މިޒަމާނުގެ ދިރިއުޅުމުގައި ކުރިމަތިވާ ފިކުރުތަކާއި ނަފުސާނީ ބުރަތަކަށް ލިބޭނެ އެންމެ މަތިވެރި ޝިފާއަކީ މާތް ﷲ ޛިކުރުކުރުން ކަމަށް މިއަދުގެ ހުކުރު ޚުތުބާގައި ބުނެފިއެވެ.

"ގިނަ ގިނައިން ﷲ ހަނދުމަކުރުން" މި މައުޟޫއަށް ރާއްޖޭގެ އެކި ކަންކޮޅުތަކުގައި މިއަދު އިއްވި ޚުތުބާގައި ފާހަގަކޮށްފައިވާ ގޮތުގައި މިއީ ދިރިއުޅުމުގެ ދަތިތަކާއި ފިކުރުތައް ގިނަ ޒަމާނެކެވެ. ނަމަވެސް ޛިކުރުކުރުމުގެ ސަބަބުން ހިތްތަކަށް ހަމަޖެހުން ލިބި ހާސްކަމުން ސަލާމަތްވެވޭނެ ކަމަށެވެ.

Advertisement

މިކަމުގެ ދަލީލެއްގެ ގޮތުން ރަޢްދު ސޫރަތުގެ 28 ވަނަ އާޔަތް ޚުތުބާގައި ގެނެސްފައިވެއެވެ. "އެއުރެންނީ އީމާންވި މީހުންނެވެ. އަދި ﷲ ހަނދުމަކުރުމުން އެއުރެންގެ ހިތްތައް ހަމަޖެހޭ މީހުންނެވެ. ހިތްތައް ހަމަޖެހެނީ ﷲ ހަނދުމަކުރުމުން ނޫންހެއްޔެވެ".

ޚުތުބާގައި ބަޔާންކޮށްފައިވާ ގޮތުގައި މާތް ﷲ ހަނދުމަކުރުން ތިން ގޮތަކަށް ބެހެވެއެވެ. ފުރަތަމަ ކަމަކަށް ހިތުގެ އިޚްލާޞްތެރިކަމާ އެކު ހަނދުމަކުރުމެވެ. ދެވަނައަށް ދުލުން ތަސްބީޙައާއި ޤުރުއާން ކިޔެވުމާއި ޛިކުރުކުރުމެވެ. ތިންވަނަ ކަމަކަށް ނަމާދާއި ރޯދައާއި މީސްތަކުންނަށް އެހީތެރިވުން ފަދަ ހެޔޮ ޢަމަލުތައް ކުރުމެވެ.

ޛިކުރުކުރާ މީހާއާއި ޛިކުރުނުކުރާ މީހާގެ ތަފާތު ހާމަކުރައްވައި ކީރިތި ރަސޫލާ ﷺ ޙަދީޘްކުރައްވާފައިވާ ބަސްފުޅެއްގެ މާނައިގައިވެއެވެ. "އެ މީހެއްގެ ވެރިރަސްކަލާނގެ ހަނދުމަކުރާ މީހާއާއި އެކަލާނގެ ހަނދުމަނުކުރާ މީހާގެ މިސާލަކީ ދިރިހުރި މީހަކާއި މަރުވެފައިވާ މީހެއްގެ މިސާލެވެ." މީގެ އިތުރުން ޤުދުސިއްޔަ ޙަދީޘުން ސާބިތުވާ ގޮތުގައި އަޅަކު މާތް ﷲ ގެ ޙަޟްރަތަށް ކުއްތަންވާ ވަރަކަށް އެކަލާނގެ ރަޙުމަތާއި މަދަދު އިތުރުވެގެން ދެއެވެ. އަދި ކޮންމެ ވަގުތެއްގައި ވެސް ﷲ ހަނދުމަކުރުންމަތީ ދޫ ތެތްކޮށް ބެހެއްޓުމަށް ރަސޫލާ ﷺ އިރުޝާދު ދެއްވާފައިވާ ކަމަށެވެ.

ޚުތުބާ ނިންމާލަމުން ވަނީ ހަމައެކަނި ދުލުކުރީން ކިޔައިލުމުގެ ބަދަލުގައި ހިތް ޙާޒިރުކޮށްގެން ޛިކުރުކުރުމަށާއި ފާފަތަކުން ދުރުހެލިވެ ހެނދުނާއި ހަވީރުގެ ދުޢާތަކާއި ނަމާދުގެ ފަހުން ކުރާ ޛިކުރުތަކަށް ރައްކާތެރިވުމަށް ނަސޭހަތްތެރިވެފައެވެ.