ދައުލަތުގެ 2027 ވަނަ އަހަރުގެ ބަޖެޓާ ގުޅޭގޮތުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު ލަފާގައި، ޚަރަދު ކުޑަކުރުމާއި އާމްދަނީ އިތުރުކުރުމާއި މާލީ ނިޒާމު ހަރުދަނާކުރުމަށް ބާރުއަޅައިފިއެވެ.
އެ އޮތޯރިޓީން ފާހަގަކޮށްފައިވާ ގޮތުގައި، އަންނަ އަހަރަށް ހުށަހަޅާ 59.7 ބިލިއަން ރުފިޔާގެ ބަޖެޓުގައި 9.4 ބިލިއަން ރުފިޔާގެ ޑެފިސިޓެއް އެކުލެވިގެންވެއެވެ. ޖީޑީޕީގެ ނިސްބަތުން ބަލާއިރު އެއީ ހަތް އިންސައްތައެވެ. ބަޖެޓުގެ ބޮޑު ބައެއް ހިއްސާކުރަނީ ރިކަރަންޓް ޚަރަދުތައް ކަމަށާއި، މުވައްޒަފުންގެ މުސާރައާއި އިނާޔަތްތަކާއި ދުވަސްވީ މީހުންގެ ޕެންޝަނާއި ސަބްސިޑީ ފަދަ ކަންކަމަށް އެކަނި 42.7 ބިލިއަން ރުފިޔާ ހޭދަވާނެ ކަމަށް ބަޖެޓުގައި ލަފާކޮށްފައިވެއެވެ.
ޚަރަދު ކޮންޓްރޯލް ކުރުމުގެ ގޮތުން އެމްއެމްއޭ އިން ލަފާދީފައިވަނީ ކަރަންޓުގެ ސަބްސިޑީ ޙަޤީޤަތުގައި ބޭނުންޖެހިފައިވާ ފަރާތްތަކަށް ޚާއްޞަ ކުރުމަށާއި، އިއާދަކުރަނިވި ހަކަތައިގެ މަޝްރޫޢުތައް ހަލުވިކުރުމަށާއި، ޞިއްޙީ ދާއިރާއަށް ރޭވިފައިވާ މާލީ ބަދަލުތައް ޢަމަލީ ގޮތުން ހިންގުމަށެވެ. ހަމައެއާއެކު، ތަރައްޤީގެ މަޝްރޫޢުތައް ކުރިއަށް ގެންދާއިރު، މި ދަނޑިވަޅުގައި އެންމެ ބޮޑަށް ބޭނުންވާ މަޝްރޫޢުތައް އިސްކުރުމަށް ވެސް ލަފާދީފައިވެއެވެ.
މީގެ އިތުރުން، އިޤުތިޞާދު ސިންދަފާތުކުރުމާއި ފަތުރުވެރިކަމުގެ ދާއިރާ ދެމެހެއްޓެނިވި ގޮތެއްގައި ކުރިއެރުވުމާއި، ދައުލަތަށް ލިބޭ އާމްދަނީގެ ވަސީލަތްތައް އިދާރީ ގޮތުން ރަނގަޅަށް ބެލެހެއްޓުމުގެ މައްޗަށް ވެސް އެ އޮތޯރިޓީން އިރުޝާދު ދީފައިވެއެވެ.
ޖުމްލަ ގޮތެއްގައި، ދިގު ރާސްތާގެ އިޤުތިޞާދީ ހަމަޖެހުން ޔަގީންކުރެވޭނީ ދެމެހެއްޓެނިވި މާލީ އިސްލާހުތައް އެކީއެކައްޗަކަށް ތަންފީޒުކޮށްގެން ކަމަށް އެމްއެމްއޭ އިން ބުނެފައިވެއެވެ. ސަރުކާރުގެ މެދު ރާސްތާގެ މާލީ ލަނޑުދަނޑިތައް ހާސިލުކުރެވޭނީ މި ލަފާގައި ހިމެނޭ ފިޔަވަޅުތައް ޢަމަލީ ގޮތުން ބާރު ދުވެއްޔެއްގައި ތަންފީޒުކޮށްގެންނެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް