އެކި ބަލިތަކާއި ގުޅިގެން ގަވައިދުން ބޭސްކާއިރު ހަކުރު އެކުލެވޭ ކާއެއްޗެހި ގިނައިން ބޭނުންކުރުމާ ގޮހޮރު ހަލާކުވުމާ ގުޅުން އޮންނަ ކަމަށް ދިރާސާއަކުން ދައްކައިފި އެވެ.

ނޭޗާ ޖާނަލްއިން މިދިޔަ މަހު ޝާއިޢުކުރި މި ދިރާސާގައި ސްޓެމް ސެލް ޓްރާންސްޕްލާންޓެއް ހެދުމަށް ހޮސްޕިޓަލުގައި ތިބި 173 ބަލިމީހަކަށް ތައްޔާރުކޮށްދިން 9,419 ކެއުމެއް ދިރާސާކޮށްފައިވެއެވެ. އެއާ އެކު 1,000 އަށް ވުރެ ގިނަ ބޮޑުކަމުދާ ތަކެތީގެ ސާމްޕަލް ވެސް ވަކި ވަކި މުއްދަތުތަކެއްގައި ތަޙުލީލުކޮށްފައިވެއެވެ.

Advertisement

ހޮސްޕިޓަލުން ތައްޔާރުކުރި ކެއުން ކަމަށްވާތީ ބަލިމީހުން ކެއި ތަކެތީގެ ތަފްޞީލީ މަޢުލޫމާތު ދިރާސާ ކުރި ޓީމަށް ލިބިފައިވާކަމަށް ބުނެފައިވެ އެވެ.

ދިރާސާއިން ދައްކާ ގޮތުގައި ގަވައިދުން ބޭސް ބޭނުންކުރި ދުވަސްވަރު ފޮނި ކާނާ ގިނައިން ކެއި ބަލިމީހުންގެ ގޮހޮރުގައި ދިރިއުޅޭ ތަފާތު ޖަރާސީމުގެ ޢަދަދު ދަށަށް ދިޔައެވެ. އަދި އެންޓެރޮކޮކަސް ނަމަކަށް ކިޔާ ނުރައްކާތެރި ބެކްޓީރިއާ ބާރަށް އިތުރުވާ ކަން ފާހަގަވިއެވެ.

އެގޮތުން ގާތްގަނޑަކަށް 100 ގްރާމުގެ ފޮނި ކާއެއްޗެއް އިތުރަށް ކެއުމުން ގޮހޮރުގެ ޖަރާސީމުގެ ތަފާތުކަން ގާތްގަނޑަކަށް 24 އިންސައްތަ ދަށްވެފައިވެއެވެ. ދުޅަހެޔޮ ގޮހޮރެއްގައި ތަފާތު ވައްތަރުގެ ޖަރާސީމު އެކުގައި ދިރިއުޅެމުން ކާނާއާއި ޖާގައަށް ވާދަކުރެއެވެ. އެ ވާދަވެރިކަމުގެ ސަބަބުން ގެއްލުންދޭ ޖަރާސީމުތައް މާ ބޮޑަށް ފެތުރުމުން ހުރަސް އެޅެއެވެ. އެހެންނަމަވެސް އެންޓިބަޔޮޓިކްގެ ސަބަބުން ރަނގަޅު ބެކްޓީރިއާ ވެސް މަރުވެ މި ހަމަހަމަކަން ގެއްލިދެއެވެ.

މީދަލުގައި ޓެސްޓުކުރި ތަޖުރިބާއިން ވެސް މިކަން ޔަގީންވާ ނަތީޖާތައް ފެނިފައިވާ ކަމަށް ނޭޗާ ޖާނަލްއިން ބުނެފައިވެ އެވެ. ގިނަ އަދަދެއްގެ ބޭސްތަކެއް ދީ އެއާ އެކު ހަކުރު ކާންދިން މީދަލުގައި ތިން ވަނަ ދުވަހާ ހަމައަށް އެންޓެރޮކޮކަސް ގާތްގަނޑަކަށް 16 ގުނަ އިތުރުވެ ހަ ވަނަ ދުވަހާ ހަމައަށް ގާތްގަނޑަކަށް 33 ގުނައަށް މައްޗަށް ގޮސްފައިވެއެވެ.

މީގެ އިތުރުން ދިރާސާގައި ބެލި ބަލިމީހުންގެ ތެރެއިން އެވެރެޖަށް ވުރެ ހަކުރު ގިނައިން ބޭނުންކުރި މީހުން ޓްރާންސްޕްލާންޓަށް ފަހު މަރުވުމުގެ ނުރައްކާ ގާތްގަނޑަކަށް 12 އިންސައްތަ އިތުރުކަމަށް ދައްކާފައިވެއެވެ. އެހެންނަމަވެސް މިއީ އޮބްޒަރވޭޝަނަލް ހޯދުމެއް ކަމުން ހަކުރުގެ ސަބަބުން ސީދާ މަރު ކައިރިކަމަށް ކަނޑައެޅެން ނެތް ކަމަށް ދިރާސާ ޓީމުން ފާހަގަކޮށްފައިވެއެވެ.

ދިރާސާ ކުރި ޓީމުން ބުނި ގޮތުގައި މިއީ ރެންޑަމައިޒްޑް ކޮންޓްރޯލްޑް ޓްރައިލްއެއް ނޫންކަމުން ބޭސް ބޭނުންކުރާ ދުވަސްވަރު ހަކުރު މަދުކުރުމުން ގޮހޮރުގެ ޖަރާސީމުގެ ނިޒާމަށް ސީދާ ރައްކާތެރިކަން ލިބޭ ކަމެއް ނުވަތަ އިންފެކްޝަންގެ ނުރައްކާ ކުޑަވާ ކަމެއް ޔަޤީންކުރުމަށް އިތުރު ދިރާސާ ބޭނުންވެއެވެ. ހަމަ އެހެންމެ ޑޮކްޓަރު ދީފައިވާ އެންޓިބަޔޮޓިކް ހުއްޓައިލުމަށް ނުވަތަ ވަރަށް ބޮޑަށް ކެއުން ހިފެހެއްޓުމަށް މި ދިރާސާއިން ލަފައެއް ނުދެއެވެ.

ދިރާސާގެ އެންމެ ވަރުގަދަ ހެކި ގުޅެނީ ޓްރާންސްޕްލާންޓް ހަދާ ބަލިމީހުން ފަދަ ނާޒުކު ޙާލަތުގައި ތިބި ފަރާތްތަކާ ކަމަށް ވީ ނަމަވެސް ބޭސް ކާ ދުވަސްވަރު ފޮނި ކާނާ މާ ގިނައިން ނުކެއުމަކީ ބުއްދިވެރި ކަމެއް ކަމަށް ދިރާސާގެ ހޯދުންތައް ދައްކައިދެއެވެ.