ހެންލީ ޕާސްޕޯޓް އިންޑެކްސްގެ ޖުލައި 2026 ގެ އަދާހަމަ ނެރެފިއެވެ. މި އިންޑެކްސް އެކުލަވައިލަނީ އިންޓަނޭޝަނަލް އެއާ ޓްރާންސްޕޯޓް އެސޯސިއޭޝަން (އަޔާޓާ) ގެ ޑޭޓާ ބޭނުންކޮށްގެން، 199 ޕާސްޕޯޓެއް 227 މަންޒިލާ އަޅައިކިޔައިގެންނެވެ.

ދުނިޔޭގެ އެންމެ ބާރުގަދަ ޕާސްޕޯޓުގެ މަގާމުގައި ސިންގަޕޫރު ދެމި އެބަ އޮތެވެ. ސިންގަޕޫރުގެ ޕާސްޕޯޓް އޮތް މީހަކަށް ކުރީން ވީޒާ ނެގުމެއް ނެތި 192 މަންޒިލަށް ދަތުރުކުރެވެއެވެ. ދެވަނައިގައި އޮތީ ޖަޕާނާއި ދެކުނު ކޮރެއާ އާއި ޔޫއޭއީ އެވެ. މި ތިން ޤައުމުގެ ޕާސްޕޯޓުން 188 މަންޒިލަށް ދެވެއެވެ. ތިންވަނައިގައި 187 މަންޒިލާ އެކު ސްވިޑެން އޮތްއިރު، ހަތަރުވަނައިގައި 186 މަންޒިލާ އެކު ފްރާންސާއި ޖަރުމަނީ ހިމެނޭ ގޮތަށް ޔޫރަޕުގެ 11 ޤައުމެއް ހިއްސާކުރެއެވެ.

Advertisement

މި ފަހަރުގެ ރޭންކިންގައި އެންމެ ބޮޑު ކުރިއެރުމެއް ހޯދީ ޔޫއޭއީ އެވެ. ޖެނުއަރީ އިން ފެށިގެން ތިން ދަރަޖަ މައްޗަށް ޖެހި ދެވަނައަށް އެރީއެވެ. 2006 ވަނަ އަހަރު 38 ވަނައިގައި އޮތް ޔޫއޭއީ މިހާރު ދެވަނައިގައި އޮތުމަކީ މި އިންޑެކްސްގެ 20 އަހަރުގެ ތާރީޚުގައި ފެނުނު އެންމެ ބޮޑު ކުރިއެރުމެވެ. އެމެރިކާ އޮތީ 10 ވަނައިގައެވެ. 2014 ވަނަ އަހަރު އެއް ވަނައިގައި އޮތް އެމެރިކާގެ ޕާސްޕޯޓުން މިހާރު 179 މަންޒިލަށް ދެވެއެވެ.

ދެކުނު އޭޝިއާ ސަރަހައްދަށް ބަލާއިރު، އެ ސަރަހައްދުން އެންމެ ބާރުގަދަ ޕާސްޕޯޓަކީ ރާއްޖޭގެ ޕާސްޕޯޓެވެ. ރާއްޖެ އޮތީ 52 ވަނައިގައި، 93 މަންޒިލަށް ވީޒާ ނެތި ދެވޭ ގޮތަށެވެ. އިންޑިއާ އޮތީ 81 ވަނައިގައި 56 މަންޒިލާ އެކު، ބަންގްލަދޭޝް 97 ވަނައިގައި 35 މަންޒިލާ އެކު، ޕާކިސްތާނު 97 ވަނައިގައި 32 މަންޒިލާ އެކުގައެވެ.

މި ރޭންކިންގެ އެންމެ ފުލުގައި އޮތީ އަފްޣާނިސްތާނެވެ. އެ ޤައުމުގެ ޕާސްޕޯޓުން ދެވެނީ އެންމެ 23 މަންޒިލަށެވެ. ސީރިއާ 26 މަންޒިލާ އެކު އަދި ޢިރާޤު 29 މަންޒިލާ އެކު ފުލުން ދެވަނަ އާއި ތިންވަނައިގައެވެ.