ބޮލީވުޑް އެކްޓަރު ވަރުން ދަވަން ރާއްޖޭގައި ޗުއްޓީ ހޭދަކުރަމުން ދަނިކޮށް ވޯޓާ ސްކީ ކުރުމުގެ ތެރޭގައި އަތުގެ ކުޑަހުޅަށް އަނިޔާވެފައިވާކަން، ޝޫޓިންގެއް ފެށުމުގެ ކުރިން، އިންސްޓަގްރާމް މެދުވެރިކޮށް ހާމަކޮށްފިއެވެ.
ދަވަން އޭނާގެ އިންސްޓަގްރާމް ކެރޫސެލްގައި ހިއްސާކުރި ފޮޓޯތަކާއި ވީޑިއޯތަކުން ރާއްޖޭގެ ރަށެއްގައި ހޭދަކުރި ދުވަސްތައް ތަފާތު ގޮތަކަށް ފެނިގެންދެއެވެ. ރެއިންބޯއެއް ފެންނަ މަންޒަރާއި އިރުއޮއްސޭ ހިތްގައިމު ވަގުތުގެ އިތުރުން، ގޮނޑުދޮށުގައި ޕިއްޒާ ކައި، ޖަންގަލީގެ ތެރޭ ފެންވަރައި، ޕެޑެލް ކުޅެ، ސާފިން ކޮށް އަދި ވޯޓާ ސްކީ ކުރި މަންޒަރުތައް ހިމެނެއެވެ. ނަމަވެސް ސަމާލުކަން ހުއްޓުނީ ވޯޓާ ސްކީ ކުރަނިކޮށް ލިބުނު އަނިޔާގެ ވާހަކައަށެވެ.
ޝޫޓިން ފެށުމުގެ ކުރިން ކުޑަހުޅަށް އަނިޔާވި ވާހަކައިން ގިނަ ބައެއްގެ ޝައުގުވެރިކަން ދަމައިގެންފައިވީ ނަމަވެސް، ކުރިއަށް އޮތް ޕްރޮޖެކްޓުގެ ނަން ދަވަން ހާމައެއް ނުކުރެއެވެ. އެ އަނިޔާގެ ތަފްސީލެއް ނުވަތަ ޝޫޓިން ފެށޭނެ ތާރީހެއް ވެސް އެ ޕޯސްޓުގައި ބަޔާންކޮށްފައެއް ނުވެއެވެ.
ދަވަންގެ ކުރިއަށް އޮތް ޕްރޮޖެކްޓާ ގުޅޭ ރަސްމީ އެއްވެސް އިއުލާނެއް އަދި ނެރެފައެއް ނުވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް