ޔަމަނުގެ ހޫޠީން ވަނީ ބުދަ ދުވަހު ރެޑް ސީ ގައި ސަޢޫދީ ޢަރަބިއްޔާގެ ދެ ތެޔޮ ޓޭންކަރު ކަމަށްވާ "އެންސީލިއާ" އާއި "ލައިލާ" އަށް ބެލިސްޓިކް އަދި ކްރޫޒް މިސައިލާއި ޑްރޯނުން ހަމަލާ ދީފައެވެ.

ހޫޠީންގެ އަސްކަރީ ތަރުޖަމާނު ޔަޙްޔާ ސަރީޢު ބުނީ މި ހަމަލާ ދީފައި ވަނީ ހޫޠީން ސަޢޫދީ ޢަރަބިއްޔާ އާ ދެކޮޅަށް އިޢުލާނުކޮށްފައިވާ ކަނޑުގެ ބޮއިކޮޓާ ޚިލާފުވެގެން ކަމަށެވެ.

Advertisement

ސަޢޫދީ ޢަރަބިއްޔާގެ ދައުލަތުގެ ނޫސް އެޖެންސީ (އެސްޕީއޭ) އިން ވަނީ އެންސީލިއާ ޓޭންކަރަށް ހަމަލާ ދީ އެ ބޯޓުގެ ކުރީ ކޮޅުގައި އަލިފާން ރޯވި ކަމަށް ކަށަވަރުކޮށްދީފައެވެ. ނަމަވެސް ހުރިހާ ފަޅުވެރީން ވެސް ސަލާމަތްވެފައިވާ ކަމަށް ބުނެފައިވެއެވެ. ލައިލާ ޓޭންކަރާ ގުޅޭ ގޮތުން ސަޢޫދީ ޢަރަބިއްޔާ އިން އެއްވެސް މަޢުލޫމާތެއް ހާމަކޮށްފައެއް ނުވެއެވެ. މިއީ ހޫޠީން މި ހަފުތާގައި ބާބުލްމަންދަބު ކަނޑުއޮޅީން ސަޢޫދީ ބޯޓުފަހަރު ދަތުރުކުރުން މަނާކުރި ފަހުން ބޯޓަކަށް ހަމަލާ ދިން ފުރަތަމަ ފަހަރެވެ.

މި ހަމަލާއާ ގުޅިގެން ބައިނަލްއަޤުވާމީ ތެލުގެ ބާޒާރަށް ވަރަށް ބޮޑު އަސަރެއް ކޮށް، ބްރެންޓް ކްރޫޑް ތެޔޮ ފީފާއެއް 100.69 ޑޮލަރަށް އެރިއެވެ. މެއި މަހުގެ ފަހުން ފުރަތަމަ ފަހަރަށް 100 ޑޮލަރު ފަހަނައެޅި އިރު، މި މަހު އެކަނި ވެސް ތެލުގެ އަގު 30 އިންސައްތައަށް ވުރެ ބޮޑަށް އުފުލިފައިވެއެވެ. ހޯމޮޒް ކަނޑުއޮޅީން ދަތުރުކުރުން ހުއްޓިފައި އޮތް އިރު، ރެޑް ސީ ގެ ވިޔަފާރި މަގަށް ވެސް ނުރައްކާ ބޮޑުވުމަކީ ދުނިޔޭގެ އިޤުތިޞާދަށް ލިބޭ ވަރަށް ބޮޑު ލޮޅުމެކެވެ.

އެމެރިކާގެ ރައީސް ޓްރަމްޕް ބުނީ ހޫޠީންގެ ހަމަލާތަކުގެ ޒިންމާ އީރާނުން ނަގަން ޖެހޭނެ ކަމަށާއި، "ވަރުގަދަ އަސްކަރީ އަދަބެއް" ދޭނެ ކަމަށެވެ. މީގެ އިތުރުން ހޯމޮޒް ކަނޑުއޮޅީގައި އީރާނުން ބޯޓަކަށް ހަމަލާ ދޭ ކޮންމެ ފަހަރަކު އީރާނުގެ ފާލަމެއް ނުވަތަ ކަރަންޓް ޕްލާންޓެއް ހަލާކުކޮށްލާނެ ކަމުގެ އިންޒާރު ވެސް ޓްރަމްޕް ދީފައިވެއެވެ. އެމެރިކާގެ ސެންޓްރަލް ކޮމާންޑުން ވަނީ ޖެހިޖެހިގެން 13 ވަނަ ރެއަކު ވެސް އީރާނުގެ އަމާޒުތަކަށް ވައިގެ ހަމަލާ ދީފައެވެ.

ހަނގުރާމަ ފެށިގެން މިހާތަނަށް އެމެރިކާ ސިފައިންގެ ތިން މީހަކު ވަނީ މަރުވެފައެވެ. 100 އެއްހައި ސިފައިންނަށް އެކިވަރުގެ ޒަޚަމް ލިބިފައިވެއެވެ. ދެ ޤައުމުން ކުރެ އެއް ޤައުމުން ވެސް ސުލްޙައިގެ ވާހަކައަށް އެނބުރި ދާ ކަމުގެ ނިޝާނެއް ނުފެނެއެވެ. އީރާނުން ވެސް ވަނީ ފާއިތުވި 24 ގަޑިއިރަށް ބަލާއިރު ޖޯޑަނަށް ހަތަރު މިސައިލް ފޮނުވައި، ކުވެއިތަށާއި ބަޙުރައިނަށް ވެސް ހަމަލާ ދީފައެވެ.