ދިވެހިރާއްޖޭގެ ކަނޑުގެ ސަރަހައްދާއި އިގްތިސާދީ ސަރަހައްދު ހިމެނޭ ގޮތުން، ގައުމުގެ އެއްވެސް ބައެއް އަސްކަރީ ގޮތުން ވިޔަސް އެހެން ގޮތަކުން ވިޔަސް ބެލެހެއްޓުމަށް ބޭރުގެ އެއްވެސް ފަރާތަކާ ހަވާލުނުކުރާނެ ކަމަށް ދިވެހި ސަރުކާރުން މިއަދު ބުނެފިއެވެ.

ސަރުކާރުން ނެރުނު ބަޔާނުގައި ފާހަގަކޮށްފައިވާ ގޮތުން، ދިވެހިރާއްޖޭގެ ސަރަހައްދާއި ސިޔާދަތަކީ ދައުލަތުގެ މިނިވަންކަން ބިނާވެފައިވާ ބަދަލުނުކުރެވޭނެ ހައްގެކެވެ. ހާއްސަ އިގްތިސާދީ ސަރަހައްދާއި ބައިނަލްއަގުވާމީ ވިޔަފާރީގެ ކަނޑުއޮޅިތައް ހިމެނޭ ގޮތުން، މުޅި ސަރަހައްދުގެ ރައްކާތެރިކަން ކަށަވަރުކުރުމުގެ ޒިންމާ ގާނޫނުއަސާސީން ދިވެހި ދައުލަތާ ހަވާލުކޮށްފައިވާ ކަމަށް ވެސް އެ ބަޔާނުގައި ބުނެފައިވެއެވެ.

Advertisement

ޖޯގުރަފީ ގޮތުން ރާއްޖެ އޮންނަ ސަރަހައްދުގެ އިސްތިރާޖީ މުހިންމުކަން ވެސް ސަރުކާރުން ފާހަގަކޮށްފައިވެއެވެ. އެ ގޮތުން، ރާއްޖޭގެ ސަރަހައްދުގައި ހިމެނޭ ކަނޑުއޮޅިތަކަކީ ދުނިޔޭގެ ތެލުގެ ވިޔަފާރީގެ ބޮޑު އިންސައްތައެއް އެއް ބައްރުން އަނެއް ބައްރަށް ގެންދިޔުމަށް ބޭނުންކުރާ މައި މަގުތައް ކަމަށާއި، އެ ސަރަހައްދު އަމާންކޮށް ދެމެހެއްޓުމުގެ ހިދުމަތް ޒަމާނުއްސުރެ ދިވެހިރާއްޖެއިން ފޯރުކޮށްދެމުން އަންނަ ކަމަށް ބަޔާނުގައި ބުނެފައިވެއެވެ.

ރާއްޖޭގެ ސަރަހައްދުގެ އެއްވެސް ބައެއް ބޭރު ފަރާތަކަށް ހުޅުވައިލުމަކީ ސިޔާދަތަށް އުނިކަން ލިބި، ސަރަހައްދީ ހަމަޖެހުމާއި ސަލާމަތަށް ވެސް ނޭދެވޭ އަސަރުކުރާނެ ކަމެއް ކަމަށް ސަރުކާރުން ދެކެއެވެ. އެހެންވެ، ސީދާ ނުވަތަ ނުސީދާ ގޮތަކުން ވެސް ބޭރުގެ ނުފޫޒަކަށް ދައުވަތު ނުދިނުމަށް ހުރިހާ ފަރާތްތަކަށް ސަރުކާރުން ވަނީ އިލްތިމާސްކޮށްފައެވެ.

ދިވެހި ތާރީހަށް ބެލިޔަސް ގައުމުގެ ސަރަހައްދު ހިމާޔަތްކުރުމަކީ ދިވެހީން ފަހުރުވެރިކަމާ އެކު އަދާކުރަމުން އައި ޒިންމާއެއްކަން ސަރުކާރުގެ ބަޔާނުގައި ހަނދާންކޮށްދީފައިވެއެވެ.