އިނގިރޭސިވިލާތުގެ ވެރިރަށް ލަންޑަނުގެ ދަ ޝާޑް ޢިމާރާތް ކައިރީގައި އިންޑިއާގެ ޓަމިލް ނާޑޫގެ ޗީފް މިނިސްޓަރު ޖޯސެފް ވިޖޭ ޗަންދްރަސޭކަރް ބައިވެރިވާ ގޮތަށް ރޭވި ޢާންމު ހަރަކާތެއް ފުލުހުން ފާޅުކުރި ސަލާމަތީ ކަންބޮޑުވުންތަކާ ގުޅިގެން ކެންސަލްކޮށްފިއެވެ.

އިނގިރޭސިވިލާތުގެ އެންމެ އުސް ޢިމާރާތް ކަމުގައިވާ ދަ ޝާޑް ކައިރިއަށް އެތައް ސަތޭކަ ސަޕޯޓަރުންނެއް ޖަމާވެ ފިލްމީ ތަރި އަދި ސިޔާސީ ލީޑަރު ވިޖޭ ދެކިލުމުގެ އުންމީދުގައި ގިނައިރުތަކެއް ވަންދެން ތިއްބެވެ. ނަމަވެސް އިންތިޒާމުކުރާ ފަރާތުން ލައުޑް ސްޕީކަރު މެދުވެރިކޮށް އެންގީ ބޭނުންވާ ހުއްދަ ނުލިބުމުން ހަރަކާތް ކުރިއަށް ނުގެންދެވޭނެ ކަމަށެވެ.

Advertisement

މި ނިންމުމާ މެދު ސަޕޯޓަރުން މާޔޫސްވި ކަމަށް ރިޕޯޓުތައް ބުނެއެވެ. އެއްވެތިބި މީހުންގެ ތެރެއިން ބައެއް މީހުންނަކީ ދުރު ހިސާބުތަކުން ދަތުރުކޮށް ލަންޑަނަށް ގޮސް ދުވާލުގެ ބޮޑު ބައެއް ހޭދަކޮށްގެން ތިބި މީހުން ކަމަށް ބުނެފައިވެ އެވެ.

ވިޖޭ އިނގިރޭސިވިލާތަށް ގޮސް އުޅެނީ ޓަމިލް ނާޑޫ ސަރުކާރުގެ ވަފުދެއް ގޮވައިގެން ބައިނަލްއަޤުވާމީ އިންވެސްޓަރުން ޝައުޤުވެރިކުރުވުމުގެ މަޤުޞަދުގައެވެ. ޗީފް މިނިސްޓަރުގެ އޮފީހުން ބުނި ގޮތުގައި މި ދަތުރުގެ ތެރޭގައި ގިނަ އެމްއޯޔޫތަކެއްގައި ސޮއިކޮށް ގާތްގަނޑަކަށް 12,300 ކުރޯޑު ރުޕީސްގެ އިންވެސްޓްމެންޓް ހޯދާފައިވެއެވެ.

މި އެއްބަސްވުންތަކުގެ ދަށުން 9,400 އަށް ވުރެ ގިނަ ވަޒީފާ އުފެދި ތަމިލް ނާޑޫއަކީ އޭޝިއާގެ ބޮޑު އުފެއްދުންތެރިކަމާއި ޓެކްނޮލޮޖީ މަރުކަޒަކަށް ހެދުމަށް ބާރު ލިބޭނެ ކަމަށް ބެލެވެއެވެ. ވިޖޭ އެނބުރި އިންޑިއާއަށް ދާނީ މިއަދު އެވެ.