ބޮޑުކަމުދާ ތަކެތީގެ ބައްޓަމަށް އަންނަ ކުއްލި ބަދަލުތައް، ކެންސަރު ފަދަ ސީރިއަސް ބައްޔެއްގެ ނިޝާނަށް ވެދާނެ!

ބޮޑުކަމުދާ ތަކެތީގެ ބައްޓަން ކުއްލިއަކަށް ހިމަވެ ފަންސޫރެއް ވަރަށް ބަދަލުވެއްޖެނަމަ، ބައެއް ފަހަރު އެއީ ހަޖަމުގެ ނިޒާމުގައި ސީރިއަސް މައްސަލައެއް ފޮރުވިފައި އޮތް ކަމުގެ ނިޝާނަކަށް ވެދާނެއެވެ.

ގޮހޮރަކީ ހަޖަމުވެފައި ހުންނަ ކާނާއިން ފެން ނަގައި، ބާކީ ބައި ބޮޑުކަމުދާ ތަކެއްޗަށް ބަދަލުކުރާ ގުނަވަނެވެ. މި ތަކެތީގެ ބައްޓަމާއި ބޯމިން ބިނާވަނީ ފެނުގެ މިންވަރާއި، ދައުރުވާ ދުވެއްޔާއި، ގޮހޮރުގެ މަސްތައް ހަރަކާތްކުރާ ގޮތުގެ މައްޗަށެވެ. ބަނޑުހަރުވުމާއި ބޭރަށް ހިންގުމާއި އައިބީއެސް ފަދަ ހާލަތްތަކުގައި ވެސް ބައްޓަން ބަދަލުވެދާނެއެވެ. ނަމަވެސް ގޮހޮރު ތެރޭގައި ބޮޑުވާ މަސް ގަނޑެއްގެ ސަބަބުން މަގު ހަނިވެ، ބޮޑުކަމުދާ ތަކެތި ހިމަވެދާނެ ކަމީ ޑޮކްޓަރުން ސަމާލުކަން ދޭ ކަމެކެވެ.

ޖޯންސް ހޮޕްކިންސް މެޑިސިން އިން ބުނެފައިވާ ގޮތުގައި، އާދަޔާ ޚިލާފަށް ހިމަ ބައްޓަމަކަށް ބޮޑުކަމުދާ ވައްޓަފާޅި ބަދަލުވުން، ހުއްޓާނުލައި ބަނޑުހަރުވުން ނުވަތަ ބޭރަށް ހިންގުން، އަދި ގޮހޮރު ހުސްނުވެ ހުންނަ ކަމުގެ އިހުސާސް ކުރެވުމަކީ ގޮހޮރާއި ފުރަގަސް ފަރާތު ކެންސަރުގެ ނިޝާންތަކުގެ ތެރޭގައި ހިމެނިދާނެ ކަންކަމެވެ. ހާވާޑް ހެލްތު ޕަބްލިޝިންގުން ވެސް ފާހަގަކޮށްފައިވާ ގޮތުގައި، ބަލީގެ ކުރީކޮޅު އަދި ކެންސަރަށް ބަދަލުވެދާނެ ޕޮލިޕްތަކުގައި ގިނަ ފަހަރު ފެންނަ އެއްވެސް ޢަލާމާތެއް ނުހުރެދާނެއެވެ.

އެއް ފަހަރު ހިމަ ބައްޓަމެއް ފެނުމަށްވުރެ، ސަމާލުވާންވީ ތަކުރާރުކޮށް ބަދަލު ފެންނަ ނަމައެވެ. ބޮޑުކަމުދާ ތަކެތީގައި ލޭ ހުރުން، ބޮޑުކަމުދާ ވައްޓަފާޅި ދާއިމީ ގޮތަކަށް ބަދަލުވުން، ގޮހޮރު ހުސްނުވެ ހުންނަ ކަމުގެ އިހުސާސް، ސަބަބެއް ނެތި ބަނޑުގައި ރިއްސައި ފުއްޕުން، ސަބަބެއް ނެތި ބަރުދަން ލުއިވުން، ނުވަތަ ދިގުދެމިގެންދާ ވަރުބަލިކަން ފަދަ ޢަލާމާތެއް ފެންނަ ނަމަ ޑޮކްޓަރެއްގެ މަޝްވަރާ ހޯދުން މުހިންމެވެ.

