ބޭރުގެ ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނެގުމުގެ އައު އުސޫލަށް އިއްޔެ އަމަލުކުރަން ފެށުމާ ގުޅިގެން އިޓަލީގެ ކިއާ އޯރާ ވިއާޖީން ރާއްޖެއަށް އައު ބުކިންތައް ނެގުމާއި ދަތުރުތައް ވިއްކުން މެދުކަނޑާލައިފިއެވެ.

އެ ކުންފުނީގެ ވެބްސައިޓުގައި ޝާއިޢުކުރި ބަޔާނެއްގައި ބުނެފައިވާ ގޮތުގައި ރާއްޖޭގެ ސަރުކާރުން އިންސާފުވެރިކަމާއި ބައިނަލްއަޤުވާމީ ޤާނޫނީ ހަމަތަކަށް އިޙުތިރާމުކުރާ މާޙައުލެއް އަލުން ޤާއިމުވަންދެން މި ނިންމުން ދެމިއޮންނާނެއެވެ. ރާއްޖޭގައި އެއްވެސް އޮފީހެއް ޤާއިމުނުކޮށް އިޓަލީގައި ހިންގާ ކޮންސަލްޓެންސީ އަދި އިންޓާމީޑިއަރީ މަސައްކަތްތަކުގެ މާޖިންއިން 17 އިންސައްތައިގެ ޓީޖީއެސްޓީ ދެއްކުމަށާއި މީރާގައި ރަޖިސްޓަރީވާން އެންގުމަކީ ބައިނަލްއަޤުވާމީ ޤާނޫނީ އުސޫލުތަކާ ޚިލާފު ކަމެއް ކަމަށް އެ ކުންފުނިން ދެކޭ ކަމަށް ވެސް ބަޔާނުގައިވެއެވެ.

Advertisement

ރާއްޖޭގެ ރިސޯޓުތަކާއި ދަތުރުފަތުރާއި ސީދާ ރާއްޖެއިން ލިބިގަންނަ ހުރިހާ ޚިދުމަތަކަށް މިހާރު ވެސް ޤަވާއިދާ އެއްގޮތަށް ޖީއެސްޓީ އާއި ގްރީން ޓެކްސް ދައްކަމުން އަންނަ ކަމަށް ވެސް އެ ކުންފުނިން ބުނެފައިވެއެވެ.

ކިއާ އޯރާ ވިއާޖީން އިތުރަށް ބުނެފައިވަނީ މިހާރު ކޮންފާމް ކޮށްފައި ހުރި ބުކިންތައް ކުރިން އެއްބަސްވި އަގުގައި ކުރިއަށް ގެންދިޔުމަށް މަސައްކަތްކުރަމުންދާ ކަމަށެވެ. އެހެންކަމުން ކުރިން ބުކިން ހަދާފައިވާ ފަތުރުވެރިން ކަންބޮޑުވާން ނުޖެހޭނެ ކަމަށް ވެސް އެ ކުންފުނިން ބުނެފައިވެއެވެ.

މި ނިންމުމަކީ ޔޫރަޕުގެ އިއްތިޙާދުގެ ޓްރޭޑް ޔޫނިއަންތަކުން އެ އުސޫލާ ދެކޮޅަށް ކުރިއަށް ގެންދާ ފުޅާ އިޙުތިޖާޖުގެ ބައެއް ކަމަށް ވެސް ކިއާ އޯރާ ވިއާޖީން ބުނެފައިވެއެވެ. ޔޫރަޕުގެ ޓްރެވަލް އެޖެންޓުންގެ ފެޑެރޭޝަން (އީސީޓީއޭއޭ) އިން ބްރަސަލްސްގައި ހުންނަ ރާއްޖޭގެ އެމްބެސީއަށް ކަންބޮޑުވުމުގެ ސިޓީއެއް ފޮނުވާފައިވާ ކަމަށާއި އިނގިރޭސި ވިލާތުގެ ޓްރެވަލް އެޖެންޓުންގެ ޖަމިއްޔާ (އޭބީޓީއޭ) އިން ވެސް މި ބަދަލަށް އަމަލުކުރުން ފަސްކޮށްދިނުން އެދި ރާއްޖޭގެ ޓޫރިޒަމް ވުޒާރާއަށް ހުށަހެޅުމެއް ހުށަހަޅާފައިވެއެވެ.

މީރާއިން މި އައު އުސޫލު ތަންފީޒުކުރަން ފެށީ އިއްޔެއިން ފެށިގެންނެވެ.