ފެލިވަރުގައި ޤާއިމްކުރި މަސްވެރިންގެ މެރީނާ، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް މިއަދު މެންދުރު ހުޅުއްވައިދެއްވައިފިއެވެ.
މި މެރީނާ ހުޅުއްވައިދެއްވުމަށްފަހު ރައީސް ޔާމީން ވިދާޅުވީ މަސްވެރިންގެ މެރީނާއަކީ މަސްވެރިންނަށް ފަސޭހަކަން ހޯދައިދިނުމަށް ސަރުކާރުގެ މެނިފެސްޓޯގައި ހިމަނުއްވާފައިވާ ވަޢުދެއް ފުއްދައިދިނުމަށްޓަކައި، ސަރުކާރުން ކުރެއްވެވި މަސައްކަތެއްކަމަށެވެ. އަދި ރާއްޖޭގެ މަސްވެރިކަމުގެ ސިނާޢަތް ކުރިއެރުވުމަށް އެމަނިކުފާކުގެ މެނިފެސްޓޯގައި ހިމަނުއްވާފައިވާ ކަންތައްތައްތަކެއް ޙާސިލުވެގެންދާތަން ފެނުމަކީ އެމަނިކުފާނު ނުހަނު އުފާފުޅުކުރައްވާކަމެއް ކަމުގައިވެސް ބަޔާންކުރެއްވިއެވެ. މިގޮތުން، މިއަދު ފެލިވަރުގައި ހުޅުވިގެންދިޔަ ރާއްޖޭގެ ފުރަތަމަ މަސްވެރިންގެ މެރީނާއަކީ، މަސްވެރިން ފެލިވަރަށް އައިސް ބަނދަރުކުރުމުން އެތަކެއް ފަސޭހަތަކާއި، ތަފާތު ޚިދުމަތްތަކެއް ލިބިގެންދާނެ ވަޞީލަތެއްކަމުގައި އެމަނިކުފާނު ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވާހަކަފުޅުގައި، ދިވެހި ސަރުކާރުގެ ހަކަތައާއި ހިތްވަރަކީ ދިވެހި ޒުވާނުންކަމުގައި ސިފަކުރައްވަމުން، އެކި ސިނާޢަތްތަކުގައި ޒުވާން ފަންނުވެރިން އުފެއްދެވުމަށް ސަރުކާރުން ދެއްވަވާ އިސްކަމުގެ މައްޗަށް އަލިއަޅުއްވައިލެއްވިއެވެ. މިގޮތުން، މަސްވެރިންގެ މެރީނާ ހުޅުވިގެންދިއުމަކީ މަސްވެރިކަމުގެ ސިނާޢަތަށް ދިވެހި ޒުވާނުން ނެރުމަށްޓަކައި ސަރުކާރުން ކުރައްވާ މަސައްކަތްތަކަށް މަގުފަހިކޮށްދޭނެ ކަމެއްކަމުގައި އެމަނިކުފާނު ފާހަގަކުރެއްވިއެވެ. މީގެއިތުރަށް، ޒުވާނުން މުނިފޫހިފިލުވުމަށާއި، މިދާއިރާއަށް ޝަޢުގުވެރިކަން އިތުރުކޮށްދޭނެ ފަދަ އެތައްކަމެއް މި މެރީނާގައި އެކުލެވިގެންވާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.
ރައީސް ޔާމީން އިތުރަށް ވިދާޅުވީ މަސްނުބާނާ ދުވަސްތަކުގައި މަސްވެރިންގެ އާއިލާތައް ބަލަހައްޓައިދޭނެ ރައްކާތެރި ނިޒާމެއްގެ ޤާއިމްވެގެން މެނުވީ، ދެމެހެއްޓެނިވި ގޮތެއްގައި މަސްވެރިކަމުގެ ސިނާޢަތު ކުރިއަށް ގެންދެވޭނެކަމަކަށް މިސަރުކާރުން ޤަބޫލުފުޅު ނުކުރައްވާކަމުގައި ވިދާޅުވިއެވެ. މިމޭރުމުން އެމަނިކުފާނުގެ ވާހަކަފުޅު ކުރިއަށް ގެންދެވަމުން، މަސްވެރިންނަށް ރައްކާތެރިކަން ހޯދައިދިނުމަށްޓަކައި އެމަނިކުފާނުގެ ސަރުކާރުން ތަޢާރަފުކޮށްފައިވާ 'ބެޔަސް ނުބެޔަސް' މަސްވެރިންގެ އިންޝިއުރަންސް ސްކީމުގައި ދޯނިފަހަރު ރަޖިސްޓަރީކުރުމުގެ މަސައްކަތް މެކުހަށް ޖެހުމަށް އިލްތިމާސްކުރެއްވިއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް