މިހާރު ކުރިޔަށްދާ ފީފާ ވޯލްޑް ކަޕުން ދެކުނު ކޮރެއާ ކެޓުމާ ގުޅިގެން އެ ޤައުމުގެ ރައީސް ލީ ޖެ މިއުން ރަސްމީ ތަހުގީގެއް ހިންގަން އަންގަވައިފި އެވެ.

ރައީސް ލީ ވަނީ މި އިއުލާނާއި އެކު ހެޑް ކޯޗު ހޮންގް މިއުންގް-ބޯ މަޤާމުން އިސްތިއުފާ ދީފައިވާކަން ކަށަވަރުކޮށްދީފިއެވެ.

Advertisement

ގްރޫޕް އޭގެ ތިން މެޗުން އެންމެ ތިން ޕޮއިންޓް ހޯދައިގެން ތިންވަނައިގައި ނިންމާލަން ޖެހުނު ދެކުނު ކޮރެއާ މުބާރާތް ފެށީ ޗެކިއާ އަތުން 2-1 އިން މޮޅުވެގެންނެވެ. ނަމަވެސް ދެން ކުޅުނު ދެ މެޗުގައި މެކްސިކޯ އަދި ދެކުނު އެފްރިކާ އަތުން ބަލިވެ ތިންވަނައިގައި އެންމެ ރަނގަޅު ނަތީޖާ ހޯދި އަށް ޓީމުގެ ތެރޭގައި ނުހިމެނި ކެޓީއެވެ.

ރައީސް ލީ ސޯޝަލް މީޑިއާގައި ނެރުއްވި ބަޔާނެއްގައި ވިދާޅުވީ ޓީމުގެ ނަތީޖާތަކާ މެދު ވަރަށް ބޮޑަށް ހައިރާންވެވަޑައިގެންފައިވާ ކަމަށެވެ. ކޮރެއާ ފުޓްބޯލް އެސޯސިއޭޝަން (ކޭއެފްއޭ) އިން 2024 ވަނަ އަހަރު ހޮންގް ކޯޗުކަމަށް އައްޔަންކުރި ނިންމުމަށް ފާޑުވިދާޅުވެ އެ މަޤާމަށް މީހަކު ހޮވިއިރު ޤާބިލުކަމާއި ތަޖުރިބާ އެއީ މައިގަނޑު މިންގަނޑު ކަމުގައި ނުވެދާނެ ކަމަށް އެމަނިކުފާނު ފާހަގަކުރެއްވިއެވެ.

ވޯލްޑް ކަޕްގައި ދެކުނު ކޮރެއާ ބައިވެރިވުމަށް ދައުލަތުން ބޮޑު ޚަރަދެއް ކުރާކަން ފާހަގަކުރައްވައި ކުޅިވަރާ ބެހޭ ވުޒާރާއިން ގޯސްވި ސަބަބުތައް ދެނެގަނެ ކުރިމަގުގައި މިފަދަ ކަމެއް ތަކުރާރުވިޔަ ނުދިނުމަށް ފިޔަވަޅު ހުށަހެޅުމަށް ރައީސް ލީ އެދިވަޑައިގެންފައިވެއެވެ.