އިޖުތިމާޢީ މިންގަނޑުތަކާ ޚިލާފަށް ނިވާކަން ކުޑަ ހެދުން އަޅައިގެން ޢާންމު ތަންތަނުގައި އުޅޭ ބިދޭސީންނާ މެދު ޤާނޫނީ ފިޔަވަޅު އެޅުމުގެ އިންޒާރު ފުލުހުން މިއަދު ދީފިއެވެ.

ފުލުހުން ނެރުނު އިޢުލާނުގައި ފާހަގަކޮށްފައިވާ ގޮތުގައި ރާއްޖޭގައި ދިރިއުޅޭ ބައެއް ބިދޭސީން ފަހަކަށް އައިސް މަގުމަތީގައާއި ޢާންމު ތަންތަނުގައި ނިވާކަން ކުޑަ ހެދުން ލައިގެން އުޅޭ މައްސަލަ ފެންމަތިވެފައިވެއެވެ. އެފަދަ ޢަމަލުތަކުގެ ސަބަބުން މުޖުތަމަޢުގެ އަމާންކަމާއި ސުލްޙަ މަސަލަސްކަމަށް ނޭދެވޭ އަސަރު ފޯރައިފާނެ ޙާލަތެއް މެދުވެރިވުމުގެ ކުރިން އެ ކަންކަން ހުއްޓުވުމަށް ފިޔަވަޅު އެޅުމަށް ފުލުހުން ތައްޔާރަށް ތިބި ކަމަށް އެ އިޢުލާނުގައި ބަޔާންކޮށްފައިވެއެވެ.

Advertisement

"އެފަދަ ކަންކަން ހުއްޓުވުމަށް މި ހިދުމަތަށް މަތިކޮށްފައިވާ ގާނޫނީ ޒިންމާ އަދާކޮށް އެފަދަ ފަރާތްތަކާމެދު ގާނޫނު ނަމްބަރު 2010/11 (އާންމު އިޖުތިމާއީ މިންގަނޑުތަކާ ހިލާފު އަމަލުތައް ހުއްޓުވުމުގެ ގާނޫނު)ގެ ދަށުން އެޅެންހުރި ފިޔަވަޅުތައް އަޅާނެކަމުގައި ދަންނަވަމެވެ" ކަމަށް އެ އިޢުލާނުގައިވެއެވެ.

މީގެ އިތުރުން ބިދޭސީ މަސައްކަތްތެރިން ގެންގުޅޭ ފަރާތްތަކުން އެ މީހުންނަށް މި ކަންކަމާ ގުޅޭ މަޢުލޫމާތު ފޯރުކޮށްދީ ހޭލުންތެރިކުރުވުމަށް ވެސް ފުލުހުން އިލްތިމާސްކޮށްފައިވެއެވެ. 
ޓޫރިސްޓުންނަށް ޚާއްޞަ ސަރަޙައްދުތައް ފިޔަވައި އެހެން ޢާންމު ތަންތަނާއި މަގުތަކުގައި އުޅޭ އިރު ދިވެހި ސަގާފަތާއި އާދަކާދައަށް ބިދޭސީން އިޙުތިރާމުކުރުމަށް ފުލުހުން އިލްތިމާސްކޮށްފައިވެ އެވެ. މި އެންގުމާ ޚިލާފުވާ ކޮންމެ ފަރާތަކާ މެދު ވެސް ޤާނޫނީ ފިޔަވަޅު އެޅޭނެ ކަމަށް ފުލުހުން ބުނެފައިވެއެވެ.