N/A
ޖަމާލުއްދީން ސްކޫލުގެ ގްރޭޑް 8 ގައި ކިޔަވަމުންދާ ގާތްގަނޑަކަށް 300 ދަރިވަރުންނަށް އަމާޒުކޮށް ދިވެހިރާއްޖޭގެ ގައުމީ ޔުނިވަރސިޓީ (އެމްއެންޔޫ) އިން ކެރިއާ ގައިޑެންސް ސެޝަނެއް ހިންގައިފިއެވެ.
މި ސެޝަނުގައި އެމްއެންޔޫގެ ކެރިއާ ގައިޑެންސް ދާއިރާގެ ތަޖުރިބާކާރުން ވަނީ މަތީ ސާނަވީ ސްޓްރީމް ކަނޑައެޅުމުގައި ވިސްނަންޖެހޭ ކަންކަމާއި ދަރިވަރުންގެ ޝައުގާއި ގާބިލުކަމާ ގުޅޭ ދާއިރާތައް ދެނެގަންނާނެ ގޮތްތައް ކިޔައިދީފައެވެ. އެ ދަރިވަރުންނާ އެކު ކުރިއަށް ގެންދިޔަ ބައިވެރިވެވޭ ގޮތަށް ތައްޔާރުކޮށްފައިވާ މަޝްވަރާތަކުގެ ތެރެއިން ތައުލީމީ ހިޔާރުތަކާއި ހުނަރު ކުރިއެރުވުމާއި ވަޒީފާގެ ފުރުސަތުތަކާ ހުރި ގުޅުން ވެސް ވަނީ ސާފުކޮށްދީފައެވެ.
މި ހަރަކާތުގެ ބޭނުމަކީ ދަރިވަރުން ތައުލީމީ ގޮތުން ކުރިއަށް ދާނެ ރޮނގާއި މުސްތަގުބަލުގެ ވަޒީފާއާ ގުޅޭ ގޮތުން ހޭލުންތެރި ނިންމުންތައް ނިންމުމަށް މަގުފަހިކޮށްދިނުމެވެ. އެމްއެންޔޫ އިން ބުނި ގޮތުގައި ސްކޫލްތަކާ ގުޅިގެން މި ފަދަ ޕްރޮގްރާމްތައް ހިންގުމުގެ މައިގަނޑު މަގްސަދަކީ ޒުވާނުންނަށް ބޭނުންވާ މައުލޫމާތާއި އިތުބާރާއި އިރުޝާދު ފޯރުކޮށްދީ މުސްތަގުބަލު އުޖާލާކުރުމަށް ބާރުވެރިކޮށްދިނުމެވެ.
މި އިސްނެގުމަކީ އދ. ގެ ދެމެހެއްޓެނިވި ތަރައްގީގެ ލަނޑުދަނޑިތަކާ (އެސްޑީޖީސް) ވެސް ގުޅިފައިވާ ކަމެއް ކަމަށް އެ ޔުނިވަރސިޓީން ފާހަގަކޮށްފައިވެއެވެ. އެ ގޮތުން ފެންވަރު ރަނގަޅު ތައުލީމު ފޯރުކޮށްދިނުމާ ގުޅޭ ލަނޑުދަނޑި 4 އާއި އެކަށީގެންވާ ވަޒީފާއާއި އިގްތިސާދީ ކުރިއެރުމާ ގުޅޭ ލަނޑުދަނޑި 8 އާއި ހަމަހަމަކަމާ ގުޅޭ ލަނޑުދަނޑި 10 ގެ އިތުރުން ތައުލީމީ މުއައްސަސާތަކުގެ ގުޅުން ވަރުގަދަ ކުރުމަށް ބާރު އަޅާ ލަނޑުދަނޑި 17 ހާސިލުކުރުމަށް މި ފަދަ ހަރަކާތްތައް އެހީތެރިވެދޭ ކަމަށް ބުނެފައިވެއެވެ. ސާނަވީ ތައުލީމުން މަތީ ތައުލީމާއި ވަޒީފާގެ މާހައުލަށް ދަރިވަރުން ބަދަލުވާ މަރުހަލާ ހަރުދަނާ ކުރުމަށް އެމްއެންޔޫ އިން މި ފަދަ ޕްރޮގްރާމްތައް ސްކޫލްތަކާ ގުޅިގެން ކުރިއަށް ގެންދިއުމަށް ރާވާފައިވެއެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް