އީރާނަށް ހަމަލާދޭން ފެށުމަށް ނަތަންޔާހޫ ކޮންމެ ދުވަހަކު ޓްރަމްޕަށް ގުޅާ ކަމަށް ވެއްޖެ

އީރާނާ ދެކޮޅު ހަނގުރާމައިގައި ހަމަލާތައް އަލުން ފެށުމަށް އިސްތިއުމާރީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ކޮންމެ ދުވަހަކު ހެން އެމެރިކާގެ ރައީސް ޑޮނަލްޑް ޓްރަމްޕަށް ފޯނުން ގުޅައި ބާރު އަޅަމުންދާ ކަމަށް ފައިނޭންޝަލް ޓައިމްސް އިން ރިޕޯޓުކޮށްފިއެވެ.

އެ ނޫހާ ވާހަކަ ދެއްކި، މި މަޝްވަރާތަކުގެ މަޢުލޫމާތު ލިބިފައިވާ ފަރާތަކުން ބުނީ "ނަތަންޔާހޫ ކޮންމެ ދުވަހަކު ޓްރަމްޕަށް ގުޅައި ހަނގުރާމަ އަލުން ފެށުމަށް ބާރު އަޅާ ކަމަށާއި، ވައިޓް ހައުސް ތެރެއިންނާއި ބޭރުން ހަނގުރާމައާ ދެކޮޅު ފަރާތްތައް އެކަމާ ދެކޮޅަށް މަސައްކަތް ކުރަމުންދާ" ކަމަށެވެ. ނަމަވެސް ޓްރަމްޕް ވަނީ އީރާނަށް އިތުރު ހަމަލާއެއް ދިނުން "ނެތް ކަމެއް" ކަމަށް ބުނެފައެވެ.

ނަތަންޔާހޫ މިގޮތަށް ބާރު އަޅަމުންދާ ދަނޑިވަޅުގައި ޢަރަބި ލީޑަރުން ދަނީ ޓްރަމްޕަށް ޑިޕްލޮމެސީގެ މަގު ޚިޔާރުކޮށް ހަނގުރާމަ ނިންމައިލުމަށް ގޮވައިލަމުންނެވެ. ޤަޠަރުގެ ބޮޑުވަޒީރު ޝެއިޚް މުޙައްމަދުގެ އިތުރުން ސަޢޫދީ ވަލީ ޢަހުދު މުޙައްމަދު ބިން ސަލްމާނާއި، ޔޫއޭއީގެ ރައީސް ޝެއިޚް މުޙައްމަދު ބިން ޒައިދު އަލް ނަހްޔާނާއި، ތުރުކީގެ ރައީސް ރަޖަބް ޠައްޔިބް އެރްދޮޣާން ވެސް ވަނީ އެ ގޮވައިލުމުގައި ބައިވެރިވެފައެވެ.

ވައިޓް ހައުސްގެ އޮފިޝަލުން އެކްސިއޮސްއަށް ބުނެފައިވާ ގޮތުގައި، އެމެރިކާގެ މިޑްޓާމް އިންތިޚާބުގެ ނަތީޖާ ލިބުމާ އެކު ނަތަންޔާހޫ ވަނީ ޓްރަމްޕް ގާތު ވަގުތުން އީރާނަށް ހަމަލާ ދިނުމަށް އެދިފައެވެ. އެހެން ނަމަވެސް ޓްރަމްޕް ނިންމީ މަޝްވަރާތައް ކުރިއަށް ގެންދިއުމަށެވެ. އެކްސިއޮސް ރިޕޯޓުކުރާ ގޮތުގައި މީގެ ކުރީ ހަފުތާގައި ދެ ލީޑަރުން ކުރި ފޯނު ކޯލް އެމެރިކާ އޮފިޝަލުން ސިފަކުރީ "ސީދާ ތެދު ވާހަކައެއް" ގެ ގޮތުގައެވެ.

ހޯމަ ދުވަހު ވައިޓް ހައުސްގައި ބޭއްވި ނޫސް ކޮންފަރެންސެއްގައި ޓްރަމްޕް ބުނީ "އީރާން އަސްކަރީ ގޮތުން ޢަމަލީ ގޮތެއްގައި ނިމިއްޖެ" ކަމަށާއި "މިހާރު ކުރާ ކަމަކީ ހާލަތު އެގޮތުގައި ދެމެހެއްޓުން" ކަމަށެވެ. ޓްރަމްޕް މި ވާހަކަ ދެއްކީ ޤަޠަރުގެ ބޮޑުވަޒީރާ އެކު ހަނގުރާމަ ނިންމައިލުމުގެ ޑްރާފްޓް ހުށަހެޅުމާ ގުޅޭ ބައްދާރެއް ބެނެވެންދެންނެވެ. ޓްރަމްޕް ބުނީ "ކުދިކުދި ހަމަލާތަކެއް ދޭ ކަމަށާއި، އީރާނުން ކުޑަވަރެއްގެ ދިފާޢީ ނިޒާމެއް ބެހެއްޓީމާ 15 ވަރަކަށް މިނެޓުން ނުވަތަ ފަހެއް މިނެޓުން އެ ނައްތައިލި" ކަމަށެވެ.

މިހާރު އޮތް ޑްރާފްޓް ހުށަހެޅުމުގެ ދަށުން، ހޮރްމޫޒް ކަނޑުއޮޅިން މިނިވަންކޮށް އުޅަނދުފަހަރު ދަތުރުކުރެވޭނެ ގޮތް ހެދުމަށް އީރާން ތައްޔާރު ކަމަށާއި، އެކަމުގެ ބަދަލުގައި އީރާނުގެ ބަނދަރުތަކުގެ ބަންދު އުވައިލުމާއި، ބޭރު ޤައުމުތަކުގައި ހިފެހެއްޓިފައިވާ އީރާނުގެ ފައިސާ ދޫކުރުމާއި، ނިއުކްލިއާ މައްސަލަ ވެސް ހިމެނޭ ގޮތަށް ދާއިމީ އެއްބަސްވުމެއްގެ މަޝްވަރާ ފެށުމަށް އީރާނުން ހުށަހަޅާފައިވެއެވެ. ނަތަންޔާހޫގެ މި ގޮވައިލުންތައް އައިސްފައި ވަނީ، މިޑްޓާމް އިންތިޚާބުގައި ރިޕަބްލިކަން ޕާޓީ ކޮންގްރެސްގެ ބާރު ގެއްލުމުގެ މައި ސަބަބަކަށް މި ހަނގުރާމަ ވެފައިވާ ދަނޑިވަޅެއްގައެވެ. ހަމައެއާ އެކު، އިޒްރޭލުގެ އިންތިޚާބު ވެސް ނަތީޖާއެއް ނުނިކުމެ ހަމަހަމައަކަށް ގޮސްފައިވާ އިރު، ނަތަންޔާހޫގެ ލިކޫޑް ޕާޓީއަށް ކޮންގްރެސްގެ އަޣުލަބިއްޔަތު ހޯދޭ ގޮތެއް ނުވިއެވެ.