ޖަޕާނުގެ ދެކުނުގެ ކުމަމޯޓޯ ޕްރިފެކްޗަރަށް މިއަދު ހަވީރު ޖަޕާން ގަޑިން 4:27 ގައި (ރާއްޖެ ގަޑިން މެންދުރު 12:27 ގައި) މެގްނިޓިއުޑް 7.1 ގެ ބާރުގަދަ ބިންހެލުމެއް އައިސް، ޝޮޕިންގ މޯލެއް ބިމާހަމަވެ ގިނަ ބަޔަކު މަރުވެފައިވާ ކަމަށް ބެލެވޭ ކަމަށް ޖަޕާނުގެ ފުލުހުންނާ ހަވާލާދީ އެ ޤައުމުގެ މީޑިއާތަކުން ބުނެފިއެވެ.

ކަޝީމާ އަވަށުގައި ހުންނަ އެއޯން ޝޮޕިންގ މޯލްގެ ދެވަނަ ފަންގިފިލާ ވެއްޓި، ބިންހެލުމަށް ފަހު ގޮވުމެއް ހިނގައި ގިނަ ބަޔަކު ތާށިވެފައިވެއެވެ. މޯލްގެ 20 އާއި 30 އާ ދެމެދުގެ މުވައްޒަފުންނާ ގުޅޭ ގޮތް ނުވެފައިވާ ކަމަށް ފުލުހުން ބުނެފައިވެއެވެ. ޓީވީ އަސާހީ އާއި ފޫޖީ ޓީވީ ދެ ބްރޯޑްކާސްޓަރުން ވެސް ފުލުހުންނާ ހަވާލާދީ ރިޕޯޓް ކޮށްފައިވަނީ މޯލް ތެރޭ ގިނަ ބަޔަކު މަރުވެފައިވާ ކަމަށެވެ. ނަމަވެސް ސީދާ އަދަދެއް ކަށަވަރު ކޮށްދީފައެއް ނުވެއެވެ.

Advertisement

ބިންހެލުމުގެ ސަބަބުން ގެއެއް ވެއްޓި އެކަކު މަރުވި ކަމަށް ކިޔޯޑޯ ނިއުސް އިން ރިޕޯޓް ކޮށްފައިވެއެވެ. 100 އަށް ވުރެ ގިނަ މީހުންނަށް އެކިވަރުގެ އަނިޔާ ލިބި، ކުމަމޯޓޯގެ 400 އެނދުގެ ސައިސެއިކައި ހޮސްޕިޓަލް ފުރިފައިވާ ކަމަށް އެންއެޗްކޭ އިން ރިޕޯޓް ކޮށްފައިވެއެވެ. ޔަޓްސުޝީރޯގެ ނިޕޮން ޕޭޕަރ ފެކްޓަރީގެ ޗިމްނީ ވެއްޓި، އެ ތަނުގެ ވެސް ބައެއް މީހުންނާ ގުޅޭ ގޮތް ނުވެފައިވެއެވެ. މީގެ އިތުރުން މަދުވެގެން 12 ގެ ވެއްޓި، ހައިވޭ ބްރިޖެއް ހަލާކުވެ، ކާގޯ ޓްރެއިނެއް ރޭލުން ކައްސައިލައި، އެކި ހިސާބުގައި އަލިފާނުގެ ހާދިސާ ހިނގައިފައިވެއެވެ.

ގާތްގަނޑަކަށް 300،000 މީހުންނަށް އިވެކުއޭޓް ވުމަށް އެންގި، ޝިންކަންސެން ބުލެޓް ޓްރެއިން ހުއްޓައިލައި، އަސޯ ކުމަމޯޓޯ އެއާޕޯޓް ބަންދު ކޮށްފައިވެއެވެ. އަރިއަކެ ކަނޑާއި ޔަޓްސުޝީރޯ ކަނޑަށް ނެރުނު ސުނާމީ އެޑްވައިޒަރީ ފަހުން ވަނީ އުވައިލައިފައެވެ.

ބޮޑުވަޒީރު ސަނައެ ޓަކައިޗީ ވަނީ ބާރުގަދަ އާފްޓަޝޮކް އައިސްދާނެ ކަމުގެ އިންޒާރު ދީ، ރޭގަނޑު ހުއްޓައި ނުލައި ގެއްލުން ބެލުމުގެ މަސައްކަތް ކުރާނެ ކަމަށް ބުނެފައެވެ. 2016 ވަނަ އަހަރު ވެސް ކުމަމޯޓޯއަށް ބާރުގަދަ ދެ ބިންހެލުމެއް އެރި 275 މީހުން މަރުވެ، 2،739 މީހުންނަށް އަނިޔާ ލިބިފައިވެއެވެ.