އެމެރިކާ ސިފައިން ހުކުރު ދުވަހު (17 ޖުލައި) ޖެހިޖެހިގެން ހަތް ވަނަ ރެއަށް އީރާނަށް ވައިގެ ހަމަލާ ދީފައިވާ އިރު، އީރާނުގެ ރޫޙީ ލީޑަރުގެ އަސްކަރީ އެޑްވައިޒަރު، މޭޖާ ޖެނެރަލް މުޙުސިން ރެޒާއީ ބުނީ ދެ ތިން ދުވަހުގެ ތެރޭގައި ހަމަލާ ހުއްޓައިނުލައިފި ނަމަ "ޑިޓަރަންސް" ގެ މަރުޙަލާ ދޫކޮށް "ފުލް-ސްކޭލް އޮފެންސިވް" ފަށައި ހަމަލާ ވަރުގަދަ ކުރާނެ ކަމަށެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ ހުކުރު ދުވަހުގެ ހަމަލާތައް ފެށީ ޖީއެމްޓީ ގަޑީން ބަލަނީނަމަ 19:00 (ރާއްޖޭ ގަޑީން ބަލަނީނަމަ ދަންވަރު 12:00) ގައި ކަމަށެވެ. އީރާނުން ބުނާ ގޮތުގައި ހޮރުމޮޒްގާން ޕްރޮވިންސުގެ ހަ ބުރިޖެއް ހަލާކުކޮށްލައި، ރޭލްވޭ ސްޓޭޝަނަކާއި މަދަނީ އެއާޕޯޓަކަށް ވެސް ގެއްލުން ދީފައި ވެއެވެ. ޗާބަހާރު ބަނދަރުގެ ކަނޑުގެ ކޮންޓްރޯލް ޓަވަރެއް ވެސް ސުންނާފަތިކޮށްލާފައިވާ ކަމަށް ރިޕޯޓްތައް ބުނެއެވެ. ސެންޓްކޮމް އިން ބުނީ ހަމަލާ އަމާޒުކުރީ ވައިގެ ދިފާޢީ ނިޒާމުތަކާއި އަސްކަރީ ލޮޖިސްޓިކް އިންފްރާސްޓްރަކްޗާ އަށް ކަމަށެވެ. ނަމަވެސް އީރާނުން ތުހުމަތުކުރަނީ މަދަނީ ތަންތަން ސީދާ އަމާޒަށް ހަދާ ކަމަށެވެ.

Advertisement

އީރާނުގެ ޞިއްޙީ އިދާރާތަކުން ބުނީ ހުކުރު ދުވަހުގެ ހަމަލާތަކުގައި ހަތް މީހުން މަރުވެ 20 މީހުން ޒަޚަމްވި ކަމަށެވެ. ފާއިތުވި ހަފުތާ ތެރޭ ޖުމްލަ 38 މީހުން މަރުވެ 400 އަށް ވުރެ ގިނަ މީހުން ޒަޚަމްވެފައިވާ ކަމަށް އީރާނުގެ ތަފާސްހިސާބުތައް ދައްކައެވެ. ވަކިން ފާހަގަކޮށްލެވޭ ކަމެއްގެ ގޮތުގައި، ޖުލައި 7 އާއި 12 އާ ދެމެދު ބޫޝެހެރް ނިއުކްލިއާ ޕަވާ ޕްލާންޓް ކޮމްޕްލެކްސް ތެރެއަށް ހަމަލާ އެރިކަން ސެޓެލައިޓް ފޮޓޯތަކުން ހާމަވެފައި ވެއެވެ.

ރައްދު ހަމަލާގެ ގޮތުގައި އީރާނުގެ ރެވޮލިއުޝަނަރީ ގާޑުން ހުކުރު ދުވަހު ކުވެއިތު، ބަޙްރައިން، ޢުރުދުން، ޤަޠަރު، ޢޫމާން އަދި ސީރިއާގައި ހުރި އެމެރިކާގެ އެސެޓްތަކަށް ހަމަލާ ދިނެވެ. އެންމެ ބޮޑު ގެއްލުމެއް ލިބުނީ ކުވެއިތުގެ ކަރަންޓާއި ފެން އުފައްދާ ޑީސެލިނޭޝަން ޕްލާންޓަކަށެވެ. ކުވެއިތުގެ ބޯފެނުގެ 90 އިންސައްތައަކީ ޑީސެލިނޭޝަނުން އުފައްދާ ފެން ކަމަށް ވާ އިރު، މި ފެސިލިޓީ އަށް ގެއްލުމެއް ވެއްޖެ ނަމަ ދުވަސްކޮޅެއް ތެރޭ ބޮޑު ފެނުގެ ކާރިސާއަކަށް ބަދަލުވެދާނެ ކަމުގެ ބިރު އެބަ އޮތެވެ. ކުވެއިތުން ވަނީ ކަރަންޓު ބޭނުންކުރުން މަދުކުރުމަށް ރައްޔިތުންނަށް އިލްތިމާސްކޮށްފައެވެ.

ފެބުރުއަރީ 28 ވަނަ ދުވަހު އެމެރިކާ އާއި އިސްރާއީލް ގުޅިގެން ފެށި ހަމަލާތަކަށް ފަހު ޖޫން މަހު ސޮއިކުރެވުނު ހަނގުރާމަ ހުއްޓައިލުމުގެ އެއްބަސްވުން (އެމްއޯޔޫ) ޖުލައި ކުރީކޮޅުގައި މުޅިން ރޫޅި، ދެ ފަރާތުން ވެސް ހޮރުމޫޒު ކަނޑުއޮޅީގެ ކޮންޓްރޯލަށް ހަނގުރާމަ ކުރަމުން ދެއެވެ. ޑިޕްލޮމެޓިކް ކުރިއެރުމެއް ނުފެނި، ތެލުގެ އަގު ބޮޑުތަނުން އުފުލެމުން ދެއެވެ. ހުކުރު ދުވަހު ބްރެންޓް ކްރޫޑް ފީފާއެއް 88.10 ޑޮލަރަށް އުފުލި، ހަފުތާ ތެރޭ 10 އިންސައްތައަށް ވުރެ ބޮޑަށް އުފުލިފައި ވެއެވެ.