އެމެރިކާގެ ރައީސް ޑޮނަލްޑް ޓްރަމްޕް ސީރިއާ "ސްޓޭޓް ސްޕޮންސާ އޮފް ޓެރަރިޒަމް" ލިސްޓުން ނެގުމަށް ނިންމި ނިންމުމާ މެދު ސީރިއާގެ ރައްޔިތުން އުންމީދާ އެކު ސަމާލުވެ ތިބި ކަމަށް އަލް ޖަޒީރާއިން ރިޕޯޓުކޮށްފައިވެއެވެ.

ޙާފިޒް އަލް އަސަދުގެ ވެރިކަމުގައި 1979 ވަނަ އަހަރު ފެށިގެން ސީރިއާ އެ ލިސްޓުގައި ހިމެނިފައިވާ އިރު، އެ ޑެޒިގްނޭޝަނަކީ ބައިނަލްއަޤުވާމީ ބޭންކުތަކާއި ކުންފުނިތަކަށް ސީރިއާގައި މަސައްކަތް ކުރުމަށް އޮތް އެންމެ ބޮޑު ހުރަސް ކަމަށް ތަޖުރިބާކާރުން ފާހަގަކުރައްވައެވެ. 2024 ވަނަ އަހަރު ޑިސެމްބަރުގައި ބައްޝާރު އަލް އަސަދު ވެރިކަމުން ވެއްޓުމަށް ފަހު ވެސް ގިނަ ދަތިކުރުމުގެ ފިޔަވަޅުތައް ދެމިއޮތެވެ. ވޯލްޑް ބޭންކުން ބުނެފައިވާ ގޮތުގައި 2011 ވަނަ އަހަރުން ފެށިގެން ދަތިކުރުމުގެ ފިޔަވަޅުތަކުގެ ސަބަބުން ސީރިއާގެ އެކްސްޕޯޓު ބޮޑު ތަނުން ވެއްޓި ވިޔަފާރީގެ ޑެފިސިޓް އިތުރުވެފައިވެއެވެ.

Advertisement

ސީރިއާގެ ވަގުތީ ރައީސް އަޙްމަދު އައްޝަރަޢުގެ ސަރުކާރުން ވަނީ ބައިނަލްއަޤުވާމީ އަދި އެމެރިކާގެ ހުރިހާ ދަތިކުރުމުގެ ފިޔަވަޅުތައް ނެގުމަކީ އިޤުތިޞާދު އާ ދިރުމެއް ގެނައުމުގެ ތަޅުދަނޑި ކަމަށް ބުނެފައެވެ. އައްޝަރަޢު ކުރިން އަލް ޤާޢިދާއާ ގުޅިފައިވާ ނުޞްރާ ފްރޮންޓުގެ ވެރިޔާ ކަމުގައި ހުންނެވި އިރު، އެ ގުޅުން 2016 ގައި ކަނޑާލައި، ބައިނަލްއަޤުވާމީ އިތުބާރު ހޯދުމަށް މަސައްކަތް ކުރައްވާފައިވެއެވެ. އެ މަސައްކަތް ބޮޑު ތަނުން ކާމިޔާބުވެ، ޔޫރަޕިއަން ޔޫނިއަން އާއި އެމެރިކާއިން ވަނީ ސީރިއާ އާއި ޚުދު އައްޝަރަޢުގެ މައްޗަށް ހުރި ގިނަ ފިޔަވަޅުތައް ނަގައިފައެވެ.

ކިންގްސް ކޮލެޖް ލަންޑަނުގެ ސެކިއުރިޓީ ސްޓަޑީޒް ލެކްޗަރާ ރޮބް ގައިސްޓް ޕިންފޯލްޑް އަލް ޖަޒީރާއަށް ވިދާޅުވީ "މިއީ ވަރަށް މުހިންމު ކަމެއް، ސަބަބަކީ ބައިނަލްއަޤުވާމީ އިޤުތިޞާދީ އަދި ސިޔާސީ ނިޒާމާ ސީރިއާ ގުޅުވައިދިނުމަށް އޮތް އެންމެ ފަހު ބޮޑު ހުރަހަކީ މިއީ" ކަމަށެވެ. ނަމަވެސް އެ ޑެޒިގްނޭޝަން ނެގުމަކީ ވަގުތުން އިންވެސްޓްމެންޓުގެ ރާޅެއް އެރުން ނޫން ކަމަށާއި، ސީރިއާގައި އަދިވެސް ބިއުރޮކްރެޓިކް ހުރަސްތަކާއި ކޮރަޕްޝަން ފަދަ ގޮންޖެހުންތައް ހުރި ކަމަށް އޭނާ ވިދާޅުވިއެވެ.