އެމެރިކާގެ ކެންސާ ސޮސައިޓީން ބުނާ ގޮތުގައި ގޮހޮރުން މަޑުމަޑުން ލޭ ފައިބާ ނަމަ ބޮޑުކަމުދާ ތަކެތީގައި ލޭ ނުފެނުނު ނަމަވެސް ލޭ މަދުވުމުގެ ހާލަތު ކުރިމަތިވެދާނެއެވެ. ނަމަވެސް މި ޢަލާމާތްތަކަކީ ހަމައެކަނި ކެންސަރަށް ޚާއްޞަ ކަންކަމެއް ނޫނެވެ. ބަވާސީރާއި ގޮހޮރުގެ އިންފެކްޝަނާއި ދުޅަވުމުގެ ބަލިތަކުން ވެސް ހަމަ މި ޢަލާމާތްތައް ފެނިދާނެއެވެ.

ޝައްކެއް އުފެދޭ ނަމަ ޑޮކްޓަރު އެންމެ ފުރަތަމަ ވެސް ލަފާ ދެއްވާ ތަހުލީލުތަކުގެ ތެރޭގައި ކޮލޮނޮސްކޮޕީ ހިމެނެއެވެ. ކެމެރާ ހަރުކޮށްފައިވާ ހިމަ ހޮޅިއެއް ބޭނުންކޮށްގެން ގޮހޮރުގެ އެތެރެ ބެލޭ މި ޓެސްޓުން ޕޮލިޕެއް ނުވަތަ ޝައްކު ކުރެވޭ މަސް ގަނޑެއް ފެނިއްޖެ ނަމަ އެ ނެގުމާއި ލެބޯރެޓަރީ ތަހުލީލަށް ޓިޝޫ ނެގުމުގެ ފުރުސަތު ލިބެއެވެ.

މީގެ އިތުރުން ބޮޑުކަމުދާ ތަކެތީގައި ފޮރުވިފައިވާ ލޭ ބެލުމަށް ފީކަލް އިމިއުނޯކެމިކަލް ޓެސްޓް (އެފްއައިޓީ) އާއި ލޭ މަދުވެފައި ހުރިތޯ ބެލުމަށް ލޭގެ ފުރިހަމަ ޓެސްޓާއި ސީޓީ ސްކޭން ފަދަ ތަހުލީލުތައް ބޭނުންކުރެވެއެވެ. ނަމަވެސް ހަމައެކަނި ސްޓޫލް ޓެސްޓަކުން ކެންސަރު ނެތް ކަމަށް ނިންމޭ ގޮތެއް ނުވެއެވެ.

ދުނިޔޭގެ ޞިއްޙަތު ޖަމިއްޔާ (ޑަބްލިއުއެޗްއޯ) ގެ ތަފާސް ހިސާބުތައް ދައްކާ ގޮތުން ކޮލޮރެކްޓަލް ކެންސަރަކީ ދުނިޔޭގައި ތިންވަނައަށް އެންމެ ގިނައިން ފެންނަ ކެންސަރެވެ. ޖުމްލަ ކެންސަރުގެ ގާތްގަނޑަކަށް %10 ހިއްސާކުރާ މި ބައްޔަކީ ކެންސަރުން މަރުވާ ސަބަބުތަކުގެ ތެރޭގައި ދެވަނައަށް އެންމެ ގިނަ ބައެކެވެ. ބަލީގެ ކުރީކޮޅު ފާހަގަކުރެވޭ ޢަލާމާތެއް ނެތި ކުރިއަށް ދާ ފަހަރު ގިނަވުމާ އެކު، ސްކްރީނިން ކުރުމުގެ ބޭނުންތެރިކަން ބޮޑެވެ.

ބޮޑުކަމުދާ ތަކެތީގެ ބައްޓަން ބަދަލުވުމަކީ ކެންސަރު ޖެހިފައޭ ބުނެވޭނެ ކަމެއް ނޫން ނަމަވެސް، ދާއިމީ ބަދަލެއް ފެންނަ ނަމަ އަމިއްލައަށް ނިންމުމެއް ނުނިންމައި ވީ އެންމެ އަވަހަކަށް ޑޮކްޓަރެއްގެ ލަފާ ހޯދުން މުހިންމެވެ.