ޢުމުރުން ދުވަސްވީ މީހުން ނިސްބަތުން ގިނަ އާބާދީއަކާ ދިމާއަށް ދިވެހިރާއްޖެ މިސްރާބުޖަހާފައިވާ މި ދަނޑިވަޅުގައި، ޒުވާނުންގެ ޞިއްޙަތަށް ވުނަކުރުމަކީ ލާޒިމު ކަމެއް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދުނިޔޭގެ އާބާދީ ދުވަހުގެ މުނާސަބަތުގައި ފޮނުއްވި މެސެޖުގައެވެ.

ރައީސް ވިދާޅުވީ ޒުވާނުންގެ ކިބައިގައި ދުޅަހެޔޮ އާދަތައް އަށަގަންނުވައިގެން، ދިގުދެމިގެންދާ ބަލިމަޑުކަމުން ޒުވާނުން ރައްކާތެރިކޮށް، ދުވަސްވުމާ ގުޅިގެން ބަލިމަޑުކަމާ ކުރިމަތިލާން ޖެހޭ ޢުމުރު ފަސްކުރެވިއްޖެ ނަމަ، އުފެއްދުންތެރި މަސައްކަތްތެރީންނާއި މަދަދުވެރީން ބިނާކުރެވޭނެ ކަމަށެވެ.

Advertisement

ކެއަރ އިކޮނޮމީގައި ވުނަކުރުމުގެ މުހިންމުކަމަށް އަލިއަޅުއްވައިލައްވަމުން ރައީސް ވިދާޅުވީ، އެފަދަ ވުނަކުރުމުން ދުވަސްވީ މީހުންނަށް ފެންވަރު ރަނގަޅު ޞިއްޙީ ފަރުވާ ކަށަވަރުކޮށްދީ، ޢާއިލާތަކަށް، ވަކީން ޚާއްޞަކޮށް އަންހެނުންނާއި އަންހެންކުދީންނަށް، އާމްދަނީއެއް ނުލިބޭ ގޮތަށް މީހުން ބެލުމުގެ ބުރަ ލުއިކޮށްދެވޭނެ ކަމަށެވެ.

ދެމެހެއްޓެނިވި ތަރައްޤީ ބިނާވަނީ ހަމައެކަނި އާބާދީގެ ކުޑަބޮޑުމިނުގެ މައްޗަށް ނޫން ކަމަށާއި، ޒުވާނުންގެ ފުރިހަމަ ޤާބިލިއްޔަތު ބޭނުންކުރެވޭ މިންވަރުގެ މައްޗަށް ވެސް ބަރޯސާވާ ކަމެއް ކަމުގައި ރައީސް ވިދާޅުވިއެވެ. ރާއްޖޭގެ އާބާދީގެ ގާތްގަނޑަކަށް 39 އިންސައްތައަކީ ޒުވާނުން ކަމަށް ވާއިރު، ފެންވަރު ރަނގަޅު ތަޢުލީމާއި މާނަހުރި ވަޒީފާގެ ފުރުޞަތު ހޯދައިދިނުމަކީ ސަރުކާރުން އަހުމިއްޔަތުދޭ ކަމެއް ކަމަށް އެމަނިކުފާނު ވިދާޅުވިއެވެ.

މީގެ އިތުރުން، މޯލްޑިވްސް 2.0 މަސައްކަތުގެ ތެރެއިން ޢާންމު ޚިދުމަތްތައް ޒަމާނީކޮށް، ސުމޭކު ބިނާރު ތަރައްޤީކޮށް، ހަރުދަނާ ސުމޭކު އިޤުތިޞާދެއް ބިނާކުރުމުގެ މަސައްކަތް ކުރިއަށްދާ ކަމަށް ރައީސް ވިދާޅުވިއެވެ. އަދި އާބާދީގެ ސިޔާސަތުތައް ބައްޓަންކުރުމަށް ރަށުފެންވަރުގައި އިދާރީ ދަފުތަރުތައް ހަރުދަނާކޮށް، ހެކީގެ މައްޗަށް ބިނާކޮށް ނިންމުންތައް ނިންމުމުގެ މަސައްކަތް ކުރިއަށްދާ ކަމަށް ވެސް ވިދާޅުވިއެވެ.

ރައީސް ހާމަކުރެއްވި ގޮތުގައި 2030 ވަނަ އަހަރުގެ ބޯހިމެނުން ކުރިއަށް ގެންދާނީ އިދާރީ ދަފުތަރުތަކާއި ކުރީގެ އުސޫލުތައް އެކުލަވައިލައިގެން ޤާއިމުކުރެވޭ ހައިބްރިޑް އުސޫލަކުންނެވެ.