އެމްޑީޕީ ދަތުރުކުރަމުންދަނީ ޕާޓީ އުފެދުނު އިރުގެ އަަސާސީ އުސޫލުތަކާ ދުރަށް: ރައީސް ނަޝީދު

ރައީސް މުޙައްމަދު ނަޝީދު މިއަދު އެކްސްގައި ކުރެއްވި ޕޯސްޓެއްގައި، އެމްޑީޕީ މިހާރު ހިނގަމުންދާ މަގާ މެދު ކަންބޮޑުވުން ފާޅުކުރައްވައި، ޕާޓީ އުފެދުނު އިރުގެ އަސާސީ އުސޫލުތަކާ ދުރަށް ޖެހެމުންދާ ކަމަށް ވިދާޅުވެއްޖެއެވެ.

އެމަނިކުފާނު ވިދާޅުވީ އެމްޑީޕީއަކީ އެއް ދުވަސްވަރެއްގައި ހުޅުވިފައިވާ ވިސްނުމާއި، ތަފާތު ޚިޔާލުތަކަށް ޖާގަދިނުމާއި، ދިމިޤްރާޠީ އިޞްލާޙުގެ ދިދަ އުފުލި ޕާޓީއެއް ކަމަށާއި، ނަމަވެސް މިހާރު ބިދޭސީންނަށް ނަފްރަތުކުރާ އަދި ހައްދުފަހަނައަޅާ ޤައުމިއްޔަތު ފާޅުކުރާ ބަސްމަގު ބަލައިގަންނަން ޕާޓީ އިތުރަށް ތައްޔާރަށް ހުރިހެން ހީވާ ކަމަށެވެ. ވޯޓު ހޯދޭނީ ބިރުވެރިކަމާއި ބައިބައިވުން އުފައްދައިގެން ކަމަށް ދެކޭ ބަޔަކު ޕާޓީ ތެރޭގައި އިތުރުވަމުންދާ ކަމަށް ވެސް އެމަނިކުފާނު ފާހަގަކުރެއްވިއެވެ.

ރައީސް ނަޝީދު ވިދާޅުވި ގޮތުގައި، މި އުކުޅުން ގެއްލިދާނީ ތާރީޚީ ގޮތުން އެމްޑީޕީ ދެމެހެއްޓި، ތަފާތު ސަޤާފަތްތައް ބަލައިގަންނަ، ލިބަރަލް އަދި ހުޅުވިފައިވާ ވިސްނުމުގެ ވޯޓަރުންނެވެ. ކުރު މުއްދަތުގެ ސިޔާސީ ފައިދާއަކަށް އެ ބައި ބީރައްޓެހިކުރުމަކީ ގޯސް ނިންމުމެއް ކަމަށާއި، ސިޔާސީ ގޮތުން ޕާޓީއަށް އަމިއްލައަށް ގެއްލުން ދޭ ކަމެއް ކަމަށް އެމަނިކުފާނު ވިދާޅުވިއެވެ.

"ބިރަކާ ނުލާ މަޖާ ކުރުން" ޝިޢާރުގެ ދަށުން ހިންގި ކެމްޕެއިނުން ޕާޓީގެ ތާއީދު ކުޑަނުވެ، އެހެން ބައެއް ބޮޑަށް ދުރުނުވެ، ގާތްގަނޑަކަށް 20،000 ވޯޓު އިތުރަށް ލިބުނު ކަމަށް ރައީސް ނަޝީދު ފާހަގަކުރެއްވިއެވެ. އޭގެ ޚިލާފަށް، ދީން ސިޔާސީ ހަތިޔާރެއްގެ ގޮތުގައި ބޭނުންކުރުމާއި "ޒިއޮނިސްޓުން ޤައުމު ހިފަނީ" ފަދަ ބިންގާއެއް ނެތް ވާހަކަ ފެތުރުމުން ޕާޓީގެ އިތުބާރު ވަރުގަދައެއް ނުވާނެ ކަމަށާއި، އެފަދަ ވާހަކަތަކުން ޢާންމު ބަހުސް ހަޑިވެ، ޤައުމީ ސިޔާސަތުގެ ވަޒަން ދަށްވާ ކަމަށް ވެސް އެމަނިކުފާނު ވިދާޅުވިއެވެ.

ޕާޓީ މި ވަގުތު އޮތީ ދެމަގުމަތީގައި ކަމަށާއި، މި މަގުން ކުރިއަށް ދާނަމަ ޕާޓީގެ ހުވިއްޔަތާއި، ޕާޓީ އެހެން ފަރާތްތަކާ ވަކިކޮށް ފާހަގަކުރެވުނު އުސޫލުތައް ގެއްލިދާނެ ކަމަށް ރައީސް ނަޝީދު ވިދާޅުވިއެވެ. ޕޯސްޓް ނިންމާލައްވަމުން އެމަނިކުފާނު ވިދާޅުވީ، "އުސޫލުތަކަށް ތަބާވާ މެމްބަރުން ކުރިއަށް އަރައި، ޕާޓީ ހަލާކުކޮށްލާނެ މި މަގުން ޕާޓީ ސަލާމަތްކުރާނެ ކަމަށް އަހަރެން އުއްމީދުކުރަން. ސިޔާސަތުގައި ތެދުވެރިކަން ހިފަހައްޓާނެ ޙިކުމަތާއި ބާރު މާތް ﷲ އަހަރެމެންނަށް ދެއްވާށި" ކަމަށެވެ.