ޓެލެވިޜަން ތަރި ނިއާ ޝަރްމާ، ސިކުންދާ ސިންގާ އެކު ރާއްޖޭގައި ޗުއްޓީ ހޭދަކުރި ފޮޓޯތަކާއި ވީޑިއޯތައް ސޯޝަލް މީޑިއާގައި ހިއްސާކުރުމާ އެކު ދެ މީހުންގެ ލޯބީގެ ގުޅުމާ މެދު ފޭނުންގެ ޝައުގުވެރިކަން ބޮޑުވެއްޖެއެވެ.

ނިއާ ހިއްސާކުރި ވީޑިއޯއެއްގައި ދެ މީހުން އެކުގައި ބުއިންތައް ބޯ މަންޒަރު ފެންނައިރު، ދެ މީހުންގެ ގާތް ކެމިސްޓްރީ ހާމަވެއެވެ. ވަކިން ޚާއްޞަކޮށް ފޭނުންގެ ސަމާލުކަން ހުއްޓުނީ ނިއާ ކެމެރާއަށް ޕޯޒް ކުރާ ފޮޓޯއެއްގައި ސިކުންދާ އޭނާގެ އަތުގައި ހިފައިގެން ހުރި މަންޒަރު ފެންނަ ފޮޓޯއަކަށެވެ. އެ ފޮޓޯގައި ސިކުންދާ މޫނު ފޮރުވާފައި ހުރުމުން، ގިނަ ފޭނުން ދެކެނީ ދެ މީހުން ރަސްމީކޮށް އިޢުލާން ނުކޮށް ގުޅުން ހާމަކުރަނީ ކަމަށެވެ. މީގެ އިތުރުން ހޮޓެލް ސްޓާފުންނާ އެކު ދެ މީހުން ނަގާފައިވާ ފޮޓޯއެއް ވެސް ޗުއްޓީ އަލްބަމުގައި ހިމެނެއެވެ.

Advertisement

ޖެހިލުން ކުޑަ ފެޝަން ސެންސާއި ތަފާތު މޮޅު އެކްޓިންއަށް މަޝްހޫރު ނިއާ ޝަރްމާ އަކީ އާންމު ގޮތެއްގައި އޭނާގެ ޒާތީ ދިރިއުޅުން ސިއްރުކޮށްގެން ގެންގުޅޭ ތަރިއެކެވެ. އެހެންކަމުން މި ފަދަ ގާތް ވަގުތުތައް ހިއްސާކުރުމަކީ ފޭނުންނަށް ހައިރާންކަން ލިބުނު ކަމެކެވެ. އެހެންނަމަވެސް ނިއާ ވެސް އަދި ސިކުންދާ ވެސް ދެ މީހުންގެ ގުޅުމާ ބެހޭ ގޮތުން ރަސްމީ އެއްވެސް ވާހަކައެއް މިހާތަނަށް ދައްކާފައެއް ނުވެއެވެ.

މި ޗުއްޓީ ޕޯސްޓުތަކާ ގުޅިގެން ސޯޝަލް މީޑިއާގައި ފޭނުން ދެ މީހުންނަށް ތަހުނިޔާ ކިޔައި ޕޯސްޓުތަކަށް ގިނަ ކޮމެންޓުތަކެއް ކޮށްފައިވެއެވެ. ނިއާ އެންމެ ފަހުން ފެނިފައި ވަނީ ކެއްކުމަށް ބިނާކޮށް ހެދި ރިއަލިޓީ ޝޯ ލާފްޓާ ޝެފްސްގެ ތިންވަނަ ސީޒަނުންނެވެ. އެ ސީޒަނުގައި ނިއާ ބައިވެރިވީ ކޮމީޑިއަން ސުދެޝާރީއާ ޖޯޑު ހަދައިގެންނެވެ. އެ ސީޒަންގެ ކާމިޔާބު ހޯދީ އަލީގޯނީ އާއި ޖެނާޓް ޒުބައިރެވެ.