ޝަރުތުތަކާއި އެކު ސާފު ޖަވާބު ފޮނުވައިފިން، މިހާރު ބޯޅަ އޮތީ އެމެރިކާ ކޮޅުގައި: އިރާން

އެމެރިކާ އާއި އެކު އެއްބަސްވުމަކަށް އައުމަށް އީރާނުން އެ ޤައުމުގެ ޝަރުތުތައް ހިމެނޭ ސާފު ޖަވާބެއް ފޮނުވާފައިވީ ނަމަވެސް އެމެރިކާގެ ފަރާތުން ރަސްމީ ޖަވާބެއް އަދި ނުލިބޭ ކަމަށް އީރާނުގެ ޕާލަމެންޓުގެ ރައީސް އަދި ޗީފް ނެގޯޝިއޭޓަރު މުޙައްމަދު ބާޤިރް ޤާލީބާފް ބުނެފިއެވެ.

މީޑިއާގައި ޤާލީބާފް ބުނީ ޤަޠަރު މެދުވެރިކޮށް އީރާނުގެ ޖަވާބު ފޮނުވާފައިވާ ކަމަށާއި، ގޮތެއް ނިންމުން މިހާރު އޮތީ އެމެރިކާގެ އަތުގައި ކަމަށެވެ. "ބޯޅަ މިހާރު އޮތީ އެމެރިކާ މީހުންގެ ކޯޓުގައެވެ. އެ މީހުން ނިންމުމެއް ނިންމައި އެކަން އިޢުލާނުކުރަން ޖެހެއެވެ،" ޤާލީބާފް ބުނެފައިވެ އެވެ.

އެމެރިކާއިން ޝަރުތުތައް ޤަބޫލުކޮށްފި ނަމަ ސުލްޙައަށް އީރާނުން އިސްކަން ދޭނެ ކަމަށާއި، އެތައް ދުވަހެއް ވަންދެން ދިގުދެމިގެންދާ ހަނގުރާމަ ކުރިއަށް ގެންދަން އިރާނުން ނޭދޭ ކަމަށް ޤާލީބާފް ބުންޏެވެ. ނަމަވެސް ޑޮނާލްޑް ޓްރަމްޕް ހަމަލާ ބަދަލުކުރުން އަލުން ފަށައިފި ނަމަ ވޮޝިންގޓަނަށް އިތުރު ނާކާމިޔާބީއަކާ ކުރިމަތިލާން ޖެހޭނެ ކަމުގެ އިންޒާރު ވެސް ދިނެވެ. "އެމެރިކާ ނުވަތަ އިސްތިއުމާރީ އިޒްރޭލުން ހަނގުރާމައެއް ފެށިއްޖެ ނަމަ، ދެ ބައި މީހުންނާ ކުރިމަތިލައި ކޮންމެ ހަމަލާއަކަށް ރައްދު ދޭނެ،" ޤާލީބާފް ބުންޏެވެ.

ހޮރުމޫޒް ކަނޑުއޮޅި އަލުން ހުޅުވައިލުމާއި ސީދާ މަޝްވަރާ ފެށުމަށް ކުރިން ހަތް ޝަރުތެއް އެމެރިކާއިން ފުރިހަމަކުރަން ޖެހޭ ކަމަށް ޤާލީބާފް ތަކުރާރުކުރިއެވެ. އޭގެ ތެރޭގައި އެމެރިކާއިން އެ ސަރަހައްދުގެ ކަނޑު ހިސާރު ކުރުން ހުއްޓާލުމާއި ތެލަށް އަޅާފައިވާ ދަތިކުރުމުގެ ފިޔަވަޅުތައް ހުއްޓައިލުން ހިމެނެ އެވެ.

އަދި ހިފެހެއްޓިފައިވާ އީރާނުގެ މުދާ ދޫކުރުމާއި، "މުޤާވަމާ ފްރޮންޓް" ހިމެނޭ ގޮތަށް ހުރިހާ މައިދާނެއްގައި ހަނގުރާމަ ހުއްޓައިލުމާއި، ހަނގުރާމަ ހުއްޓައިލުމުގެ އެއްބަސްވުމެއްގެ ބަދަލުގައި ހަނގުރާމަ ނިމުމެއް ރަސްމީކޮށް އިޢުލާނުކުރުން ހިމެނެ އެވެ. އީރާނުގެ ދާޚިލީ ކަންކަމާ ނުބެހުން ވެސް ޝަތުތެއްގެ ގޮތުގައި ހިމަނާފައިވެ އެވެ.

އިސްލާމާބާދުގައި ވޮޝިންގޓަނާ އެކު އެއްބަސްވެވުނު ކަމަށް ބުނާ އެމްއޯޔޫގައި މި ޝަރުތުތައް ހިމެނޭ ކަމަށާއި، މަޝްވަރާ ފެށުމުގެ ކުރިން އިތުބާރު ޤާއިމުކުރަން މި ކަންކަން ތަންފީޒުކުރަން ޖެހޭ ކަމަށް ބުންޏެވެ.

ޢޮމާނާ އެކު ބައިނަލްއަޤުވާމީ ޤާނޫނާ އެއްގޮތަށް ހޮރުމޫޒް ކަނޑުއޮޅީގައި ދަތުރުކުރުމުގެ އައު ނިޒާމެއް ރާވައި، ވޮޝިންގޓަނާ ސީދާ ނޫން ގޮތެއްގައި މަޝްވަރާކުރެވެމުންދާ ކަމަށް ވެސް ޤާލީބާފް ބުންޏެވެ. އޭނާ ތުހުމަތުކުރި ގޮތުގައި އެމެރިކާގެ ޙިޞާރުގެ ސަބަބުން ކާބޯތަކެއްޗާއި ޞިއްޙީ ޚިދުމަތާއި ވިޔަފާރިއަށް ހުރަސް އެޅެއެވެ. ހާލަތު "ހަނގުރާމައެއް ނެތް، ސުލްޙައެއް ނެތް" ގޮތަށް ދެމިގެންދިޔަ ނުދީ، މަޝްވަރާ ނުވަތަ ދެމެހެއްޓެނިވި ޑީޓެރެންސް މެދުވެރިކޮށް އެ ހާލަތު ބަދަލުކުރަން ތެހެރާން ޢަޒުމު ކަނޑައަޅާފައިވާ ކަމަށް ޤާލީބާފް ބުންޏެވެ.