ސޯޝަލް މީޑިއާގައި މި ދުވަސްކޮޅު އެންމެ ގަދައަށް ދެކެވޭ އެއް ވާހަކައަކީ "ލޯ ކޯޓިޒޯލް ލައިފްސްޓައިލް" ގެ ވާހަކައެވެ. ހެނދުނު ލަސްލަހުން ހޭލުމާއި، ސްޓްރެސް މަދުކުރުމާއި، އިރުގެ އަލީގައި ވަގުތު ހޭދަކުރުމާއި، މެޗާ ބުއިމާއި، ޖާނަލް ލިޔުން ފަދަ ކަންކަމެވެ. ޓިކްޓޮކުގައި ބަލައިލާއިރު ވަރަށް ހިތްގައިމެވެ. ވަރަށް ހަމަޖެހިފައި، ވަރަށް ރީއްޗެވެ.

އެކަމަކު ހަޤީޤީ ދިރިއުޅުމާ މި ޓްރެންޑާ ގުޅެނީ ކިހާ ވަރަކަށް ހެއްޔެވެ؟ ހެނދުނު ހެނދުނާ އީމެއިލް ބެލުމާއި، ސްކްރީނެއް ކުރިމަތީގައި ގިނައިރު އިށީނދެ އިނުމާއި، ކަސްރަތު ފަސްކޮށްލައި ސްޓްރެސް ވީމާ ކެއުން ގިނަކުރުމަކީ ގިނަ މީހުންގެ ދުވަހުގެ ޙަޤީޤަތެވެ. ސިންގަޕޫރުގެ ޒުވާނެއްގެ ތަޖުރިބާއަށް ބަލައިލާއިރު، 30 އަހަރު ފުރެން ކައިރިވެފައި ހުއްޓައި އާދައިގެ ޗެކަޕެއް ބޮޑު ކަމަކަށް ބަދަލުވީއެވެ. ލޭގެ ޕްރެޝަރު މައްޗަށް ގޮސް، ޒުވާން އުމުރުގައި ހައިޕާޓެންޝަން ދެނެގަނެވި، ދާއިމީ ބޭހެއް ކެއުމަށް ޑޮކްޓަރު ލަފާ ދެއްވީއެވެ.

Advertisement

ގިނަ މީހުން ޤަބޫލުކުރާ ގޮތުގައި 20 އާއި 30 ގެ އުމުރަކީ ސިއްޙީ ގޮތުން "ސޭފް ޒޯނެ" ކެވެ. ނުބައިކޮށް ކެޔަސް، ދަންވަރު ނިދިޔަސް، ކަސްރަތު ނުކުރިޔަސް ހަށިގަނޑު ތަޙައްމަލުކުރާނެ ކަމަށް ހީވެއެވެ. ނަމަވެސް ސިންގަޕޫރުގެ ޞިއްޙަތާ ބެހޭ ވުޒާރާ (އެމްއޯއެޗް) ގެ 2024 ވަނަ އަހަރުގެ ޤައުމީ ޞިއްޙީ ސާވޭ ދައްކާ ގޮތުން، އެ ޤައުމުގެ ކޮންމެ ތިން މީހަކުން އެކެއްގެ ލޭގެ ޕްރެޝަރު މަތީގައި ހުރެއެވެ. މިއީ ހަމައެކަނި ދުވަސްވީ މީހުންނެއް ނޫނެވެ. ޒުވާން ފިރިހެނުންގެ ތެރޭގައި ވެސް މި ބަލި ފެންނަ މިންވަރު ދަނީ ފާހަގަކޮށްލެވޭ ވަރަށް އިތުރުވަމުންނެވެ.

