ކެންސަރަށް ޓެސްޓު ކުރަން ޖެހޭ އުމުރަށްވުރެެ ބެލުން މުހިންމު ކަމެއް އޮވޭ!

ވަކި ޢުމުރަކަށް ހުރިހާ އެންމެން ހުރިހާ ބާވަތެއްގެ ކެންސަރު ޓެސްޓު ހަދަން ފެށުމަކީ ބޭނުންވާ ކަމެއް ނޫން ކަމަށާއި ޢާއިލީ ތާރީޚާއި ދިރިއުޅުމުގެ އާދަތަކާއި ފަރުދީ ނުރައްކަލުގެ ދަރަޖައަށް ބިނާކޮށް ސްކްރީނިން ރާވަން ޖެހޭ ކަމަށް ޞިއްޙީ ތަޖުރިބާކާރުން ބުނެފިއެވެ.

އިންޑިއާގެ ސީކޭ ބިރްލާ ހޮސްޕިޓަލްސް ޖައިޕޫރުގެ ބްރެސްޓް އެންޑް އެންޑޮކްރައިން ސާޖަރީގެ ކޮންސަލްޓެންޓް ޑރ. އަނޫކްރީތީ ސޫދު މީޑިއާއަށް ދިން އިންޓަވިއުއެއްގައި ބުނީ ކެންސަރު ސްކްރީނިން އަކީ ވަކި ޢުމުރެއް ޖެހުމުން ކޮންމެ މީހަކު ހުރިހާ ޓެސްޓެއް ހަދަން ޖެހޭ ކަމެއް ނޫން ކަމަށެވެ. ސްކްރީން ކުރާ ކެންސަރުގެ ބާވަތާއި ޢާއިލާގައި ކެންސަރު ފެނިފައިވާ މިންވަރާއި ދުންފަތާއި ބަނގުރާ ފަދަ އާދަތައް ސްކްރީނިން ރޭވުމުގައި ބެލެވެއެވެ.

ބައެއް މީހުންނަށް 30ގެ އަހަރުތަކުގައި ވެސް ސްކްރީނިން މުހިންމުވާ އިރު އެހެން ބައެއް މީހުންނަށް އެ ވަގުތު ފެށެނީ ފަހުންނެވެ.

30 އަހަރު ފުރުމަކީ ހުރިހާ ޓެސްޓެއް ހަދަންވީ ޢުމުރެއް ނޫނެވެ. ނަމަވެސް ޢާއިލީ މީހުންގެ ތެރޭގައި ކެންސަރު ޖެހިފައިވާ ނިސްބަތާއި އެ ކެންސަރު ފެނުނު ޢުމުރާ މެދު ހޭލުންތެރިވާން ފެށުމަށް ރަނގަޅު ދުވަސްވަރެކެވެ. ހަމައެއާ އެކު ރަޙިމުގެ ދޮރު ކެންސަރު ސްކްރީނިން 40 އަހަރު ނުވަނީސް ވެސް އަންހެނުންނާ ގުޅެއެވެ.

ތަޖުރިބާކާރު ފާހަގަކުރާ ގޮތުގައި ބަލީގެ ޢަލާމާތެއް ފެންނަ ނަމަ ޢާންމު ސްކްރީނިން ޢުމުރަށް ނުބަލައި ޑޮކްޓަރެއްގެ ލަފާ ހޯދުން މުހިންމެވެ.

