އިޓަލީ ބައެއްގެ ފޯނުގަ ހުރި ފޮޓޯތަކެއް ބެލި މައްސަލައިގަ 805 މިލިއަން ޔޫރޯ އިން މެޓާ ވަނީ ޖޫރިމަނާ ކޮށްފައި
އިޓަލީގައި އެންޑްރޮއިޑް ފޯނުތަކުގައިވާ ފޭސްބުކް އެޕް ބޭނުން ކުރަމުން ދިޔަ ބައެއްގެ ފޯނުގައި ހުރި، ފޮޓޯއާއި ވީޑިއޯ އެ ފަރާތްތަކުގެ ހުއްދައެއް ނެތި ބެލި މައްސަލައިގައި އިޓަލީގެ ޑާޓާ ޕްރައިވެސީ އިދާރާ ގަރާންތޭ އިން މެޓާ 805 މިލިއަން ޔޫރޯ ( 887 މިލިއަން ޑޮލަރު) އިން ޖޫރިމަނާކޮށްފިއެވެ.
މި މައްސަލައާ ގުޅެނީ ފޭސްބުކް ބޭނުންކުރާ ވަގުތު ފޯނުގެ ގެލެރީގައި ހުންނަ ފޮޓޯއާއި ވީޑިއޯ ޕޯސްޓްކުރުމަށް ހުށަހަޅާ ފީޗާއަކާއެވެ. ގަރާންތޭ އިން ބުނެފައިވާ ގޮތުގައި މި ފީޗާ މެދުވެރިކޮށް ބޭނުންކުރާ ފަރާތްތަކުގެ ސްމާޓްފޯނުގައި ރައްކާކޮށްފައިވާ ފޮޓޯއާއި ވީޑިއޯ އަދި އެއާ ގުޅޭ ޑާޓާތައް ނަގާފައިވަނީ ހުއްދައެއް ނެތި، އަދި އެ ފަރާތްތަކަށް އެކަން ނާންގައެވެ. އެ ފީޗާ ޑިފޯލްޓް ސެޓިންގެއްގެ ގޮތުގައި ޖައްސާފައި ހުރި ކަމަށް ވެސް އެ އިދާރާ އިން ބުނެފައިވެއެވެ.
އީޔޫގެ އީ-ޕްރައިވެސީ ޑައިރެކްޓިވް ތަންފީޒުކުރުމަށް އިޓަލީގައި ހެދި ޤާނޫނާ މި ފީޗާ ޚިލާފުވާ ކަމަށް ގަރާންތޭ އިން ނިންމީ، ހުއްދަ ހޯދުމުގެ ނިޒާމު މާ ބޮޑަށް ޢާންމުވެފައި، ބޭނުންކުރާ ފަރާތްތަކަށް ދެވޭ ހުއްދައިގެ ތަފްޞީލް ފުރިހަމައަށް ވިސްނައިގަތުމުގެ ފުރުޞަތު ނުލިބޭ ކަމަށް ބެލުމަށް ފަހުގައެވެ. މި ޖޫރިމަނާއަކީ އެ އިދާރާ އިން މިހާތަނަށް ކޮށްފައިވާ އެންމެ ބޮޑު ޖޫރިމަނާ ކަމަށް ވެސް ބުނެފައިވެއެވެ.
އިޓަލީގެ ގާތްގަނޑަކަށް 20 މިލިއަން އެންޑްރޮއިޑް ބޭނުންކުރާ ފަރާތަށް މީގެ އަސަރުކޮށްފައި ވެދާނެ ކަމަށް ގަރާންތޭ އިން ބުނެފައިވެއެވެ. ހުއްދައިގެ ނޮޓިފިކޭޝަން ސާފުކޮށް ބަދަލުކުރުމާއި ޑިފޯލްޓް ސެޓިންގެއްގެ ގޮތުގައި ޖެއްސުން ހުއްޓައިލުމަށް އެ އިދާރާ އިން ވަނީ މެޓާ އަށް އަންގައިފައެވެ.
މީގެ އިތުރުން މެޓާގެ ފަރާތުން އެކަށީގެންވާ އެއްބާރުލުމެއް ނުލިބުނު ކަމަށާއި، 2019 ވަނަ އަހަރު ކުރި ޖޫރިމަނާއަކީ ވެސް މި ނިންމުމަށް ބާރުއެޅި ކަމެއް ކަމަށް ގަރާންތޭ އިން ބުނެފައިވެއެވެ.
މެޓާ އިން މި ކަމާ ގުޅޭ ގޮތުން އަދި ބަހެއް ބުނެފައެއް ނުވެއެވެ. ނަމަވެސް އެ ކުންފުންޏަށް މި ނިންމުން އިސްތިއުނާފުކުރުމުގެ ޙައްޤު ލިބިގެންވެއެވެ. ކޮންޓެންޓް ބޭނުންކޮށްގެން އާޓިފިޝަލް އިންޓެލިޖެންސް (އޭއައި) ތަމްރީނުކުރި ކަމުގެ ތުހުމަތާ މި ތަޙުޤީޤުން ނުބެލި ނަމަވެސް، އެ ތުހުމަތު މެޓާ އިން ދޮގުކުރެއެވެ.
805 މިލިއަން ޔޫރޯގެ ޖޫރިމަނާ އަކީ މެޓާގެ ދުނިޔޭގެ ޖުމްލަ އާމްދަނީގެ ގާތްގަނޑަކަށް 0.47 އިންސައްތައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް