ހައި ސްކޫލް ޑިޕްލޮމާ ނެތްކަން ސާބިތުވުމުން އިންޑޮނީޝިއާގެ ނައިބު ރައީސް އިސްތިއުފާ ދީފި

ތަޢުލީމީ ސެޓެފިކެޓާ ގުޅިގެން އުފެދުނު ޤާނޫނީ މައްސަލައެއްގެ ތެރެއިން އިންޑޮނީޝިއާގެ ނައިބު ރައީސް ގިބްރާން ރަކަބުމިންގް ރަކާ ބުރާސްފަތި ދުވަހު މަގާމުން އިސްތިއުފާ ދީފިއެވެ.

ޢުމުރުން 39 އަހަރުގެ ގިބްރާނަކީ އިންޑޮނީޝިއާގެ ކުރީގެ ރައީސް ޖޯކޯ ވިޑޯޑޯގެ ދޮށީ ދަރިފުޅެވެ. ފަސް އަހަރުގެ ދައުރަކުން ދެ އަހަރު ފުރިހަމަކުރުމަށްފަހު ގިބްރާން އިސްތިއުފާ ހުށަހެޅީ ރައީސް ޕްރަބޯވޯ ސުބިއާންތޯއަށާއި ޕާލަމެންޓަށް ކަމަށް، ޕީޕަލްސް ކޮންސަލްޓެޓިވް އެސެމްބްލީގެ ރައީސް ނޫސްވެރިންނަށް މަޢުލޫމާތު ދެމުން ބުނެފައިވެއެވެ.

އޭގެ ގަޑިތަކެއް ފަހުން ރިޔާސީ ގަނޑުވަރުގައި ގިބްރާނާ އެކު ބޭއްވި ނޫސް ކޮންފަރެންސެއްގައި ރައީސް ޕްރަބޯވޯ ބުނީ "ހިތާމައާ" އެކު އެ އިސްތިއުފާ ޤަބޫލުކޮށްފައިވާ ކަމަށެވެ.

މި މައްސަލަ ފެށުނީ ގިބްރާން ބޭރު ޤައުމަކުން ހާސިލްކުރި ކަމަށް ބުނެ ހުށަހެޅި ހައި ސްކޫލް ލިޔެކިޔުންތައް އިންތިޚާބީ ޝަރުތުތައް ފުރިހަމަ ނުކުރާ ކަމަށް މިދިޔަ މަހު ކޮންސްޓިޓިއުޝަނަލް ކޯޓާއި ސުޕްރީމް ކޯޓުން ނިންމުމާ ގުޅިގެންނެވެ. ގިބްރާނަށް ހައި ސްކޫލް ޑިޕްލޮމާ ލިބިފައި ނެތް ކަމަށް ފާޑުކިޔާ ފަރާތްތަކުން ތުހުމަތުކޮށްފައިވެއެވެ.

އެ ކޯޓު ނިންމުންތަކާ ގުޅިގެން ބުދަ ދުވަހު އަށް ޕާޓީއެއްގެ 120 މެންބަރުން ގުޅިގެން ގިބްރާން ޢިމްޕީޗް ކުރުމުގެ ޕާލަމެންޓަރީ ޕްރޮސެސް ފެށުމަށް ހައުސް ލީޑާޝިޕަށް ޕެޓިޝަނެއް ހުށަހެޅިއެވެ.

އިސްތިއުފާއާ ގުޅިގެން ކުރީގެ ރައީސް ވިޑޯޑޯ ބުނީ "ސިޔާސީ މަގާމުތަކުގައި ސިޔާސީ ހަލަބޮލިކަން އޮންނާނެ ކަމަށާއި އެއީ ޠަބީޢީ ކަމެއް" ކަމަށެވެ. އަދި ސިޔާސީ މަގާމުތަކަކީ ވަގުތީ އެއްޗެއް ކަން ދަރިފުޅަށް ހަނދާންކޮށްދީފައިވާ ކަމަށާއި، "ޢާންމު ރައްޔިތުންގެ ލާބައަށް ކުރިއަށް ގެންދާ ޕްރޮގްރާމްތަކަށް ރައީސް ޕްރަބޯވޯގެ ސަރުކާރަށް ތާއީދުކުރާނެ" ކަމަށް ވެސް ބުންޏެވެ.

އިންޑޮނީޝިއާގެ ޤާނޫނުއަސާސީ ބުނާ ގޮތުން ނައިބު ރައީސްގެ މަގާމު ހުސްވިޔަސް އައު އިންތިޚާބެއް ނުބާއްވައެވެ. ރައީސް ހުށަހަޅާ ދެ ކެންޑިޑޭޓެއްގެ ތެރެއިން ޕީޕަލްސް ކޮންސަލްޓެޓިވް އެސެމްބްލީން 60 ދުވަހުގެ ތެރޭގައި ބަދަލު ހޮވަންޖެހެއެވެ. ގިބްރާންގެ އިސްތިއުފާ އައީ އިޤުތިޞާދީ ދަތިކަމާއި ކޮރަޕްޝަނާއި ޖަންގަލީގެ ނުރައްކާތެރި އަލިފާނުން އެތައް ހާސް ބަޔަކު ބަލިވެ، ރައްޔިތުން މަގުތަކަށް ނިކުމެ މުޒާހަރާ ކުރަމުންދާ ދަނޑިވަޅެއްގައެވެ.