އީރާނުން ހޮނިހިރު ދުވަހު ކުވެއިތުގެ ކަރަންޓާއި ފެން ޕްލާންޓަކާއި ތެޔޮ ސެކްޓާގެ މުހިންމު ފެސިލިޓީ އަކަށް ހަމަލާ ދީ ބޮޑެތި ގެއްލުންތަކެއް ދީފިއެވެ.

ކުވެއިތް ޕެޓްރޯލިއަމް ކޯޕަރޭޝަނުން ބުނީ ތެޔޮ ސެކްޓާގެ މުހިންމު ސައިޓަކަށް ތަކުރާރުކޮށް ހަމަލާ ދީ، މާއްދީ ބޮޑެތި ގެއްލުންތައް ލިބި، ބައެއް މީހުންނަށް އަނިޔާވެފައިވާ ކަމަށެވެ. ކަރަންޓާއި ފެނާ ބެހޭ ވުޒާރާއިން ބުނީ ކަރަންޓް އުފައްދާ ބައެއް ޔުނިޓްތައް ނިއްވައިލަން ޖެހުނު ކަމަށެވެ. މިއީ ޖެހިޖެހިގެން ދެ ވަނަ ދުވަހު ކުވެއިތުގެ ކަރަންޓް/ފެން ޕްލާންޓަކަށް ހަމަލާ ދިން ފަހަރެވެ.

Advertisement

ހަމަލާތަކާ ގުޅިގެން ކުވެއިތް އެއާޕޯޓުން ފްލައިޓްތައް ސަސްޕެންޑް ކޮށްފައިވެއެވެ. ކުވެއިތް އެއާވޭސް އިން ބުނީ އީރާނުގެ ބެލިސްޓިކް މިސައިލާއި ޑްރޯން ހަމަލާތަކާ ގުޅިގެން ގިނަ ފްލައިޓްތައް ރީޝެޑިއުލް ކުރަން ޖެހުނު ކަމަށެވެ. ކުވެއިތުގެ އަސްކަރިއްޔާއިން ބުނީ އީރާނުން ފޮނުވި ބެލިސްޓިކް މިސައިލާއި ޑްރޯން އެތައް ފަހަރަކު އިންޓަސެޕްޓް ކޮށްފައިވާ ކަމަށެވެ.

ކުވެއިތުގެ ޚާރިޖީ ވުޒާރާއިން ބުނީ ކަރަންޓާއި ފެން ޕްލާންޓްތަކަށް ހަމަލާ ދިނުމަކީ "ހުރިހާ ރެޑް ލައިނެއް ހުރަސް ކުރުން" ކަމަށާއި، އެއީ އދ. ގެ ސަލާމަތީ މަޖިލީހުގެ ޤަރާރު 2817 އާ ކަނޑައެޅިގެން ޚިލާފު ޢަމަލެއް ކަމަށެވެ. ޤަޠަރުގެ ޚާރިޖީ ވުޒާރާއިން ވެސް ވަނީ ކުވެއިތާއި ބަޙްރެއިނާއި ޢުރުދުންނަށް ދިން ހަމަލާތައް "އެންމެ ހަރުކަށި ޢިބާރާތުން" ކުށްވެރިކޮށްފައެވެ.

110 ޑިގްރީ ފެރެންހައިޓަށް ވުރެ ހޫނު ގަދަ މޫސުމެއްގައި ކަރަންޓާއި ފެނުގެ ޚިދުމަތް ކެނޑުމުން، ކުވެއިތުގެ ރައްޔިތުންނަށް ބޮޑު ތަކުލީފެއް ކުރިމަތިވާނެ ކަމަށް ބެލެވެއެވެ.