ލޭގެ ޕްރެޝަރު މަތިވުމުގެ އެންމެ ނުރައްކާތެރި ކަމަކީ، ޢަލާމާތެއް ނުފެނި ހަށިގަނޑު ތެރޭގައި ބަލި ގޯސްވަމުން ދިޔުމެވެ. ވެއްޓޭ ހިސާބަށް ދާ ވަރުގެ ކަމެއް ދިމައެއް ނުވެއެވެ. ހަމައެކަނި ވަރުބަލިވެފައި، ކޮންމެވެސް ވަރަކަށް ސްޓްރެސް ވެފައި، ކަސްރަތު ނުކުރެވި، ބަރުދަން އިތުރުވެފައެވެ. މި ހުންނަނީ "ބިޒީ ދުވަސްވަރެކޭ" ކިޔައިގެން އެތައް އަހަރެއް ވާންދެން ބޮލުން ނައްޓައިލެވޭ ކަހަލަ ކަންކަމެވެ. އެކަމަކު ހަށިގަނޑަށް ބަހަނާއެއް ނުދެއްކެއެވެ.

ޓިކްޓޮކުގައި ދައްކާ ގޮތަށް ސްޓްރެސް އެއްކޮށް ނައްތައިލުމަކީ ގިނަ މީހުންނަށް ކުރެވޭނެ ކަމެއް ނޫނެވެ. ވަޒީފާގެ ޕްރެޝަރާއި، ސްކްރީނުގެ ކުރިމަތީގައި ހޭދަކުރާ ގިނަ ވަގުތާއި، ހުއްޓައި ނުލައި އަންނަ ނޮޓިފިކޭޝަންތަކާ އެކު ހަމަޖެހިލައިގެން އިނުން ވެސް ބައެއް ފަހަރު ޝެޑިއުލް ކޮށްގެން ނޫނީ ވާ ކަމަކަށް ނުވެއެވެ. އެކަމަކު ދިރިއުޅުން ފުށުން ޖެހުމުގެ ބަދަލުގައި ކުދި ކުދި ބަދަލުތައް ގެނެސްގެން ވެސް ތަފާތު ފެންނާނެ ކަމަށް ޞިއްޙީ މާހިރުން ބުނެއެވެ. ކައިރި ތަންތަނަށް ހިނގާފައި ދިޔުމާއި، ރޭގަނޑު ސްކްރީން ބޭނުންކުރާ ވަގުތު މަދުކުރުމާއި، ނިދުމަށް ވަކި ވަގުތެއް ކަނޑައެޅުމާއި، ސިއްޙީ ނަންބަރުތައް ގަވާއިދުން ޗެކްކުރުން ފަދަ ކަންކަމެވެ.

ޒުވާން އުމުރުގައި ދާއިމީ ބޭހެއް ކާން ފެށުމަކީ ހައިރާންކުރުވަނިވި ކަމެކެވެ. ޒުވާނަކަށް ވުމަކީ ދުޅަހެޔޮ ސިއްޙަތެއްގެ ޔަޤީންކަމެއް ނޫންކަން އެނގިގެން ދެއެވެ. ހަށިގަނޑަށް ރަނގަޅު ކަމަށް އިޙުސާސް ވިޔަސް، ފަރުދާގެ ފުރަގަހުގައި މައްސަލަތައް ބޮޑުވަމުން ދިޔުމަކީ ވެދާނެ ކަމެކެވެ. ސިއްޙީ ދާއިރާގައި ލޭގެ ޕްރެޝަރު މަތިވުމަށް ކިޔައި އުޅެނީ "ސައިލެންޓް ކިލާ" އެވެ. ގިނަ ފަހަރު ޢަލާމާތެއް ނުފެނި ނުރައްކާތެރި ހިސާބަކަށް ގޮސްދާނެތީއެވެ.

ސިއްޙީ ކަންކަމަކީ "ފަހުން ބަލާނީ" ކިޔައިގެން ފަސްކޮށްލެވޭ ވަރަށް ވުރެ މުހިންމު ކަމެކެވެ. ދިރިއުޅުން އެއްކޮށް ބަދަލުކުރާކަށް ނުޖެހެއެވެ. ހަމައެކަނި ސަމާލުކަން ދޭން ފެށުމުން ވެސް ތަފާތެއް ފެންނާނެއެވެ. ގިނަ ފަހަރު، ބަލީގެ ޢަލާމާތް ސާފުކޮށް ފެންނައިރު، އެ ބަލި ހަށިގަނޑުގައި ހުންނަތާ ކިތަންމެ ދުވަހެކެވެ.