ރާއްޖޭގެ އިޤްތިޞާދީ ކުރިއެރުމަށާއި އުފެއްދުންތެރިކަން އިތުރުކުރުމަށް މިވަގުތު ހިންގާ އެންމެ މުހިންމު މަޝްރޫޢަކީ މާލޭ ވިޔަފާރި ބަނދަރު ތިލަފުއްޓަށް ބަދަލުކުރުން ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ތިލަފުށީގައި ކުރިއަށްދާ ބަނދަރުގެ މަސައްކަތްތައް ބައްލަވައިލެއްވުމަށް އެ ރަށަށް ކުރެއްވި ޒިޔާރަތުގައި ނޫސްވެރިންނާ ވާހަކަފުޅު ދައްކަވަމުންނެވެ. ރައީސް ތިލަފުއްޓަށް ވަޑައިގެންނެވުމުން މަރުޙަބާ ދެންނެވީ މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ސީއީއޯ ކެޕްޓަން ޙުސައިން ޝަފީޤެވެ. ޒިޔާރަތުގައި އެމްޕީއެލްގެ ފަރާތުން ވަނީ މަޝްރޫޢުގެ އެންމެ ފަހުގެ މަޢުލޫމާތު ރައީސާ ހިއްސާކުރައްވައިފައެވެ.

Advertisement

ރައީސް ވިދާޅުވީ ސަރުކާރުގެ އެކި އިދާރާތަކާއި ބައިނަލްއަޤުވާމީ ފަރާތްތައް ގުޅިގެން މި މަސައްކަތް ވަރަށް ކާމިޔާބުކަމާ އެކު ކުރިއަށްދާ ކަމަށެވެ. އެމަނިކުފާނު ވަނީ ރެޔާއި ދުވާލު ބުރަކޮށް މަސައްކަތްކުރާ ވުޒާރާތަކާއި ކުންފުނިތަކުގެ ވެރިންނާއި މުވައްޒަފުންނަށް ހިތުގެ އެންމެ ފުންމިނުން ޝުކުރު އަދާކުރައްވައިފައެވެ.

މި މަޝްރޫޢުގެ ދަށުން ތިލަފުށީގައި 60 ހެކްޓަރުގެ ބަނދަރެއް ޤާއިމުކުރެވޭނެއެވެ. މަސައްކަތުގެ މިހާރުގެ ޙާލަތަށް ބަލާއިރު އެތެރޭގެ އުޅަނދުފަހަރަށް ޚާއްޞަ ކީ ވޯލްގެ ފުރަތަމަ 100 މީޓަރު ނިމިފައިވާ އިރު ހިއްކި ސަރަހައްދުގެ ބެކްފިލް ކުރުމުގެ ގާތްގަނޑަކަށް 40 އިންސައްތަ ވަނީ ފުރިހަމަވެފައެވެ. ބިންގަނޑު އެއްވަރުކޮށް މަގުތައް ހެދުމުގެ މަސައްކަތް ކުރިއަށްދާ އިރު ޕްރީކާސްޓް ކޮންކްރީޓް ބްލޮކް ސައިޓުގައި އުފެއްދުމާއި ބޭނުންވާ ވަސީލަތްތައް ހޯދުމާއި ޓާމިނަލް ޢިމާރާތްތަކުގެ ކޮންޓްރެކްޓަރަކު ހޮވުމުގެ މަސައްކަތް ވެސް ދަނީ ކުރިއަށެވެ.

ބަނދަރު ހުޅުވާއިރު 14.6 މީޓަރު ފުންމިނުގެ 375 މީޓަރު ދިގު ބައިނަލްއަޤުވާމީ ކީ ވޯލެއް ހުންނާނެ ކަމަށާއި އެ ކީ ވޯލް 1.4 ކިލޯމީޓަރަށް ދިގުކުރެވޭނެ ޖާގަ އޮންނާނެ ކަމަށް ސަރުކާރުން ބުނެފައިވެއެވެ. އެތެރޭގެ އުޅަނދުތަކަށް ދެ ކިލޯމީޓަރަށް ވުރެ ދިގު ކީ ވޯލެއް ވެސް ހެދޭނެއެވެ. ފެށޭއިރު އަހަރަކު 390000 ޓީއީޔޫގެ ކޮންޓެއިނަރު ކެޕޭސިޓީ ހުންނާނެ އިރު މުޅި މަޝްރޫޢު ނިމޭއިރު އެ ޢަދަދު 1.8 މިލިއަން ޓީއީޔޫ އަށް އިތުރުކުރެވޭނެ ކަމަށެވެ. އޭގެ އިތުރުން ޝިޕް ޓު ޝޯ ދެ ކީ ކެރޭނާއި އެއް މޮބައިލް ހާބަރ ކެރޭނު ޤާއިމުކުރެވޭނެއެވެ.

މާލޭ ވިޔަފާރި ބަނދަރުގައި މިހާރު ބޯޓަކުން މުދާ ބާލައި ބަރުކުރުމަށް ހަތް ދުވަހާއި 14 ދުވަހާ ދެމެދުގެ މުއްދަތެއް ހޭދަވާ އިރު ތިލަފުށީގެ އައު ބަނދަރާ އެކު އެ ވަގުތު ގާތްގަނޑަކަށް ދެ ދުވަހަށް ކުރުކުރެވޭނެ ކަމަށް އަންދާޒާކުރެވެއެވެ. ޖާގަ ބޮޑު ވަސީލަތް ފުރިހަމަ ޕޯޓެއްގެ ގޮތުގައި އަންނަ އަހަރުގެ ނޮވެމްބަރު މަހު މި ބަނދަރު އޮޕަރޭޝަނަށް ގެނެވޭނެ ކަމުގެ ޔަޤީންކަން ރައީސް ކުރިން ވެސް ވަނީ ދެއްވައިފައެވެ.