އޮކްޓޯބަރު 2025 ގައި އެއްބަސްވި ހަމަލާ ހުއްޓައިލުމުގެ އެއްބަސްވުމަށް ނުވަ މަސް ވީ އިރު ވެސް ޣައްޒާގެ ރައްޔިތުންނަށް އެއްވެސް ލުޔެއް ނުލިބި، އަންގާރަ ދުވަހު ވެސް އިސްރާއީލުގެ ވައިގެ ހަމަލާތަކުގައި ކުޑަކުދީން ހިމެނޭ ގޮތަށް 12 ފަލަޞްޠީނީއަކު ޝަހީދުކޮށްލައިފިއެވެ. 

ޣައްޒާ ސިޓީގެ ޔަންގް މުސްލިމް ވިމެންސް އެސޯސިއޭޝަންގެ ގޭޓް ކައިރިއަށް ދިން ހަމަލާގައި ހަތަރު މީހަކު ޝަހީދުވިއެވެ. މީގެ އިތުރުން ވެސް އެކި ސަރަޙައްދުތަކުގެ ގެތަކަށާއި އާންމު ވެހިކަލްތަކަށް ހަމަލާ ދީފައިވެއެވެ. ޣައްޒާގެ ޞިއްޙީ ވުޒާރާ ބުނީ ސީޒްފަޔާ ފެށުނު ފަހުން 1,100 އަށް ވުރެ ގިނަ ފަލަޞްޠީނީން ޝަހީދުވެ، ޒަޚަމްވި މީހުންގެ ޢަދަދު 3,600 އަށް ވުރެ މައްޗަށް އެރީސް ކަމަށެވެ. ޣައްޒާގެ ގަވަމެންޓް މީޑިއާ އޮފީހުން ބުނީ ޖުލައި 19 އާ ހަމައަށް 3,795 ފަހަރެއްގެ މަތީން އިސްރާއީލުން ސީޒްފަޔާ އާ ޚިލާފުވެފައިވާ ކަމަށެވެ.

Advertisement

ސީޒްފަޔާގެ ދަށުން ކަނޑައެޅި "ޔެލޯ ލައިން" އިން ބޭރަށް އިސްރާއީލުގެ ސިފައިން ސަރަޙައްދު ފުޅާކޮށް، ޣައްޒާގެ 64 އިންސައްތަ ކޮންޓްރޯލް ކުރާ ކަމަށް ރިޕޯޓުތައް ބުނެއެވެ. އެއީ އެއްބަސްވުމުގައި ކަނޑައެޅި 53 އިންސައްތައަށް ވުރެ ގިނައެވެ. މި ސަބަބާ ހެދި ފަލަޞްޠީނީ ޢާއިލާތައް ގެދޮރު ދޫކޮށް ބަދަލުވާން މަޖުބޫރުވަމުންދެއެވެ.

އެހީ ފޯރުކޮށްދިނުމުގެ ޙާލަތު ވެސް ވަރަށް ދަށެވެ. ޣައްޒާއަށް ވައްދަން ޖެހޭ ޓްރަކްތަކުގެ ތެރެއިން ވެއްދިފައިވަނީ 35 އިންސައްތައެވެ. 2025 ވަނަ އަހަރުގެ މާރިޗުން ފެށިގެން އަންރާ ޣައްޒާއަށް ސީދާ އެހީ ވެއްދުން އިސްރާއީލުން ހުއްޓުވައިފައިވެއެވެ. ޖުލައި 8 ގައި ވޯލްޑް ސެންޓްރަލް ކިޗެންގެ ޑްރައިވަރެއް އިސްރާއީލީ ސިފައިންގެ ބަޑީގެ ހަމަލައެއްގައި މަރުވެފައިވެއެވެ.

ހުޅަނގު އައްސޭގައި ވެސް ހާލަތު ގޯސްވަމުންދެއެވެ. ޔަހޫދީ ސެޓްލަރުންގެ ހަމަލާ 2026 ގައި ދުވާލަކު ތިނަކަށް ވުރެ ގިނައަށް އިތުރުވެ، ފަލަޞްޠީނީންގެ ޒަޚަމްވުންތަކުގެ 55 އިންސައްތަ ނިސްބަތްވަނީ ގަދަކަމުން ވަޒަންވެރިވާ ވަޒަންވެރީންގެ ހަމަލާތަކަށެވެ.

މި އަހަރުގެ ފުރަތަމަ ހަ މަހުގައި 3,200 އަށް ވުރެ ގިނަ ފަލަޞްޠީނީންނާއި އެފަދަ ވަޒަންވެރީންގެ ހަމަލަތަކާއި ތަޅާފޮޅުންތަކުގެ ސަބަބުން ގެދޮރު ގެއްލި ބަދަލުވާން ޖެހުނެވެ. އޮކްޓޯބަރު 2023 އިން ފެށިގެން ޣައްޒާ ހަނގުރާމައިގައި ޖުމްލަ 73,293 ފަލަޞްޠީނީން ޝަހީދުވެފައިވެއެވެ. އޭގެ ތެރޭގައި 21,500 ކުޑަކުދީން ހިމެނެއެވެ.