އަޒަރުބައިޖާނުގެ ސަރުކާރު ސްކޫލްތަކުގައި ޔުނިފޯމާ ބެހޭ ގޮތުން ހެދި އައު ގަވާއިދުގެ ސަބަބުން ބުރުގާ އަޅާ ދަރިވަރުންނާއި ޓީޗަރުން ސްކޫލަށް ވަނުން ހުއްޓުވައި، އެކަމާ ދެކޮޅަށް ކުރާ މުޒާހަރާތައް ވަރުގަދަ ކުރަން ފަށައިފި އެވެ.

ސެޕްޓެމްބަރު 21 ގައި އަޒަރުބައިޖާނުގެ މިނިސްޓަރުންގެ މަޖިލީހުން ފާސްކުރި މި ގަވާއިދުގައި ސީދާ ބުރުގާ މަނާކުރާ ކަމަށް ލިޔެފައެއް ނެތެވެ. ނަމަވެސް ސެކިއުލާ ތަޢުލީމުގެ އުސޫލުތަކާއި ސްކޫލް ޔުނިފޯމާ ނުގުޅޭ ހެދުން ލުން މަނާކުރާ މާއްދާއެއް ހިމެނިފައި އޮތެވެ. އެ މާއްދާ ބޭނުންކޮށްގެން ބުރުގާ އެޅި ދަރިވަރުންނާއި ޓީޗަރުން ސްކޫލަށް ވެއްދުން ހުއްޓުވާފައިވާ ކަމަށް ރިޕޯޓުތައް ބުނެއެވެ. ސޯޝަލް މީޑިއާގައި ދައުރުވާ ވީޑިއޯތަކުން ފެންނަ ގޮތުގައި ބުރުގާ އެޅި ދަރިވަރުން ސްކޫލުން ފޮނުވައިލާ މަންޒަރާއި، ރޮމުން ޓީޗަރުންނާ ވަދާޢުކުރާ މަންޒަރު ހިމެނެއެވެ.

Advertisement

ގިނަ ސްކޫލްތަކެއްގެ ދަރިވަރުން ކިޔެވުން ބޮއިކޮޓްކޮށް، ނިންމުމާ ދެކޮޅަށް ސްކޫލްތަކުގެ ބޭރުގައި މުޒާހަރާ ކޮށްފައިވެއެވެ. ބައެއް ދަރިވަރުންނާއި ޓީޗަރުން ސްކޫލް ޢިމާރާތުގެ ބޭރުގައި ކިޔެވުން ކުރިއަށް ގެންދާ މަންޒަރުވެސް ފެނިފައިވެއެވެ. އަޒަރުބައިޖާނުގެ ދާޚިލީ ވުޒާރާއިން ބުނީ ބާކޫގައި ހިނގި ހަމަނުޖެހުންތަކާ ގުޅިގެން 37 މީހަކު ހައްޔަރުކޮށްފައިވާ ކަމަށެވެ. ހައްޔަރުކުރެވުނު ފަރާތްތަކުން ތަޢުލީމީ މުވައްޒަފުންނާ ކުރިމަތިލައި، ސްކޫލްތަކަށް ގެއްލުންދީ، ޓްރެފިކް ހުއްޓުވަން މަސައްކަތް ކުރި ކަމަށް އެ މިނިސްޓްރީން ތުހުމަތުކުރެއެވެ. މުޒާހަރާތައް މަސައްލީ ޑިސްޓްރިކްޓް ފަދަ އެހެން ސަރަޙައްދުތަކަށް ވެސް ފެތުރިފައިވެއެވެ.

މި ގަވާއިދުގެ އަސަރު ކުރި ޓީޗަރެއް ކަމަށްވާ ޒަހުރާ ޙަސަނޯވާ އަލްޖަޒީރާއަށް ބުނީ ސްކޫލުގައި ދެން ބުރުގާ ނޭޅޭނެ ކަމަށް އޭނާއަށް އެންގި ކަމަށެވެ. "ތެދަށް ބުނާ ނަމަ، އަޅުގަނޑު ވަރަށް ދެރަވެއްޖެ. ހިތުގައި ޖެހިއްޖެ،" ޒަހުރާ ބުންޏެވެ. ބުރުގާ އެޅުމަކީ އޭނާގެ އަމިއްލަ ނިންމުމެއް ކަމަށާއި "ބޭލުމަކީ ވެސް އެއީ އަޅުގަނޑުގެ ނިންމުމަކަށް ވާންޖެހޭނެ" ކަމަށް ވެސް އޭނާ ބުންޏެވެ.

އަޒަރުބައިޖާނުގެ އާބާދީގެ ގާތްގަނޑަކަށް 96 އިންސައްތައަކީ މުސްލިމުންނެވެ. އެ ޤައުމުގެ ޤާނޫނު އަސާސީގައި ދައުލަތަކީ ސެކިއުލާ ދައުލަތެއް ކަމަށް ކަނޑައަޅާފައި އޮތް ނަމަވެސް، ދީނީ މިނިވަންކަން ކަށަވަރުކޮށްދީފައިވެއެވެ. މި ހަމަނުޖެހުންތައް ތުރުކީއަށް ވެސް ފެތުރި، އިސްތަންބޫލުގައި ހުންނަ އަޒަރުބައިޖާނު ކޮންސިއުލޭޓް ކުރިމަތީ މުޒާހަރާ ކޮށްފައިވެއެވެ. ރައީސް އިލްހާމް ޢަލީޔޭވް އޭނާގެ ޕާޓީ ކޮންގްރެސްގައި "އަހަރެމެންގެ ދިރިއުޅުމުގެ ވައްޓަފާޅިއާ ބެހި" ނުހެދުމަށް ބޭރުގެ ފަރާތްތަކަށް އިންޒާރު ދިނެވެ. ތުރުކީގެ ރައީސް ރެޖެޕް ޠައްޔިބް އެރުދޮޣާން ސެޕްޓެމްބަރު 23 ގައި އދ. ގެ ޢާންމު މަޖިލީހުގައި ދެއްވި ތަޤުރީރުގައި މުސްލިމް އަންހެނުންނާ ދެކޮޅަށް ކުރާ ތަފާތުކުރުމުގެ ވާހަކަ ނެންގެވިއެވެ. ސްކޫލް ޔުނިފޯމުގެ މައްސަލައިން ފެށިގެން އުފެދުނު މި ދެބަސްވުން މިހާރު ވެފައި ވަނީ ދީނީ މިނިވަންކަމާއި، ފަރުދީ ޙައްޤުތަކާއި، ތަޢުލީމުގައި ސަރުކާރުގެ ބާރު ހިނގާ ދާއިރާއާ ގުޅޭ ފުޅާ ބަހުސަކަށެވެ.