ޢާންމު ނުރައްކާ ދަރަޖައިގައި ހުރި އަންހެނުންނަށް އުރަމައްޗާ ގުޅޭ މެމޮގްރަފީ ޓެސްޓު ޚާއްޞަ ގޮތެއްގައި މުހިންމުވާ ޢުމުރަކީ 40ގެ އަހަރުތަކެވެ. އެހެން ނަމަވެސް ބީއާރުސީއޭ ޖީން ބަދަލެއް ހުންނަ ނުވަތަ ޢާއިލީ ތާރީޚެއް ޖީންތަކާ ގުޅޭ ގޮތުން އޮތް އަންހެނުންނަށް 30ގެ ޢުމުރުގައި ވެސް ސްކްރީނިން ފެށުން ޑރ. ސޫދު ލަފާ ދެއެވެ. އޭނާ ބުނި ގޮތުގައި ބީއާރުސީއޭ ޖީން ނުވަތަ ޢާއިލީ ތާރީޚު ފަދަ ނުރައްކާ ފެކްޓާސް ހުރި އަންހެނުންނަށް 30ގެ ޢުމުރުގައި ސްކްރީނިން ފަށަންވާނެ އެވެ. މީގެ ސަބަބުން އެއް ޢުމުރެއްގެ ދެ އަންހެނަކަށް ތަފާތު ސްކްރީނިން ތާވަލެއް ކަނޑައެޅިދާނެއެވެ.

50ގެ ޢުމުރާ ހަމައަށް ދާ އިރު ކޮލޮރެކްޓަލް (ބޮޑު ގޮހޮރު) ކެންސަރު ސްކްރީނިން ކުރުން ރަނގަޅެވެ. ޢާންމު ނުރައްކާ ދަރަޖައިގައި ހުރި ބޮޑެތި މީހުންނަށް މި ސްކްރީނިން ޢާންމުކޮށް ފެށެނީ 45 އަހަރުގައެވެ.

ފުއްޕާމޭ ކެންސަރު ސްކްރީނިން ތަފާތު ވެއެވެ ހަމައެކަނި ޢުމުރު ހަމަވުމުން ނުފުދެއެވެ. ދުންފަތުގެ ދިގު ތާރީޚެއް ހުރުން ޝަރުޠެކެވެ. ޔޫއެސް ޕްރިވެންޓިވް ސާވިސަސް ޓާސްކް ފޯސް އިން ލަފާ ދެނީ 50 އާއި 80 އާ ދެމެދުގެ ޢުމުރުގައި މަދުވެގެން 20 ޕެކް-ޔިއާ ދުންފަތުގެ ތާރީޚެއް ހުރި އަދި މިހާރު ވެސް ދުންފަތް ބޭނުންކުރާ ނުވަތަ ފާއިތުވި 15 އަހަރު ތެރޭ ހުއްޓައިލާފައިވާ ފަރާތްތަކަށް ކޮންމެ އަހަރަކު ލޯ ޑޯޒް ސީޓީ ސްކޭން ހެދުމަށެވެ.

"ހުރިހާ އެއްޗެއް ބެލުމުގެ" ވިސްނުމާ ގުޅޭ ގޮތުން ޑރ. ސޫދު ބުނީ "ދުޅަހެޔޮ ޞިއްޙަތެއްގައި ހުންނަ މީހުން ރޫޓީންކޮށް މުޅީ ހަށިގަނޑު ނުވަތަ ޓިއުމާ މާކާ ޕެނަލް ހަދަންވީ އެއްވެސް ސަބަބެއް ނެތް" ކަމަށެވެ. ބޭނުން ނެތް ގިނަ ޓެސްޓު ހެދުމުން ބިރުވެރި ކެހި ނަތީޖާތަކާއި ބޭކާރު އިތުރު ޕްރޮސީޖާތައް ކުރިމަތިވެދާނެއެވެ.

ޑރ. ސޫދު ލަފާ ދިނީ ޢާއިލީ ތާރީޚު ދެނެގަނެ ޑޮކްޓަރާ މަޝްވަރާކޮށް ހެއްކަށް ބިނާވެފައިވާ ރެކޮމެންޑޭޝަންތަކުގެ މައްޗަށް ފަރުދީ ނުރައްކާ ދަރަޖައާ އެކީ ސްކްރީނިން ޕްލޭން ރާވައިގެން ކުރިއަށް ގެންދިޔުމަށެވެ.