N/A
މި އަހަރުގެ ޖެނުއަރީ މަހުން ސެޕްޓެމްބަރު މަހުގެ ނިޔަލަށް މުދަލު ޒަކާތުގެ ގޮތުގައި ދައުލަތަށް 104 މިލިޔަން ރުފިޔާ ލިބިފައިވާ ކަމަށް މީރާގެ ތަފާސް ހިސާބުތަކުން ދައްކައިފިއެވެ.
މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން އާންމުކުރި ސެޕްޓެމްބަރު މަހުގެ މާލީ ރިޕޯޓުން ފެންނަ ގޮތުގައި މިދިޔަ އަހަރުގެ އެ މުއްދަތުގައި ޒަކާތުން ލިބުނީ 87.8 މިލިޔަން ރުފިޔާ ކަމަށްވާތީ، މި އަހަރު ލިބުނު އަދަދަކީ %24 ގެ ކުރިއެރުމެކެވެ. ސެޕްޓެމްބަރު މަހަށް ވަކިން ބަލާއިރު، އެ މަހު ޒަކާތުގެ ގޮތުގައި ވަނީ 5.6 މިލިޔަން ރުފިޔާ ލިބިފައެވެ. ނަމަވެސް މިދިޔަ އަހަރުގެ ސެޕްޓެމްބަރު މަހު ލިބިފައިވާ 5.2 މިލިޔަން ރުފިޔާއާ އަޅައިބަލާއިރު އެއީ ދަށް އަދަދެކެވެ.
މުދަލު ޒަކާތް ނެރުން ވާޖިބުވާ ނިސާބު މިދިޔަ އޮގަސްޓް 20 ވަނަ ދުވަހުން ފެށިގެން ކަނޑައަޅާފައި ވަނީ 19،266.10 ރުފިޔާގައެވެ. ތިމާގެ މުދަލުގައި ނިސާބު ހަމަވެ އެ ހާލަތުގައި އަހަރެއް ފުރުމުން ޒަކާތް ދެއްކުމަކީ ކޮންމެ މުސްލިމެއްގެ މައްޗަށް އޮންނަ ދީނީ ވާޖިބެކެވެ. އަހަރުގެ ކޮންމެ ދުވަސްވަރެއްގައި ވެސް މި ވާޖިބު އަދާކުރެވޭނެއެވެ.
2016 ވަނަ އަހަރުގެ ޖޫން އެކަކުން ފެށިގެން މުދަލު ޒަކާތް ބަލައިގަތުމުގެ ޒިންމާ ހަވާލުވެފައި ވަނީ މީރާއާއެވެ. މާލޭގައި ހުންނަ ސާވިސް ސެންޓަރުގެ އިތުރުން އަތޮޅުތެރޭ ބްރާންޗުތަކާއި ކަލެކްޝަން ސެންޓަރުތަކުން ވެސް ޒަކާތް ބަލައިގަނެއެވެ. މީރާގެ ސެންޓަރެއް ގާއިމުކޮށްފައި ނެތް ރަށްރަށުގައި ރަށު ކައުންސިލް މެދުވެރިކޮށް ވެސް ޒަކާތް ދެއްކޭނެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް