ދިވެހިރާއްޖޭގެ ސަޤާފަތުގެ ތެރޭގައި ހިމެނޭ ހިސާބު ޢިލްމުގެ އުޞޫލުތަކާއި ތުރާސައާ ބެހޭ ގޮތުން ތައްޔާރުކުރި ޚާއްޞަ ފޮތެއް ދިވެހިރާއްޖޭގެ ޤައުމީ ޔުނިވަރސިޓީ (އެމް.އެން.ޔޫ.) އިން އިއްޔެ ނެރެފިއެވެ.

އެ ޔުނިވަރސިޓީން ނެރުނު ބަޔާނުގައިވާ ގޮތުން، މި ފޮތް ލިޔުއްވާފައިވަނީ އެމް.އެން.ޔޫ.ގެ ވައިސް ޗާންސެލަރު ޑރ. ޢާއިޝަތު ޝެހެނާޒް އާދަމެވެ. ފޮތް ނެރެދެއްވީ ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދެވެ. އެމް.އެން.ޔޫ. ސެންޓްރަލް އޮޑިޓޯރިއަމްގައި ބޭއްވުނު މި ރަސްމިއްޔާތުގައި ތަޢުލީމީ ދާއިރާގެ އިސް ބޭފުޅުންނާއި ދިރާސާވެރިންނާއި ދަރިވަރުންނާއި ސިޔާސަތު ކަނޑައަޅާ ފަރާތްތަކުގެ އިތުރުން ޢާންމު ރައްޔިތުން ބައިވެރިވެވަޑައިގެންނެވިއެވެ.

Advertisement

މި ފޮތުގައި ދިވެހިން ކުރީއްސުރެ ބޭނުންކުރަމުން އައި ގުނުމުގެ ނިޒާމުތަކާއި، މިނެކިރުމުގެ އުޞޫލުތަކާއި، މަސްވެރިކަމާއި ވަޑާންކަމާއި ދަތުރުފަތުރުކުރުމާއި ދަނޑުވެރިކަމާއި ޢިމާރާތްކުރުމާއި ކުނާ ވިއުމުގައި ބޭނުންކުރާ ހިސާބުގެ އުޞޫލުތައް ތަފްޞީލުކޮށްދީފައިވެއެވެ. އެ ޔުނިވަރސިޓީން ބުނީ މި ފޮތުގެ އެންމެ މުހިންމު އެއް ބަޔަކީ، ސަޤާފީ މަޢުލޫމާތުތައް ތަޢުލީމީ މަންހަޖުގެ ތެރެއަށް ވައްދާނެ ގޮތުގެ ނަމޫނާއެއް ހުށަހަޅާފައިވުން ކަމަށެވެ.

ރަސްމިއްޔާތުގައި ފިލިޕީންސް ޔުނިވަރސިޓީގެ ޕްރޮފެސަރު ވިލްފްރެޑޯ ވީ. އަލަންގުއީ އަދި މިއުނިކް ޔުނިވަރސިޓީގެ ޕްރޮފެސަރު ފްރޭންކް ހައިޑަމަން ވާހަކަދެއްކެވިއެވެ. ޕްރޮފެސަރު އަލަންގުއީ ފާހަގަކުރެއްވީ ދުނިޔޭގެ އެކި މުޖުތަމަޢުތަކުގައި ހުރި އަމިއްލަވަންތަ ޢިލްމުތައް ދިރާސާކޮށް ރައްކާތެރިކުރުމުގެ މުހިންމުކަމެވެ. ޕްރޮފެސަރު ހައިޑަމަން އަލިއަޅުވައިލެއްވީ އެއް ޖީލުން އަނެއް ޖީލަށް ޢިލްމު ފޯރުކޮށްދިނުމުގައި ސަޤާފީ އާދަކާދަތައް އަދާކުރާ ދައުރަށެވެ.

މި ފޮތާ ގުޅޭ ގޮތުން ޑރ. ޝެހެނާޒް ވިދާޅުވީ "ހިސާބު ޢިލްމަކީ ހަމައެކަނި ދުނިޔެ ޤަބޫލުކުރާ ސައިންސެއް ނޫން" ކަމަށާއި "އެއީ ސަޤާފަތުގެ ދިރިހުރި ބައެއް" ކަމަށެވެ. މި ފޮތުގެ ސަބަބުން ދިވެހި އާދަކާދައިގެ ތެރޭގައި ހުރި ހިސާބުގެ އުޞޫލުތައް ދެނެގަނެވި، އަންނާން އޮތް ޖީލުތަކަށް އެ ތުރާސާ ރައްކާތެރިކޮށްދިނުމަށް މަގުފަހިވެގެންދާނެ ކަމަށް އެކަމަނާ ވިދާޅުވިއެވެ.