ކްރިސްޓިއާނޯ ރޮނާލްޑޯ ގައުމީ ޓީމަށް ކުޅުން ހުއްޓާލިކަން އިއުލާނު ކުރި ފަހުން ޕޯޗުގަލް ކުޅުނު ފުރަތަމަ މެޗުގައި ބޮޑު ބައްޔަކާއި ކުރިމަތިލާން ޖެހިއްޖެ އެވެ.
އިއްޔެ ޕޯޗުގަލް ކުޅުނީ ނޭޝަންސް ލީގުގައި ޑެންމާކާއި ދެކޮޅަށެވެ. އެ މެޗުގައި ޕޯޗުގަލް ބަލިވީ 1-4 ކުންނެވެ.
ނާޕޮލީގެ ފޯވާޑް ރަސްމުސް ހޮޔޫލަންޑް ބްރޭސްއަކާ އެކު ޑެންމާކުގެ ތަރީގެ ގޮތުގައި ވިދައިލި އިރު، ފުރަތަމަ ހާފުގެ 43 ވަނަ މިނެޓުގައި ޕިއޭ އެމީލް ހޮޔެބިޔާގް ޕެނެލްޓީ ގޯލަކުން ޑެންމާކު ކުރި ހޯދީއެވެ. ދެވަނަ ހާފު ފެށިތާ ހަތަރު ވަނަ މިނެޓުގައި ހޮޔޫލަންޑް ރީތި ވޮލީ ގޯލަކުން ލީޑު ފުޅާކުރި އިރު، އޭގެ ހަތް މިނެޓު ފަހުން ރޫބެން ޑިއާޒް ކައިރިން ނައްޓައި ޕެނެލްޓީ އޭރިއާ ބޭރުން ބާރު ހަމަލާއެއް ގޯލުގެ ތެރެއަށް ވައްދައިލީއެވެ.
ޑެންމާކުގެ ހަތަރު ވަނަ ގޯލު ޖެހީ ބޮލުން ފޮނުވާލައިގެން ޔޯކިމް އެންޑާސެންއެވެ. ޕޯޗުގަލް ޖެހި ހަމައެކަނި ލަނޑު ޖެހީ މެޗު ނިމެން ކައިރިވެފައި ވަނިކޮށް ބެނާޑޯ ސިލްވާއެވެ.
ކިކްއޮފާ ކުރިން ޕޯޗުގަލް ޓީމުން ވަނީ ރޮނާލްޑޯއަށް ޚާއްޞަ ތައުރީފެއް ކޮށްފައެވެ. ޓީމާއި ދަނޑަށް ނިކުތް މެސްކޮޓުތައް ރޮނާލްޑޯގެ ހަތް ނަންބަރު ޖާޒީ ލައިގެން ނިކުތީ އޭނާގެ ނަން ޖާޒީގައި ޖަހައިގެންނެވެ. ސަޕޯޓަރުން "ޝުކުރިއްޔާ ކެޕްޓަން" ޖެހި ބޮޑު ބެނާއެއް ނެގި އިރު، މެޗުގެ ހަތް ވަނަ މިނެޓުގައި ދަނޑުގައި ތިބި އެންމެން ތަރުހީބުގެ އަތްތިލަ ބަޑި ޖެހިއެވެ.
ރޮނާލްޑޯ ޕޯޗުގަލަށް ބައިނަލްއަޤުވާމީ ފެންވަރުގައި ކުޅެން ފެށީ 2003 ވަނަ އަހަރުއެވެ. 234 މެޗުގައި 146 ގޯލު ޖެހި އިރު، ބައިނަލްއަޤުވާމީ ފުޓުބޯޅައިގައި ގޯލާއި މެޗުގެ ދުނިޔޭގެ ރެކޯޑް އޮތީ އޭނާ އަތުގައެވެ.
ބައިނަލްއަޤުވާމީ ކެރިއަރުގެ އެންމެ ބޮޑު ކާމިޔާބީއަކީ ޔޫރޯ 2016 ކާމިޔާބުކުރުމެވެ. ނަމަވެސް މިދިޔަ ސެޕްޓެމްބަރު މަހު ނޭޝަންސް ލީގު މެޗެއްގައި ކޯޗު ހޯޖީ ޖީސަސް ސްކޮޑުގައި ނުހިމެނުމުން 41 އަހަރުގެ ފޯވާޑާ ދެމެދު ޚިޔާލު ތަފާތުވުންތައް އުފެދި، ޕޯޗުގީޒް ފެޑެރޭޝަނުން އޭނާއަށް 30 ދުވަހުގެ ސަސްޕެންޝަނެއް ދިނެވެ. އެ ހާދިސާއަށް ފަހު ފަސް ފަހަރު ބެލޮންޑޯ ހޯދި ތަރި ރިޓަޔާކުރީއެވެ.
މި ނަތީޖާއާ އެކު ވެސް ޕޯޗުގަލަށް ފަސް މެޗުން 12 ޕޮއިންޓާ އެކު ގްރޫޕުގެ އެއް ވަނައިގައި އޮވެ ކުއާޓާ ފައިނަލުގެ ޖާގަ ކުރިން ކަށަވަރުކޮށްފައިވާ އިރު، ނުވަ ޕޮއިންޓާ އެކު ދެވަނައިގައި އޮތް ޑެންމާކަށް އަންގާރަ ދުވަހު ތިންވަނައިގައި އޮތް ނޯވޭއާ ދެކޮޅަށް ކުޅެ އެއްވަރުކޮށްލައިގެން ވެސް ކުއާޓާ ފައިނަލުން ޖާގަ ލިބޭނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް