ފިލިޕީންސްގެ ދެކުނުގެ މިންޑަނާއޯ ޖަޒީރާގެ ބޭރު ކަނޑަށް ހޯމަ ދުވަހު އައި މެގްނިޓިއުޑް 7.8 ގެ ބާރުގަދަ ބިންހެލުމެއްގައި މަދުވެގެން 32 މީހުން މަރުވެ، 200 އަށް ވުރެ ގިނަ މީހުން ޒަޚަމްވެއްޖެއެވެ.

މިއީ 1990 ވަނަ އަހަރުގެ ފަހުން އެ ޤައުމަށް އައި އެންމެ ބާރުގަދަ ބިންހެލުމެވެ.

Advertisement

ބިންހެލުމުގެ އެޕިސެންޓަރު އޮތީ ސަރަންގާނީ ޕްރޮވިންސްގެ ބޭރު ކަނޑުގައި، މާސިމް ގެ ހުޅަނގު ދެކުނުން ގާތްގަނޑަކަށް 26 ކިލޯމީޓަރު ދުރުގައެވެ. ބިންހެލުމުގެ ސަބަބުން ޖެނެރަލް ސެންޓޮސް ސިޓީގައި ބައެއް ޢިމާރާތްތައް ވެއްޓި، ސެންޓް އެލިޒަބެތް ހޮސްޕިޓަލަށް ބޮޑެތި ގެއްލުން ލިބި، ބަލި މީހުންނާއި ޞިއްޙީ ޚިދުމަތްތެރިން ހޮސްޕިޓަލުގެ ބޭރުގައި ވަގުތީ ގޮތުން ޚިދުމަތް ދޭން ފެށިއެވެ. ސަރަންގާނީ ޕްރޮވިންސްގެ ފަރުބަދަ ސަރަޙައްދެއްގައި ބިންގަނޑު ކަނޑައިގެން ގޮސް 13 މީހުން މަރުވިއެވެ. ޖެނެރަލް ސެންޓޮސް އިން ހަތް މީހުން މަރުވީ ޢިމާރާތްތައް ވެއްޓުމުގެ ސަބަބުންނެވެ. ދެން ހިމެނެނީ ވެއްޓުނު ތަކެތީގެ ދަށުވެ، މިސްކިތަކަށް ލިބުނު ގެއްލުމުންނާއި ދެކުނު ޕްރޮވިންސްތަކުގައި ހިނގި ލޭންޑް ސްލައިޑްތަކުގައި މަރުވި މީހުންނެވެ.

ބިންހެލުމާ ގުޅިގެން ގާތްގަނޑަކަށް އެއް މީޓަރުގެ ސުނާމީ ރާޅެއް ކައިރީގެ އައްސޭރިފަށަށް ބީހުނެވެ. ޒަމޮއާންގާ ޑެލް ސޫރުގެ އައްސޭރީގެ އަވަށެއްގައި ތޮރުފަން މަތީ ހެދި ހަ ޖިފުޓިއަކަށް ގެއްލުން ލިބުނެވެ. އިންޑޮނީޝިއާ، ޕަލާއޫ، އަދި ދެކުނު ޖެޕާނުގައި ވެސް ކުދި ރާޅުތައް ރެކޯޑް ކުރެވުނެވެ. ގާތްގަނޑަކަށް ފަސް ގަޑި އިރު ފަހުން ސުނާމީ އިންޒާރު އުވައިލިއެވެ.

މި ދުވަހަކީ ފިލިޕީންސްގެ ސްކޫލްތައް ހުޅުވުމުގެ ފުރަތަމަ ދުވަސް ކަމުން، 3.2 މިލިއަން ދަރިވަރުންނާއި 128,000 ޓީޗަރުންނަށް އަސަރުކުރި ކަމަށް ފިލިޕީންސްގެ ދައުލަތުގެ ނޫސް އެޖެންސީން ރިޕޯޓުކުރެއެވެ. ރައީސް ފާޑިނެންޑް މާކޯސް ޖޫނިއާ ވަނީ އަސަރު ލިބުނު ސަރަޙައްދުތަކުގެ ސްކޫލްތައް ބަންދުކުރަން އަމުރުކޮށް، ކުއްލި ޙާލަތުގެ އިދާރާތައް ހަރަކާތްތެރިކޮށްފައެވެ. ބިންހެލުމަށް ފަހު ގިނަ ޢަދަދެއްގެ އާފްޓާ ޝޮކް ރެކޯޑް ކުރެވެމުންދާ ކަމަށް ރިޕޯޓުތައް ބުނެއެވެ.