ރަޝިޔާގައި އަންނަ އަހަރުގެ ޖޫން މަހުގެ 14 ވަނަ ދުވަހު ފެށުމަށް ހަމަ ޖެހިފައިވާ ފީފާ ވޯލްޑް ކަޕްގެ ގުރު ރޭގައި ނެގިއިރު އިންގްލެންޑަށް ވަރުގަދަ ބެލްޖިއަމްއާ ކުރިމަތިލާން ޖެހި، ޔޫރަޕުގެ އެންމެ ފަހުގެ ދެ ޗެމްޕިއަނުން ކަމަށްވާ ސްޕެއިންނާއި ޕޯޗުގަލް އެއް ގްރޫޕަކަށް ލައްވާލައިފިއެވެ.
ބައިނަލް އަގުވާމީ ފުޓްބޯޅައިގައި ފަހުގެ ތާރީޚުގައި ކާމިޔާބީއެއް ހޯދިފައިނެތް އިންގްލެންޑްގެ ޓީމަށް ބެލްޖިއަމްއާ ޖެހުމަކީ ވޯލްޑް ކަޕްގެ ގްރޫޕް ސްޓޭޖްގައި ކުރިމަތިވާނެ އެންމެ ބޮޑު އިންތިހާނެވެ. ބެލްޖިއަމް އަކީ އިނގިރޭސި ލީގުގައި ކުޅޭ ހުނަރުވެރި، ރޮމެލޫ ލުކާކޫ، ތިބެއޯ ކޯޓުއަސް އަދި ކެވިން ޑި ބްރޭނާ ފަދަ ކުޅުންތެރިން ކުޅުންތެރިންނާއެކު މިފަހުން ވަރަށް ވަރުގަދަކޮށް ފެންނަ ޓީމެކެވެ. އަނެއްކޮޅުން އިންގްލެންޑުން އޮތީ ޒުވާން ހުނަރުވެރި ކުޅުންތެރިންނާއެކު ކާމިޔާބީއެއް ހޯދުމަށް ކެތްމަދުވެފައެވެ.
ރޭގެ ގުރުގައި ދެން އެންމެ ފާހަގަކޮށްލެވުނީ ޔޫރޯ މުބާރާތުގެ އެންމެ ފަހުގެ ދެ ޗެމްޕިއަން ކަމަށްވާ ސްޕެއިން އާއި ދުނިޔޭގެ އެންމެ މޮޅު ކުޅުންތެރިޔާގެ މަގާމު ދިފާޢު ކޮށްފައިވާ ރޮނާލްޑޯގެ ޕޯޗުގަލް އެއް ގްރޫޕަކަށް ލައްވާލުމެވެ. ކޮލިފައިންގައި ވަރަށް ރަނގަޅު ނަތީޖާތަކެއް ހޯދާފައި އޮތް ސްޕެއިންއަށް ޔޫރަޕްގެ އެންމެ ފަހުގެ ޗެމްޕިއަން ޕޯޗުގަލްއާ ދެކޮޅަށް ނުކުންނަން ޖެހޭނީ ގްރޫޕް ބީ ގެ ފުރަތަމަ މެޗުގައެވެ.
މިފަހަރުގެ ވޯލްޑްކަޕް ހުޅުވާ މެޗުގައި ވާދަކުރާނީ މުބާރާތް ބާއްވާ ގައުމު ރަޝިޔާ އާއި ސައޫދީ ޢަރަބިޔާ އެވެ. މިއީ ވޯލްޑްކަޕް ހުޅުވާ މެޗެއްގައި އޭޝިޔާގެ ގައުމެއް ވާދަކުރާނެ ފުރަތަމަ ފަހަރެވެ. މި މެޗު ފެށޭނީ 2018 ވަނަ އަހަރުގެ ޖޫން މަހުގެ 14 ވަނަ ދުވަހު ދިވެހިރާއްޖެ ގަޑިން 20:00 ގައެވެ.
ފީފާ ވޯލްޑް ކަޕް، ރަޝިޔާ 2018 ގެ ގްރޫޕްތައް
| ގްރޫޕް އޭ | ގްރޫޕް ބީ | ގްރޫޕް ސީ | ގްރޫޕް ޑީ |
| ރަޝިޔާ | ޕޯޗުގަލް | ފްރާންސް | އާޖެންޓީނާ |
| ސައޫދީ ޢަރަބިޔާ | ސްޕެއިން | އޮސްޓްރޭލިޔާ | އައިސްލޭންޑް |
| އިޖިޕްޓް | މޮރޮކޯ | ޕެރޫ | ކްރޮއޭޝިއާ |
| އުރުގުއޭ | އިރާން | ޑެންމާކް | ނައިޖީރިއާ |
| ގްރޫޕް އީ | ގްރޫޕް އެފް | ގްރޫޕް ޖީ | ގްރޫޕް އެޗް |
| ބްރެޒިލް | ޖާމަން | ބެލްޖިއަމް | ޕްލެންޑް |
| ސްވިޒަލޭންޑް | މެކްސިކޯ | ޕެނަމާ | ސެނެގާލް |
| ކޮސްޓަ ރިކާ | ސްވިޑަން | ޓިއުނީޝިއާ | ކޮލަމްބިއާ |
| ސާބިއާ | ސައުތު ކޮރެއާ | އިންގްލެންޑް | ޖަޕާން |
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް