ސިންގަޕޫރުގެ ސެއިންޓް ޖޯސެފް އިންސްޓިޓިއުޝަން އިންޓަނޭޝަނަލް (އެސްޖޭއައިއައި) ގެ ގްރޭޑް ނުވައެއްގެ ދަރިވަރު ޖެނާ ޗާން، 2024 ވަނަ އަހަރުގެ ނޮވެމްބަރު މަހު އދ. ދިގުރަށް ކައިރީ ސްނޯރކލިންގ ކުރަނިކޮށް ބޯޓެއްގެ ޕްރޮޕެލާ ޖެހި މަރުވި މައްސަލައިގައި، އޭނާގެ ޢާއިލާއިން އެ ސްކޫލާ ދެކޮޅަށް ސިންގަޕޫރު ހައި ކޯޓަށް ދައުވާ ހުށަހަޅައިފިއެވެ.

ޖެނާގެ ބައްޕަ އެލަން ޗާން އާއި މަންމަ ޑރ. ޖެނިފާ ލައު ހުށަހެޅި ދައުވާގައި ބުނެފައި ވަނީ ސްކޫލުން ލާޒިމުކޮށް ބައިވެރިވާން ޖެހޭ އައުޓްޑޯ އެޑިއުކޭޝަން ދަތުރެއްގައި ދަރިވަރުގެ ސަލާމަތާއި ރައްކާތެރިކަމުގެ ޒިންމާއަށް އިހުމާލުވި ކަމަށެވެ. ދަތުރު ކުރި މަންޒިލުގެ ސޭފްޓީ ރަނގަޅަށް ބެލިފައި ނެތް ކަމަށާއި، ދަތުރު ހިންގި ޖަމާޢަތް ކަމަށްވާ މޯލްޑިވްސް ވޭލް ޝާކް ރިސާޗް ޕްރޮގްރާމް (އެމްޑަބްލިއުއެސްއާރުޕީ) ގެ ޤާބިލުކަން ރަނގަޅަށް ވަޒަންކޮށްފައި ނުވާ ކަމަށް ވެސް ދައުވާގައި ބުނެފައިވެއެވެ.

Advertisement

ޖެނާގެ މަންމަ ޑރ. ލައު ބުނީ 20 މަހަށް ވުރެ ގިނަ ދުވަހު ސްކޫލުގެ ފަރާތުން ޖަވާބެއް ހޯދުމަށް މަސައްކަތް ކުރި ކަމަށާއި، ނަމަވެސް ކޮންމެ ދޮރެއް ބަންދުވި ކަމަށެވެ. "މި ދައުވާ އަކީ ޖަވާބުދާރީ ކުރުވުމަށާއި، ޖެނާ އަކީ މިފަދަ ހާދިސާއެއްގެ އެންމެ ފަހު ކުއްޖާ ކަމަށް ހެދުމަށް ކުރާ މަސައްކަތެއް" ކަމަށް އޭނާ ބުންޏެވެ. ދައުވާ ހުށަހެޅީ ޖެނާގެ 17 ވަނަ އުފަންދުވަހާ ދިމާކޮށެވެ.

ޢާއިލާއިން 77,506.87 ސިންގަޕޫރު ޑޮލަރުގެ ސްޕެޝަލް ޑެމެޖެސް ހޯދުމަށް ހުށަހެޅީ ޖަނާޒާ ޚަރަދާއި ތަޙުޤީޤު ޚަރަދާއި ޤާނޫނީ ޚަރަދު ހިމެނޭ ގޮތަށެވެ. އޭގެ އިތުރުން ޖެނެރަލް، އެގްރެވޭޓެޑް އަދި އެގްޒެމްޕްލަރީ ޑެމެޖެސް ވެސް ހޯދުމަށް ހުށަހެޅި ނަމަވެސް އެ ޢަދަދުތައް ކަނޑައެޅުމަށް ކޯޓުގައި އެދިފައިވެއެވެ.

ސްކޫލުގެ ސީއީއޯ ޑރ. މައިކަލް ޖޮންސްޓަން ދައުވާގެ ތުހުމަތުތައް ދޮގުކޮށް ބުނީ ހާދިސާ ހިނގީ ޖެނާ މޫދަށް ފޭބި ފަހުން ބޯޓު ކެޕްޓަން ބޯޓު ފަހަތަށް ޖެއްސުމުން ކަމަށެވެ. ސްކޫލުން މައުލޫމާތު ހިފެހެއްޓީ ކަމަށް ޤަބޫލުނުކުރާ ކަމަށާއި، ދައުވާގެ ތުހުމަތުތައް ސްކޫލަށް ނުޙައްޤުން ނިސްބަތްކޮށްފައިވާ ކަމަށް ވެސް ޖޮންސްޓަން ބުންޏެވެ.

ދިވެހި ފުލުހުން 2025 ވަނަ އަހަރު ބުނެފައި ވަނީ ޖެނާ މަރުވި މައްސަލަ "އިހުމާލު" ގެ މައްސަލައެއްގެ ގޮތުގައި ތަޙުޤީޤު ކުރަމުންދާ ކަމަށާއި، ދައުވާ ކުރުމާ މެދު ޕްރޮސިކިއުޓާ ޖެނެރަލް އޮފީހާ މަޝްވަރާ ކުރަމުންދާ ކަމަށެވެ. ސިންގަޕޫރު ފުލުހުންގެ އެހީތެރިކަމާ އެކު 2025 ވަނަ އަހަރުގެ މެއި މަހު ސިންގަޕޫރުގައި ދަރިވަރުންނާއި ޓީޗަރެއްގެ ބަޔާން ވެސް ނެގި ކަމަށް ރިޕޯޓުތައް ބުނެއެވެ. ޖެނާ މަރުވީ ވެސް ދިވެހިރާއްޖޭގެ ސަރަޙައްދެއްގައި ކަމުން، ދިވެހި ފުލުހުންގެ ތަޙުޤީޤު ނިމޭ ގޮތަކީ ވެސް މި މައްސަލައިގައި މުހިންމު ބައެކެވެ.