންސީއެމް)ގެ ލަފާކުރުންތަކުގައިވާ ގޮތުން، މައްކާ، ޖީޒާން، އަސީރު އަދި ބާހާ ސަރަހައްދުތަކަށް މެދުމިނުން ފެށިގެން ގަދަ ވިއްސާރަ އަރުވާނެއެވެ. އެ ސަރަހައްދުތަކުގައި އަވަސް ފެންބޮޑުވުމާއި ގަނޑުވެފައިވާ ވިއްސާރަ އެޅުމާއި، ވޭރާ ދުއްވާލާ ވައިގެ ސަބަބުން ފުސް އަރާ ކަމަށްވެސް އެ ސެންޓަރުން ބުނެއެވެ. މަދީނާ، ހާއިލް، ޖައުފް އަދި ނޯދަން ބޯޑަރސް ސަރަހައްދުތަކަށް ލަފާކުރަނީ ލުއިމިނުން ފެށިގެން މެދުމިނުގެ ވިއްސާރައެވެ.
މީގެ އިތުރުން، މައްކާއާއި މައްކާ ސަރަހައްދުގެ ޖުމޫމް ގަވަރނަރޭޓަށް މެދުމިނުގެ ވިއްސާރައިގެ އިންޒާރެއް ހޮނިހިރު ދުވަހު އެންސީއެމްއިން ނެރުނެވެ. އެ ސަރަހައްދުތަކަށް ގަދަ ވައިރޯޅިތަކާއި ކައިރި އެއްޗެއްވެސް ނުފެންނަ ވަރަށް ފޮގު ކުރުމާއި، ގަނޑުވެފައިވާ ވިއްސާރަ އެޅުމާއި އަވަސް ފެންބޮޑުވުމާއި، ހޮނު އެޅުމާއެކު ގުގުރާ ވިއްސާރަ ލިބޭނެ ކަމަށް އެ ސެންޓަރުން ބުނެފައިވެއެވެ.
އެ އިންޒާރުގައިވާ ގޮތުން، މި މޫސުމުގެ ހާލަތު ރޭގަނޑު 9:00 އާ ހަމައަށް ދެމިހުރުމަށް ލަފާކުރެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް